សភាជាតិថ្មីលីប៊ី ដែលទើបបោះឆ្នោតជ្រើសរើសកាលពីខែកក្កដា បានចូលកាន់តំណែងជាផ្លូវការកាលពីថ្ងៃទី៨ សីហា នៅលីប៊ីដែលនោះជាការផ្ទេរអំណាចដោយអហិង្សាក្នុងប្រវត្តិសាស្ត្ររបស់ប្រទេសនេះ ។ ក្នុងពិធីមួយក្រោមកិច្ចការពារសន្តិសុខយ៉ាងរឹងមាំនៅក្រុងទ្រីប៉ូលី ក្រុមប្រឹក្សាជាតិបណ្តោះអាសន្នលីប៊ី CNT ជាសាខានយោបាយរបស់កងកម្លាំងប្រឆាំងដែលផ្តួលរំលំលោកមូអាម៉ាកាដាហ្វី កាលពី១ឆ្នាំមុន បានប្រគល់អំណាចជូនសភាជាតិដែលជ្រើសតាំងកាលពីខែកក្កដា ។
ប្រធានរបស់ CNT លោកមូស្តាហ្វា អាប់ដែលហ្សាលីលបានផ្ទេរជានិមិត្តរូបនូវអំណាចឱ្យដល់សមាជិកសភាដែលមានវ័យចាស់ជាងគេក្នុងសភាថ្មីដែលមានសមាជិក២០០រូបគឺលោកម៉ូហាម៉េដ អាលី សាលីម ។ ក្នុងសុន្ទរកថា មួយលោកអាប់ដែលហ្សាលីល វាយតម្លៃថា មានការភាន់ច្រឡំនានាក្នុងដំណាក់ឆ្លងកាត់ ។ បញ្ហាសន្តិសុខនិងរំសាយអាវុធពុំអាចដោះស្រាយបានទាន់ពេលវេលាឡើយ ។
សមាជិកសភាទាំង២០០រូបដែលធ្វើសច្ចាប្រណិធានចូលកាន់តំណែងត្រូវជ្រើសតាំងនាពេលនេះនូវនាយករដ្ឋមន្ត្រីថ្មីមួយរូបដែលនឹងទទួលបន្ទុកបង្កើតរដ្ឋាភិបាលមួយចំណែក CNT នឹងត្រូវរំលាយ ។ សភាថ្មីនេះក៏នឹងដឹកនាំលីប៊ីផងដែរឆ្ពោះទៅធ្វើការបោះឆ្នោតសភាថ្មីពេលរដ្ឋធម្មនុញ្ញថ្មីត្រូវបានតាក់តែងរួចរាល់ ៕
ចែករំលែកព័តមាននេះ