រាជធានីភ្នំពេញ ៖ ក្រុមអ្នកសង្កេតការណ៍និយាយថា ជារឿយៗគេសង្កេតឃើញនូវភាពអសកម្មជាច្រើន ដែលបង្កឱ្យមានការរអ៊ូរទាំពីភ្ញៀវទេសចរឆ្លងកាត់ព្រំដែន ។ មូលហេតុគន្លឹះដែលនាំឱ្យមានការយឺតយ៉ាវនោះគឺការឆ្លៀតដឹកទំនិញក្នុងឃ្លុបរថយន្ត និងក្រោមកៅអីអ្នកដំណើរដែលត្រូវចំណាយពេលវេលារង់ចាំមួយចំនួនសម្រាប់បំពេញបែបបទនាំចូល ។
ក្រុមអ្នកសង្កេតការណ៍ផ្នែកខាងគយ និងរដ្ឋាករនិយាយថា រៀងរាល់ពេលមានការត្រួតពិនិត្យរូបវ័ន្តតាមគោលការណ៍គ្រប់គ្រងហានិភ័យ និងតាមរូបភាពចោះៗម្តងម្តាលនោះគេសង្កេតឃើញថា រថយន្តដឹកភ្ញៀវទេសចរទាំងនោះមួយចំនួន ពុំបានយកកម្រៃពីអ្នកដំណើរទេគឺគ្រាន់តែអង្គុយបន្លំភ្នែកសមត្ថកិច្ចប៉ុណ្ណោះ និងមានបង្កប់នូវទំនិញគេចពន្ធដែលមួយផ្នែកជាប្រភេទទំនិញហាមឃាត់ការនាំចូល ។ ក្នុងរថយន្តមួយគ្រឿងដែលចាប់បានមានទំនិញគេចពន្ធរាប់តោនដែលជាប់ពន្ធអាករ និងប្រាក់ពិន័យជាមធ្យមប្រមាណ៤០លានរៀល ដូចជាករណីចាប់ឃាត់រថយន្តទេសចរណ៍៤គ្រឿងនៅខេត្តព្រៃវែងនាខែមិថុនា ២០១២នេះជាដើម។
ប្រសិនបើពិនិត្យពីតួលេខជាមធ្យមប្រមាណ៤៥គ្រឿងក្នុងមួយថ្ងៃនោះ គេអាចគណនាពីផលប៉ះពាល់ ពីសកម្មភាពល្មើសច្បាប់ទាំងនោះបាន។ ក្រោយពេលទទួលរងនូវការបង្ក្រាប និងវិធានការណ៍ពង្រឹងការត្រួតពិនិត្យនាខែកន្លងមក បរិមាណរថយន្តប្រភេទនេះបានថយចុះគួរឱ្យកត់សម្គាល់ ។ ជាទូទៅរាល់ពេលមានការឃាត់ត្រួតពិនិត្យម្តងៗ អ្នកបើកបរ ឬម្ចាស់ទំនិញតែងតែគេចមុខមិនសហការចូលរួមត្រួតពិនិត្យទេ និងគិតតែរត់រកអន្តរាគមន៍ពីអ្នកមានអំណាចមកកាងការពារ ដែលនាំឱ្យមានការអូសបន្លាយពេលវេលាបង្កឱ្យយឺតយ៉ាវដល់អ្នកដំណើរ ។
សរុបសេចក្តីមក ប្រសិនបើគេពិតជាមានបំណងសម្រួលដល់អ្នកទេសចរឱ្យឆ្លងដែនបានឆាប់រហ័សមែននោះ ការសម្របសម្រួលមួយចំនួនជាការចាំបាច់ ៖
-បញ្ឈប់ការយករថយន្តដឹកភ្ញៀវទេសចរ ទៅប្រើប្រាស់ដឹកទំនិញជាលក្ខណៈពាណិជ្ជកម្មដែលនាំឱ្យខាតពេលបំពេញបែបបទលើនីតិវិធីគយតាមច្បាប់ជាធរមាន ។
-ក្រុមហ៊ុនដឹកភ្ញៀវទេសចរ ត្រូវសហការឱ្យបានល្អជាមួយអាជ្ញាធរមានសមត្ថកិច្ចពាក់ព័ន្ធបញ្ឈប់ការរត់រកខ្នងបង្អែកមកអន្តរាគមន៍ផ្សេងៗខុសនីតិវិធី និងត្រូវស្វែងយល់ពីបែបបទអ្នកដំណើរ មធ្យោបាយដឹកជញ្ជូន និងទំនិញឱ្យបានច្បាស់លាស់ និងត្រូវស្វែងយល់ពីបែបបទជាមុនដើម្បីបំពេញឱ្យរួចរាល់មុនពេលមកដល់កន្លែងត្រួតពិនិត្យ ។ ប្រសិនបើអាជ្ញាធរមានសមត្ថកិច្ចប្រព្រឹត្តរំលោភបំពានច្បាប់ ជាពិសេសការជំរិតទារកម្រៃក្រៅផ្លូវការនោះ ធុរជនត្រូវតវ៉ាទៅស្ថាប័នមានសមត្ថកិច្ចជាបន្ទាន់ មិនត្រូវទុកឱ្យទៅជាទម្លាប់អាក្រក់លំបាកកែនោះទេ ។
ប្រសិនបើផ្នែកឯកជន ឬអាជីវករប្រព្រឹត្តបទល្មើសនានា ជាពិសេសការបង្កប់ប្រេង និងទំនិញផ្សេងៗគេចពន្ធនោះ អាជ្ញាធរមានសមត្ថកិច្ចត្រូវធ្វើកំណត់ហេតុបទល្មើសជាបន្ទាន់មិនត្រូវបង្អែបង្អង់ និងបញ្ជូនទៅស្ថាប័នមានសមត្ថកិច្ចដើម្បីវិនិច្ឆ័យតាមផ្លូវច្បាប់ ។ ករណីដូចនេះសាមីក្រុមហ៊ុនទេសចរណ៍ត្រូវប្តូររថយន្តដើម្បីដឹកភ្ញៀវទេសចរបន្តទៀត ចៀសវាងការយឺតយ៉ាវដូចករណីខាងលើ ឬតម្កល់ប្រាក់ធានាតាមច្បាប់ ៕
ចែករំលែកព័តមាននេះ