ខេត្តក្រចេះ ៖ សមត្ថកិច្ចខេត្តក្រចេះ ដឹកនាំដោយលោកអភិបាលរងខេត្ត កាលពីព្រឹកថ្ងៃទី៩ សីហា បានឆ្មក់ចូលបង្រ្កាបទីតាំងធ្វើអាជីវកម្មរ៉ែមាសរាប់សិបទីតាំង ដែលលួចធ្វើអាជីវកម្មខុសច្បាប់មានរាប់ឆ្នាំមកហើយនៅក្នុងព្រៃចំណុចភ្នំព្រិច ក្នុងភូមិសាស្ត្រឃុំស្វាយជ្រះ ស្រុកស្នួល ។
ការចុះបង្រ្កាបនេះ ដឹកនាំដោយលោកជាក់ ម៉េងហ៊ាង អភិបាលរងខេត្ត តែពុំមានការចាប់ឃាត់ខ្លួនម្ចាស់អាជីវកម្មរ៉ែអនាធិបតេយ្យ ដែលលួចធ្វើសកម្មភាពនៅចំណុចនោះណាម្នាក់ទេ ដោយគ្រាន់តែចូលរឹបអូសបានគ្រឿងចក្រ និងម៉ាស៊ីនកែច្នៃមួយចំនួនប៉ុណ្ណោះ ។
យោងតាមប្រភពព័ត៌មានបានឲ្យដឹងថា ទីតាំងរ៉ែអនាធិបតេយ្យរាប់រយនៅក្នុងព្រៃនៅចំណុចខាងលើ ត្រូវបានក្រុមជនទុច្ចរិតលួចធ្វើសកម្មភាពជាច្រើនឆ្នាំមកហើយ ដោយប្រើប្រាស់សុទ្ធតែគ្រឿងចក្រធំៗ និងម៉ាស៊ីនកែច្នៃទំនើបៗ តែគេមិនឃើញមានសមត្ថកិច្ចជំនាញចុះធ្វើការបង្ក្រាបទប់ស្កាត់នោះទេ ។ មុនការចុះឆ្មក់បង្រ្កាបរបស់សមត្ថកិច្ច គឺគេដឹងថា ក្រុមឈ្មួញបានសម្រុកដឹកសម្ភារ និងម៉ាស៊ីនកែច្នៃចេញពីតំបន់នេះស្ទើរអស់ទាំងស្រុងទៅហើយ ទើបការឆ្មក់ចូលរបស់សម្ថកិច្ចចាប់បានតែម៉ាស៊ីននិងឧបករណ៍កែច្នៃមួយចំនួនប៉ុណ្ណោះ ។
មន្រ្តីមន្ទីរឧស្សាហកម្មរ៉ែ និងថាមពលខេត្ត បានឱ្យដឹងថា ការបង្រ្កាបទីតាំងរ៉ែអនាធិបតេយ្យនៅចំណុចនោះ គឺគ្រាន់តែចុះបង្រ្កាបរឹបអូសសម្ភារប្រើប្រាស់ និងកែច្នៃតែប៉ុណ្ណោះមិនមានផែនការចាប់ឃាត់ខ្លួនជនណាម្នាក់នោះទេ ។មន្រ្តីដដែលបានបញ្ជាក់ថា ការចុះទៅបង្ក្រាបទីតាំងរ៉ែអនាធិបតេយ្យនៅចំណុចនេះ គឺធ្វើឡើងទៅតាមគោលការណ៍របស់ថ្នាក់ខេត្ត និងតបទៅតាមបណ្តឹងរបស់ក្រុមហ៊ុនវិនិយោគ ថ្មម៉ាបដែលចោទប្រកាន់ថា តំបន់វិនិយោគទាំងនេះ បានក្លាយទៅជាតំបន់រ៉ែអនាធិបតេយ្យទៅវិញនោះ ៕
ចែករំលែកព័តមាននេះ