ខេត្តស្ទឹងត្រែង ៖ ជនសង្ស័យ២នាក់ដែលអ្នកចម្ការចោទប្រកាន់ថា លួចសម្ភាររបស់ពួកគាត់ត្រូវបានចាប់ឱ្យសមត្ថកិច្ចកាលពីវេលាម៉ោង៣និង៣០នាទីរសៀលថ្ងៃទី៦ សីហា នៅចំណុចវាលរំពេ ក្នុងភូមិកាទោត ឃុំកំភុន ស្រុកសេ សាន ។គួរបញ្ជាក់ថា បានធ្វើសកម្មភាពលួចម៉ូតូនៅជនបទក្នុងខេត្តរតនគិរី រួចជិះគេចខ្លួនតាមផ្លូវជាតិលេខ៧៨A ចូលមកដល់ទឹកដីក្រុងស្ទឹងត្រែង ហើយត្រូវកម្លាំងស្នងការដ្ឋាននគរបាលខេត្តចុះស្ទាក់ចាប់ក៏ផ្តួលម៉ូតូចោលរួចរត់ចូលព្រៃហើយវង្វេងក្នុងព្រៃ ។
ដោយសារហេវហត់ខ្លាំងពេក បានចូលទៅរកសុំបាយអ្នកភូមិហូបតែដោយម្ចាស់មិននៅក៏លួចសម្ភារអ្នកភូមិនិងលួចបាយរត់ចូលព្រៃ ហើយត្រូវម្ចាស់តាមទាន់ជាន់កជាប់ម្នាក់ចាប់ប្រគល់ឱ្យកងរាជអាវុធហត្ថ ខេត្ត ។ មន្ត្រីកងរាជអាវុធហត្ថខេត្តឱ្យដឹងថា ជនសង្ស័យម្នាក់នេះឈ្មោះមួង ឡងឌី ហៅប្រុស អាយុ២៣ឆ្នាំ មានទីលំនៅនៅខេត្តកំពង់ស្ពឺ ចំណែកជនសង្ស័យម្នាក់ទៀត ដែលសមត្ថកិច្ចកំពុងតាមចាប់ខ្លួននោះឈ្មោះវុន ប្រុសពៅ ។ ប្រភពព័ត៌មានបានឱ្យដឹងថា នៅយប់ថ្ងៃទី៤ សីហា ពួកគេទាំងពីរនាក់បាននាំគ្នាចូលផឹកស៊ីនិងរាំលេងនៅក្នុងហាងឌីស្កូកាឡាក់ស៊ីក្លឹប ក្នុងខេត្តរតនគិរីរហូតដល់ម៉ោង១១យប់ ។
ដោយ សប្បាយមិនទាន់អស់ចិត្ត ពួកគេក៏បានហៅម៉ូតូឱ្យឌុបទៅរកទិញថ្នាំញៀនជក់ដើម្បីសប្បាយឱ្យអស់ចិត្ត ហើយនៅពេលឱ្យម្ចាស់ម៉ូតូចូលទៅទិញក៏ឆ្លៀតឱកាសលួចយកម៉ូតូឌុបគ្នាចាកចេញពីខេត្តរតនគិរីក្នុងបំណងយកទៅលក់នៅឯរាជធានីភ្នំពេញ តែក៏ត្រូវអស់លក្ខណ៍ត្រឹមទឹកដីខេត្តស្ទឹងត្រែង ។ ដោយសារមានការរាយការណ៍ ពីសមត្ថកិច្ចខេត្តរតនគិរីកម្លាំងនគរបាលព្រហ្មទណ្ឌខេត្តស្ទឹងត្រែង បានចុះទប់ស្កាត់និងឡោមព័ទ្ធចាប់ ខណៈនោះក្រុមជនសង្ស័យបានទុកម៉ូតូចោលរត់គេចខ្លួនហើយដើរវង្វេងព្រៃក៏លួចចូលទៅក្នុងភូមិអ្នកស្រុករកអាហារ ។
ពេលមិនឃើញម្ចាស់ ក៏លួចទូរទស្សន៍ ស៊ីឌីម៉ាកអ៊ីវីឌី ១គ្រឿង និងសម្ភារមួយចំនួនទៀត តែត្រូវម្ចាស់ទាន់ ក៏ចាប់ក្របួចបានម្នាក់ប្រគល់ឱ្យកងអាវុធហត្ថខេត្តនាំខ្លួនមកធ្វើការសាកសួរ ។យោងតាមចម្លើយសារភាព ជនសង្ស័យឈ្មោះមួង ឡងឌី ត្រូវបានកសាងសំណុំរឿងរួមជាមួយវត្ថុតាងបញ្ជូនទៅកាន់សាលាដំបូងខេត្តនាព្រឹកថ្ងៃទី៨ សីហា ៕
ចែករំលែកព័តមាននេះ