ខេត្តពោធិ៍សាត់ ៖ រយៈពេលពេញមួយថ្ងៃទី៨ សីហា តំណាងអង្គការ Jica ទីប្រឹក្សាក្រសួងធនធានទឹក និងឧតុនិយម និងទីប្រឹក្សា TSC3 ដឹកនាំដោយលោក ពេជ វាសនា អគ្គនាយករងកិច្ចការរដ្ឋបាលនៃក្រសួងធនធានទឹក និងឧតុនិយម បានចុះត្រួតពិនិត្យ និងវាយតម្លៃលើប្រព័ន្ធ ស្រោចស្រពនៅខេត្តពោធិ៍សាត់ ។
លោក កែវ វ័យ ប្រធានមន្ទីរធនធានទឹក និងឧតុនិយមខេត្ត បានឱ្យដឹងថា ប្រព័ន្ធស្រោចស្រពគម្រោងអង្គការ Jica ជាជំនួយឥតសំណងរបស់ប្រទេសជប៉ុននៅខេត្តពោធិ៍សាត់ ដែលបានសាងសង់រួចដូចជា នៅធ្លាម្អម ស្រុកក្រគរ សាងសង់នៅឆ្នាំ២០០៩ ស្រោចស្រពលើផ្ទៃដីស្រែ ៣.៥០០ ហិកតា ប្រព័ន្ធធារាសាស្ត្រទួលគូរស្រុកកណ្តៀង សាងសង់នៅឆ្នាំ២០១០ ស្រោចស្រពលើផ្ទៃដី៧៧១ហិកតា ប្រព័ន្ធធារាសាស្ត្រកំពែង ស្រុកភ្នំក្រវាញ សាងសង់នៅឆ្នាំ២០១២ ស្រោចស្រពលើផ្ទៃដី៣៨០ហិកតា ប្រព័ន្ធធារាសាស្ត្រកំប៉ាង ស្រុកបាកាន សាងសង់នៅឆ្នាំ ២០១០ ស្រោចស្រពលើផ្ទៃដី២.២០០ហិកតា និងម៉ូដែលសៃដំណាក់អំពិល ក្រុងពោធិ៍សាត់ សាងសង់នៅឆ្នាំ២០១២ ស្រោចស្រពលើផ្ទៃដី ១០០ហិកតា ។ បន្ទាប់ពីពិនិត្យប្រព័ន្ធស្រោចស្រពទាំងអស់ខាងលើរួចមក គណៈប្រតិភូក៏បានបន្តដំណើរទៅពិនិត្យមើលការសាងសង់ទំនប់ទី៣ នៅស្រុកភ្នំក្រវាញរបស់ក្រុមហ៊ុនចិន ពិនិត្យស្ថានីយវាស់ទឹកបាក់ត្រកួន ស្រុកភ្នំក្រវាញ និងពិនិត្យស្ថានីយឧតុនិយមនៅមន្ទីរធនធានទឹក និងឧតុនិយមខេត្តផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ