រាជធានីភ្នំពេញ ៖ ប្រភពអ្នកធ្វើការម្នាក់នៅក្នុងរង្គសាលមួយឈ្មោះស៊ីធីឡាយ បានបង្ហើបឱ្យដឹងថា តារាសម្តែង និងជាពិធីការិនី ថន លក្ខិណា បានបង្ហាញខ្លួនជាញឹកញាប់ជាមួយបុរសវ័យក្មេងចូលទៅរាំលេងពេលរាត្រីនៅក្នុងរង្គសាលមួយនោះ ។
ប្រភពដដែលប្រាប់កាលពីពេលថ្មីៗនេះថា កញ្ញា ថន លក្ខិណា តែងតែទៅស៊ីធីឡាយជាញឹកញាប់ ដែលភាគច្រើនគឺទៅជាក្រុមជាមួយបុរសក្មេងៗ ហើយក្នុងចំណោមបុរសទាំងនោះមានម្នាក់ត្រូវគេចាប់អារម្មណ៍យ៉ាងខ្លាំង ដោយហេតុថា មានភាពជិតស្និទ្ធ និងកៀកកិតជាមួយនាង ធ្វើឱ្យគេយល់ថា ប្រហែលជាគូស្នេហ៍របស់នាង ។ ភាពសង្ស័យនោះកើតឡើងដោយសារ គេឃើញបុរសរូបនោះតែងតែរាំកៀកកិតជាមួយនឹងនាងថន លក្ខិណា សូម្បីតែពេលរាំចប់មួយបទៗ បុរសរូបនោះតែងតែដឹកដៃនាងជាប់ ហើយនាំទៅអង្គុយនៅសាឡុងជាមួយគ្នា ។
ឆ្លើយតបទៅនឹងបញ្ហានេះ កញ្ញា ថន លក្ខិណា បានបកស្រាយប្រាប់កោះសន្តិភាពតាមទូរស័ព្ទនៅថ្ងៃទី៨ សីហា ថា ជាការពិតនាងតែងតែទៅកម្សាន្តនៅរង្គសាលនោះមែន ជាការលំហែអារម្មណ៍ក្រោយពេលនាងទំនេរពីការងារសិល្បៈ ។ ការទៅរាំលេងនៅទីនោះ ភាគច្រើនគឺនាងទៅជាក្រុម មិនមែនទៅតែម្នាក់ឯង ឬក៏ទៅតែ២នាក់ទេ ។ ចំពោះបុរស ដែលនាងបានទៅជា
មួយនោះ ភាគច្រើនគឺសុទ្ធតែជាអ្នកស្គាល់គ្នា មិនមានបុរសណាម្នាក់ពិសេសសម្រាប់នាង ឡើយ ។
ពិធីការិនីរាងស្តើង ខ្ពស់រូបនេះ បញ្ជាក់ថា «ការរាំ លេងនោះមិនមែននាងខ្ញុំរាំកៀកកិតជាមួយបុរសណាម្នាក់ជាងអ្នកណាម្នាក់ឡើយ ។ ពោលគឺនាងខ្ញុំមានភាពជិតស្និទ្ធទាំងអស់គ្នា ព្រោះយល់ថា ទាំងអស់គ្នាសុទ្ធតែជាអ្នកស្គាល់ និងរាប់អានគ្នា ហើយវាគ្រាន់តែជាការរាំកម្សាន្តប៉ុណ្ណោះ មិនមែនធ្វើអ្វីផ្តេសផ្តាសឡើយ» ។ នារីស្អាតដដែលអះអាងថា ការចូលទៅរាំកម្សាន្តនៅទីនោះមិនមែនមានតែនាងម្នាក់ដែល ជាអ្នកសិល្បៈឡើយ ពោលគឺមានអ្នកសិល្បៈមួយចំនួនទៀតក៏ឧស្សាហ៍ចូលទៅរាំនៅទីនោះផងដែរ ។
តារាសម្តែង និងពិធីការិនីរាងខ្ពស់ស្រឡះសាច់សខ្ចី ថន លក្ខិណាបាន លើកឡើងថា «នាងខ្ញុំនៅទីនោះគេចាប់
អារម្មណ៍ ចុះតារាមួយចំនួនទៀតដែលគេបានទៅទីនោះដែរ ហេតុអ្វីគេមិនចាប់អារម្មណ៍ផង ម៉េចមកចាប់អារម្មណ៍អីតែខ្ញុំ វាមិនសម ។ ការដែលខ្ញុំទៅទីនោះ គឺដើម្បីរាំកម្សាន្តប៉ុណ្ណោះ មិនមែនទៅធ្វើអីផ្តេសផ្តាសឡើយ ហើយមនុស្សដែលបានឃើញនោះភាគច្រើនគឺជាអ្នកស្គាល់គ្នា ហើយពួកយើងច្រើនទៅជាក្រុម សូមកុំយល់ច្រឡំ» ។ ជាការពិតណាស់ មនុស្សយើងក្រោយពេលបំពេញការងារហត់នឿយតែងតែរកការកម្សាន្តអារម្មណ៍ ។ ដូចជាកញ្ញា ថន លក្ខិណា ជាដើមចូលចិត្តរាំលំហែអារម្មណ៍ ហើយយើងគ្រាន់តែចង់បង្ហាញជូនអ្នកអានពីជីវភាពសាមញ្ញក្រៅឆាករបស់នាងជាតារាល្បីឈ្មោះ ដែលមហាជនចាប់អារម្មណ៍ប៉ុណ្ណោះ។
ពីដំបូងៗ កញ្ញា ថន លក្ខិណា មិនដែលបានជួបប្រទះរឿងអាស្រូវណាមួយមកលើខ្លួននាងឡើយចាប់តាំងពីនាងចូលប្រឡូកក្នុងពិភពសិល្បៈ តែរយៈពេលប៉ុន្មានឆ្នាំចុងក្រោយនេះនាងជួបរឿងទាក់ទងជាមួយនឹងជីវិតឯកជនរបស់នាងជាបន្តបន្ទាប់ ។ នេះគឺដោយសារតែកម្រិតជីវភាពរបស់នាងមានសភាពប្រែប្រួលខុសពីធម្មតា ដោយមានរថយន្តថ្មីសន្លាងជិះយ៉ាងសង្ហា និងប្រកបដោយភាពស៊ីវិល័យហ៊ឺហា ធ្វើឱ្យទស្សនិកជនមានមន្ទិលសង្ស័យ ។
គេសង្ស័យថា នាងថន លក្ខិណា មានអ្នកជួយឧបត្ថម្ភពីក្រោយ ប៉ុន្តែទោះជាយ៉ាងណាក្តី នាងតែងតែច្រានចោល ដោយលើកហេតុផលថា ភាពជោគជ័យក្នុងអាជីពសិល្បៈរបស់នាង គឺបានមកពីខិតខំប្រឹងប្រែងដោយញើសឈាមរបស់នាងផ្ទាល់ ហើយអ្វីដែលនាងមានសព្វថ្ងៃនេះ គឺបានមកដោយកម្លាំងរបស់នាងដោយមិនមានអ្នកណាម្នាក់ចាំជួយឧបត្ថម្ភពីក្រោយឡើយ។ កញ្ញា ថន លក្ខិណា ប្រកបដោយរូបសម្រស់ស្រស់ស្អាត និងទេពកោសល្យសិល្បៈល្អ រស់រវើកក្នុងដួងចិត្តទស្សនិកជន ដូច្នេះអនាគតសិល្បៈរបស់នាងនឹងកាន់តែរុងរឿងឡើង ៕
ចែករំលែកព័តមាននេះ