ខេត្តពោធិ៍សាត់ ៖ រយៈពេលពេញមួយថ្ងៃទី៨ សីហា តំណាងអង្គការ Jica ទីប្រឹក្សាក្រសួងធនធានទឹក និងឧតុនិយម និងទីប្រឹក្សា TSC3 ដឹកនាំដោយលោក ពេជ វាសនា អគ្គនាយករងកិច្ចការរដ្ឋបាលនៃក្រសួងធនធានទឹក និងឧតុនិយម បានចុះត្រួតពិនិត្យ និងវាយតម្លៃលើប្រព័ន្ធ ស្រោចស្រពនៅខេត្តពោធិ៍សាត់ ។
លោក កែវ វ័យ ប្រធានមន្ទីរធនធានទឹក និងឧតុនិយមខេត្ត បានឱ្យដឹងថា ប្រព័ន្ធស្រោចស្រពគម្រោងអង្គការ Jica ជាជំនួយឥតសំណងរបស់ប្រទេសជប៉ុននៅខេត្តពោធិ៍សាត់ ដែលបានសាងសង់រួចដូចជា នៅធ្លាម្អម ស្រុកក្រគរ សាងសង់នៅឆ្នាំ២០០៩ ស្រោចស្រពលើផ្ទៃដីស្រែ ៣.៥០០ ហិកតា ប្រព័ន្ធធារាសាស្ត្រទួលគូរស្រុកកណ្តៀង សាងសង់នៅឆ្នាំ២០១០ ស្រោចស្រពលើផ្ទៃដី៧៧១ហិកតា ប្រព័ន្ធធារាសាស្ត្រកំពែង ស្រុកភ្នំក្រវាញ សាងសង់នៅឆ្នាំ២០១២ ស្រោចស្រពលើផ្ទៃដី៣៨០ហិកតា ប្រព័ន្ធធារាសាស្ត្រកំប៉ាង ស្រុកបាកាន សាងសង់នៅឆ្នាំ ២០១០ ស្រោចស្រពលើផ្ទៃដី២.២០០ហិកតា និងម៉ូដែលសៃដំណាក់អំពិល ក្រុងពោធិ៍សាត់ សាងសង់នៅឆ្នាំ២០១២ ស្រោចស្រពលើផ្ទៃដី ១០០ហិកតា ។
បន្ទាប់ពីពិនិត្យប្រព័ន្ធស្រោចស្រពទាំងអស់ខាងលើរួចមក គណៈប្រតិភូក៏បានបន្តដំណើរទៅពិនិត្យមើលការសាងសង់ទំនប់ទី៣ នៅស្រុកភ្នំក្រវាញរបស់ក្រុមហ៊ុនចិន ពិនិត្យស្ថានីយវាស់ទឹកបាក់ត្រកួន ស្រុកភ្នំក្រវាញ និងពិនិត្យស្ថានីយឧតុនិយមនៅមន្ទីរធនធានទឹក និងឧតុនិយមខេត្តផងដែរ ។លោកពេជ វាសនា អគ្គនាយករងកិច្ចការរដ្ឋបាល និងជាប្រធាន TSC3 នៃក្រសួងធនធានទឹក និងឧតុនិយម មានប្រសាសន៍ថា ការដឹកនាំតំណាង Jica ចុះមកថ្ងៃនេះ មានគោលបំណង ទី១-ពិនិត្យសក្តានុពលទឹកនៅខេត្តពោធិ៍សាត់ ទី២-វាយតម្លៃគម្រោងសំណង់ប្រព័ន្ធធារាសាស្ត្រដែលបានសាងសង់រួចដោយ TSC3 និងទី៣-ដើម្បីពិនិត្យគម្រោងសាងសង់បន្ត ។
លោក ពេជ វាសនា និងតំណាងអង្គការ Jica ដែលជាម្ចាស់គម្រោងបានកោតសរសើរ និងវាយតម្លៃខ្ពស់ចំពោះមន្ទីរធនធានទឹក និងឧតុនិយមខេត្ត ដែលគ្រប់គ្រងការងារបានល្អ ពិសេសមានការចូលរួមថែទាំពីសហគមន៍កសិករ ដែលជាអ្នកប្រើប្រាស់ទឹកបានល្អប្រសើរ ។លោក ពេជ វាសនា មានប្រសាសន៍ទៀតថា សក្តានុពលទឹកនៅ ខេត្តពោធិ៍សាត់ មានលក្ខណៈល្អប្រសើរ ពេលធារាសាស្ត្រកើតឡើង ប្រជាកសិករនឹងទទួលបានជោគជ័យលើការងារបង្កបង្កើនផលស្រូវគ្រប់ទីកន្លែងជាក់ជាមិនខាន ។ អង្គការ Jica ប្រទេសជប៉ុន បានពិនិត្យ និងបន្តជួយនៅជំហានទី២បន្តទៀត ដើម្បីធ្វើឱ្យមិត្តភាពជប៉ុន-កម្ពុជាកាន់តែស្អិតរមួត ៕
ចែករំលែកព័តមាននេះ