រាជធានីភ្នំពេញ ៖ តបតាមការជូនដំណឹងរបស់ទីស្តីការគណៈរដ្ឋមន្ត្រីដល់ប្រជាពលរដ្ឋគ្រប់ស្រទាប់វណ្ណៈចាប់តាំងពីមន្ត្រីរាជការ ប៉ូលិស ទាហាន ក្រសួងមន្ទីរ គ្រឹះស្ថានអប់រំ ក្រុមហ៊ុនឯកជន រោងចក្រនានា នៅទូទាំងប្រទេសឱ្យធ្វើការតាមដានស្តាប់សង្កថា របស់សម្តេចនាយករដ្ឋមន្ត្រី ហ៊ុន សែន អំពីបញ្ហាព្រំដែនដែលត្រូវធ្វើឡើងនៅរដ្ឋសភាជាតិនាព្រឹកថ្ងៃទី៩ កក្កដា ២០១២ នេះក្រុមហ៊ុនអូអឹមស៊ី ដែលជាក្រុមហ៊ុននាំចូលគ្រឿងអេឡិចត្រូនិកម៉ាក SHARP និងម៉ូតូម៉ាក Suzuki ផ្តាច់មុខនៅក្នុងព្រះរាជាណាចក្រកម្ពុជា បានធ្វើការបំពាក់ទូរទស្សន៍អេក្រង់ខ្នាតយក្សធំបំផុតនៅខាងមុខ Showroom របស់ខ្លួនដែលស្ថិតនៅកែងមហាវិថីព្រះនរោត្តម និងមហាវិថីព្រះសីហនុ ដើម្បីចាប់យករូបភាពសម្តេចតេជោ ហ៊ុន សែន ដែលបាននិងកំពុងធ្វើការបកស្រាយបំភ្លឺជូនសាធារណជនឱ្យបានជ្រាបច្បាស់លើការពិតស្តីពីបញ្ហាព្រំដែនរបស់ប្រទេសកម្ពុជាជាមួយប្រទេសជិតខាង ពិសេសជាមួយប្រទេសវៀតណាមដែលកំពុងផ្សាយផ្ទាល់ចេញពីរដ្ឋសភាជាតិ និងកំពុងបន្តផ្ទាល់តាមទូរទស្សន៍នានាទាំងអស់ទូទាំងប្រទេស។
រូបភាពដែលបញ្ចាំងចេញពីទូរទស្សន៍ខ្នាតយក្សដែលភាសាបច្ចេកទេសហៅថា SHARP IDP (Information Display Panel) មានភាពម៉ដ្ឋខៃ ភ្លឺច្បាស់ជាមួយទំហំរហូតដល់៧២០ ។ បងប្អូនដែលធ្វើដំណើរតាមមហាវិថីខាងលើអាចទស្សនាបានរូបភាពទាំងស្រុង រូបភាពធំៗត្រជាក់ភ្នែក ហាក់ដូចបានចូលរួមផ្ទាល់នៅរដ្ឋសភាជាតិដូច្នោះដែរ ។ រូបភាពខាងលើបានធ្វើការផ្សាយបន្តចាប់តាំងពីការចាប់ផ្តើមនៃកម្មវិធី រហូតដល់ការបកស្រាយរបស់សម្តេចត្រូវបានបញ្ចប់រួចរាល់នៅវេលាថ្ងៃត្រង់នាថ្ងៃដដែល ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ