ខេត្តកណ្តាល ៖ ប្រជាពលរដ្ឋរស់នៅភូមិកណ្តាលកោះតូច និងចុងកោះតូច ឃុំតាលន់ ស្រុកស្អាង ចំនួន៣០គ្រួសារ បានបង្ខំចិត្តរុះរើលំនៅឋានចាកចេញពីទីតាំងចាស់ដែលខ្លួនធ្លាប់រស់នៅ ខណៈដែលច្រាំងទន្លេបាសាក់បានបន្តបាក់ស្រុតដល់លំនៅឋានរបស់ពួកគាត់ ប៉ុន្តែមិនទាន់ធ្លាក់ចូលក្នុងទន្លេទេ ។
ទន្ទឹមនឹងនោះដែរ ផ្លូវជាតិលេខ១១០ ត្រើយខាងកើតទន្លេបាសាក់ក្នុងភូមិកណ្តាលកោះតូច ត្រូវច្រាំងទន្លេបាក់មកជិតដល់ប្រឈមនឹងការរអិលចូលក្នុងទន្លេផងដែរ ខណៈពេលដែលទឹកទន្លេបាសាក់បានជន់ឡើងខ្លាំងជាលំដាប់ចាប់ពីដើមខែសីហា មក ។ ប៉ុន្តែពុំមានផ្ទះប្រជាពលរដ្ឋណាម្នាក់បានធ្លាក់ចូលទៅក្នុងទន្លេដោយសារបាក់ច្រាំងនោះទេ ។
ប្រជាពលរដ្ឋនិយាយថា ច្រាំងទន្លេបានបាក់ជាបន្តបន្ទាប់អស់រយៈពេលជាច្រើនឆ្នាំមកហើយ តែការបាក់ស្រុតនេះមិនទាន់បាក់ដល់លំនៅឋានរបស់គាត់ឡើយ ពោលគឺបាក់ស្រុតដល់តែដីចម្ការប៉ុណ្ណោះ ។ រយៈពេល៥ឆ្នាំចុងក្រោយនេះច្រាំងទន្លេបានបាក់ខ្លាំង ហើយប្រជាពលរដ្ឋបានបង្ខំចិត្តរុះរើផ្ទះចេញ និងរំកិលជាបន្តបន្ទាប់។ ទើបមកដល់ដើមខែសីហា ២០១២ នេះច្រាំងទន្លេបានបន្តបាក់ស្រុតយ៉ាងខ្លាំងដល់ជិតលំនៅឋានរបស់ពួកគាត់ធ្វើឱ្យពួកគាត់មានការភិតភ័យបង្ខំចិត្តរុះរើលំនៅឋានចេញពីទីតាំងដែលធ្លាប់រស់នៅនោះ ទៅសង់នៅកន្លែងផ្សេងវិញ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ