រាជធានីភ្នំពេញ ៖ ជនសង្ស័យជាចោរប្លន់ពេលរាត្រី២នាក់ ត្រូវបានប៉ូលិសតាមប្រមាញ់រហូតដល់ជាន់កដកស្លាបទើបចាប់បាន ក្រោយពីពួកគេធ្វើសកម្មភាពវាយស្ត្រីបម្រើខារ៉ាអូខេម្នាក់ប្លន់យកខ្សែក ខ្សែដៃ និងកាបូបលុយ ខណៈពេលដែលនាងចេញពីធ្វើការនៅហាងខារ៉ាអូខេកាលពីវេលាម៉ោង២និង១៥នាទីទៀបភ្លឺឈានចូលថ្ងៃទី៩ សីហា នៅចំណុចមុខខ្លោងទ្វារវត្តទឹកថ្លា តាមបណ្តោយមហាវិថីសហព័ន្ធរុស្ស៊ី ក្នុងភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ស្ត្រីរងគ្រោះឈ្មោះហាក់ ស្រីកា អាយុ២៥ឆ្នាំ បម្រើការនៅខារ៉ាអូខេឌីយ៉ាម៉ង់ តាមបណ្តោយផ្លូវលេខ១៩៨៦ ក្នុងសង្កាត់ភ្នំពេញថ្មី ខណ្ឌសែនសុខ ត្រូវជនល្មើសវាយប្លន់រហូតរហែកអាវ និងរងរបួសថែមទៀត ។
មន្ត្រីប៉ូលិសដែលបានធ្វើប្រតិបត្តិការតាមប្រមាញ់ចាប់ចោរប្លន់ទាំង២នាក់ខាងលើបានឱ្យដឹងថា មុនពេលកើតហេតុ ស្ត្រីរងគ្រោះបានជិះម៉ូតូឌុប ម៉ាកសង់កូរ៉េចេញពីកន្លែងធ្វើការ មកឈប់នៅចំណុចកើតហេតុខាងលើ និងបម្រុងដើរចូលផ្ទះ ក៏ស្រាប់តែមានម៉ូតូចំនួន២គ្រឿងប្រភេទគុបមូល និងគុបជ្រុងជិះគ្នា៤នាក់ ។ មន្ត្រីប៉ូលិសបាននិយាយទៀតថា ពេលនោះជន២នាក់ជិះម៉ូតូគុបមូលបានចុះពីលើម៉ូតូ ហើយធ្វើសកម្មភាពវាយទៅលើស្ត្រីរងគ្រោះដណ្តើមយកខ្សែក ខ្សែដៃ និងកាបូបលុយ ។ ចំណែកស្ត្រីរងគ្រោះក៏បានប្រវាយប្រតប់ជាមួយជនល្មើសវិញ ប៉ុន្តែមិនឈ្នះ ក៏ត្រូវជនល្មើសប្លន់យកទ្រព្យសម្បត្តិអស់ពីខ្លួន រួចនាំគ្នាជិះម៉ូតូរត់គេចចូលតាមផ្លូវលំមួយ នៅខាងលិចវត្តទឹកថ្លា ។ ក្រោយពេលកើេតហេតុ ស្ត្រីរងគ្រោះក៏បានទូរស័ព្ទប្តឹងទៅប៉ូលិស ហើយប៉ូលិសមូលដ្ឋាន ក៏ចុះមករុករកភ្លាមៗ ក៏ប្រទះនិងក្រុមចោរ២នាក់ដែលកំពុងតែជិះម៉ូតូចេញពីផ្លូវលំឆ្ពោះមកមហាវិថីសហព័ន្ធរុស្ស៊ីវិញ ក៏ត្រូវប៉ូលិសចាប់ខ្លួនបានទាំង២នាក់ ។
មន្ត្រីប៉ូលិសបានឱ្យដឹងទៀតថា ជនសង្ស័យទាំង២នាក់ ក្រោយពីប៉ូលិសចាប់ខ្លួនបានរួចហើយ ប៉ូលិសបានវាយខ្នោះដៃរួចដាក់ទៅលើម៉ូតូប៉ូលិស ដើម្បីបញ្ជូនទៅអធិការដ្ឋានខណ្ឌសែនសុខ ប៉ុន្តែនៅពេលដែលកំពុងនាំខ្លួនតាមម៉ូតូនោះជនសង្ស័យទាំង២នាក់បានលោតចេញពីម៉ូតូប៉ូលិស ដើម្បីរត់ ក៏ត្រូវប៉ូលិសដេញចាប់បានម្តងទៀត ដោយចាប់ផ្តួលទៅលើដី ហើយជាន់កសង្កត់ថែម ទើបយកឈ្នះចោរប្លន់ជើងខ្លាំងនេះបាន ។ បើប៉ូលិសមានកម្លាំងល្មមៗមិនអាចយកឈ្នះលើចោរបានឡើយ ។
ទោះបែបនេះក្តី ក្នុងហេតុការណ៍បង្ក្រាបក្រុមជនសង្ស័យខាងលើ បណ្តាលឱ្យប៉ូលិសអន្តរាគមន៍របួស២នាក់ គឺឈ្មោះអ៊ុច សេរីរ័ត្ន រហស្សនាមមេសា ២៥AC ត្រូវរបួសមួយចំហៀងខ្លួន ដោយសារក្រៀកជនសង្ស័យនៅលើម៉ូតូ ហើយជនសង្ស័យលោតចេញពីលើម៉ូតូ បណ្តាលឱ្យធ្លាក់ពីលើម៉ូតូអូសប្រមាណ១០ម៉ែត្រ និងឈ្មោះបួង បូណា រហស្សនាមមេសា២៥T ជិះម៉ូតូដេញជនសង្ស័យធ្លាក់ជង្ហុក បណ្តាលឱ្យដួលរយះដៃ នៅខណៈពេលដែលក្រុមជនសង្ស័យលោតពីលើម៉ូតូ ។
ជនសង្ស័យទាំង២នាក់ខាងលើម្នាក់ឈ្មោះសំ នាង ភេទប្រុស អាយុ២៥ឆ្នាំ ជាកម្មកររោងចក្រ ស្នាក់នៅផ្ទះជួល សង្កាត់ទឹកថ្លា ខណ្ឌសែនសុខ មានស្រុកកំណើតឃុំបន្ទាយដែក ស្រុកកៀនស្វាយ ខេត្តកណ្តាល និងឈ្មោះទូច វណ្ណារិទ្ធ ភេទប្រុស អាយុ២៤ឆ្នាំ ស្នាក់នៅសង្កាត់ទឹកថ្លា និងមានស្រុកកំណើតនៅខេត្តស្វាយរៀង ។ ទាំង២នាក់នេះ ដោយសារតដៃជាមួយប៉ូលិស ទើបទ្រមខ្លួនមិនតិចទេ និងសំណាងហើយដែលគ្មានអ្នកដទៃជួយវាយថែម ។
ចំពោះទ្រព្យសម្បត្តិស្ត្រីរងគ្រោះដែលបាត់បង់ មានខ្សែកទម្ងន់២ជី(មាស) ខ្សែដៃទម្ងន់២ជី(មាស) និងលុយនៅក្នុងកាបូបចំនួន៣០០ដុល្លារ ដែលនាងបានធ្វើការសន្សំជាច្រើនខែមកហើយនោះត្រូវចោរប្លន់២នាក់ទៀតយកទៅបាត់ ៕
ចែករំលែកព័តមាននេះ