ខេត្តកណ្តាល ៖ នគរបាលប៉ុស្តិ៍សំរោងធំសហការជាមួយនគរបាលស្រុកកៀនស្វាយបានចាប់ឃាត់ខ្លួនបុរសម្នាក់ កាលពីលា្ងចថ្ងៃទី៧ សីហា នៅភូមិព្រែកតាកែវ ឃុំសំរោងធំ ស្រុកកៀនស្វាយ ដោយយោងទៅលើពាក្យបណ្តឹងរបស់ម្តាយក្មេងស្រីម្នាក់ដែលប្តឹងចោទប្រកាន់ថា បានធ្វើសកម្មភាពប្រទូស្តកេរ្តិ៍ខ្មាសកូនស្រីរបស់គាត់ ។
បុរសដែលត្រូវចាប់ខ្លួននេះឈ្មោះ ហួយ ឧត្តម អាយុ៥៣ឆ្នាំ ជាជាងប៉ះកង់ និងមានទីលំនៅក្នុងភូមិឃុំខាងលើ ។ តាមប្រភពព័ត៌មានពីនគរបាលស្រុកកៀនស្វាយឱ្យដឹងថា កាលពីល្ងាចថ្ងៃទី៧ សីហា ឈ្មោះហួយ ឧត្តម បានទៅដណ្តើមក្រដាសកាសែតពីក្មេងស្រី តែពេលនោះក្មេងស្រីមិនឱ្យដោយឱបជាប់នឹងខ្លួន ហើយឈ្មោះ ហួយ ឧត្តម ក៏ចាប់ឱបក្មេងស្រីដណើ្តមយកកាសែត ឯម្តាយក្មេងស្រីឃើញក៏ប្តឹងចោទប្រកាន់ថា បានធ្វើសកម្មភាពប្រទូស្តកេរ្តិ៍ខ្មាសកូនស្រីខ្លួន រួចប្តឹងប៉ូលិសឱ្យចាប់ខ្លួនតែម្តង ។
នៅចំពោះមុខសមត្ថកិច្ច បុរសឈ្មោះ ហួយ ឧត្តម ឆ្លើយថា ខ្លួនមិនមានចេតនាធ្វើសកម្មភាពប្រទូស្តកេរ្តិ៍ខា្មសក្មេងស្រីខាងលើទេ និងទាមទារឱ្យមន្ត្រីប៉ូលិសមេត្តាជួយរកយុត្តិធម៌ឱ្យខ្លួនផង ។ ទោះជាយ៉ាងណាក្តី សមត្ថកិច្ចនៅតែបន្តបញ្ជូនបុរសរូបនេះទៅស្នងការដ្ឋាននគរបាលខេត្តដើម្បីចាត់ការតាមច្បាប់ ៕
ចែករំលែកព័តមាននេះ