ខេត្តរតនគិរី ៖ ដោយមានការណែនាំជាប្រចាំពីលោកឧត្តមសេនីយ៍ត្រីគឹម រស្មី មេបញ្ជាការកងរាជអាវុធហត្ថខេត្ត ដល់បណ្តាកងកម្លាំងកងរាជអាវុធហត្ថមូលដ្ឋានទូទាំងខេត្តឱ្យចុះសហការជាមួយក្រុមយុវជនស្ម័គ្រចិត្តសម្តេចតេជោហ៊ុន សែន ក្នុងការចុះវាស់វែងដីធ្លីជូនប្រជាពលរដ្ឋ នៅព្រឹកថ្ងៃទី៨ សីហា លោកសុខ មីន មេបញ្ជាការកងរាជអាវុធហត្ថស្រុកអូរយ៉ាដាវ បានដឹកនាំកម្លាំងក្រោមឱវាទចុះទៅសួរសុខទុក្ខ និងសំណេះសំណាលជាមួយក្រុមយុវជនស្ម័គ្រចិត្តក្នុងក្រុមទី៣៩ ដែលកំពុងចុះវាស់វែងដីធ្លីជូនប្រជាពលរដ្ឋក្នុងឃុំលំជ័រ ស្រុកអូរយ៉ាដាវ ។
នាឱកាសនោះ លោកសុខ មីន និងសហការីបានពាំនាំនូវការសាកសួរសុខទុក្ខពីសំណាក់លោកមេបញ្ជាការកងរាជអាវុធហត្ថខេត្ត ដែលលោកមេបញ្ជាការតែងតែដាស់តឿនឱ្យកម្លាំងកងរាជអាវុធហត្ថ សហការជាមួយបងប្អូនក្រុមយុវជនស្ម័គ្រចិត្ត ព្រមទាំងធ្វើការឧបត្ថម្ភទៀតផង ។ ចំពោះអំណោយនាំទៅផ្តល់ជូននាថ្ងៃនោះមានថវិកាចំនួន២០ម៉ឺនរៀល សាច់ជ្រូកចំនួន៧គីឡូក្រាម សាច់គោ៥គីឡូក្រាម ទឹកបរិសុទ្ធចំនួន១០កេស ត្រឡាចចំនួន២០គីឡូក្រាម ផ្លែសាវម៉ាវ១០គីឡូក្រាម និងបន្ទប់អនាម័យចល័តចំនួន១ ។
លោកសួន ផានិត ប្រធានក្រុមការងារយុវជនស្ម័គ្រចិត្តបានថ្លែងថា ដោយមានការសហការល្អរបស់អាជ្ញាធរ កងកម្លាំងប្រដាប់អាវុធ និងមន្ត្រីជំនាញពាក់ព័ន្ធរួមទាំងអាជ្ញាធរមូលដ្ឋានផង បានបង្កលក្ខណៈងាយស្រួលទាំងការស្នាក់នៅ និងការហូបចុកដល់ក្រុមការងារយុវជនស្ម័គ្រចិត្ត ដើម្បីចុុះវាស់វែងដីធ្លីជូនប្រជាពលរដ្ឋ ប្រកបដោយឆន្ទៈមោះមុត សម្រេចឱ្យបានតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី ប្រយោជន៍ដើម្បីកាត់បន្ថយ និងបង្រួមឱ្យខាងតែបានបញ្ហាវិវាទដីធ្លីរវាងប្រជាពលរដ្ឋ និងក្រុមហ៊ុនដីសម្បទានសេដ្ឋកិច្ច ។ ក្នុងរយៈពេល២ថ្ងៃ គឺចាប់ពីថ្ងៃទី៦ដល់ទី៧ សីហា ឆ្នាំ២០១២ ក្រុមការងារសម្រេចការវាស់វែងបាន៨០ក្បាលដី ស្មើនឹងចំនួន៦០គ្រួសារ និងធ្វើការវាស់វែងបាន៣០៣ចំណុច ស្មើនឹង១៩៧ហិកតា ។
ចុងបញ្ចប់ លោកសួន ផានិត តំណាងឱ្យក្រុមយុវជនស្ម័គ្រចិត្តសម្តេចតេជោ ហ៊ុន សែន បានថ្លែងអំណរគុណលោកមេបញ្ជាការកងរាជអាវុធហត្ថស្រុកអូរយ៉ាដាវ និងសហការីដែលបាននាំយកថវិកា គ្រឿងឧបភោគបរិភោគ និងបន្ទប់អនាម័យចល័តមកផ្តល់ជូននាពេលនេះ ៕
ចែករំលែកព័តមាននេះ