យូសេន បូលកំពុងរំកិលខ្លួនឆ្ពោះទៅរកមេដាយមាសទី២ក្នុងព្រឹត្តិការណ៍ប្រកួតអូឡាំពិកទីក្រុងឡុងឆ្នាំ ២០១២បន្ទាប់ពីទទួលបានជោគជ័យលើវិញ្ញាសារត់ចម្ងាយ២០០ម៉ែត្រវគ្គពាក់កណ្តាលផ្តាច់ព្រ័ត្រនៅទីក្រុងឡុង ប្រទេសអង់គ្លេស កាលពីថ្ងៃពុធទី៨សីហាកន្លងមកនេះ ។
បូលដែលបានយកឈ្នះមេដាយមាសរត់ចម្ងាយ១០០ម៉ែត្រកាលពីថ្ងៃអាទិត្យ បានឆ្លងកាត់គំនូសព្រ័ត្រក្នុងថិរវេលា២០.១៨វិនាទីនាំមុខកីឡាករវ័យក្មេងអាហ្វ្រិកខាងត្បូង Anaso Jobodwana។ កីឡាករវ័យ២៥ឆ្នាំរូបនេះបានថ្លែងថា ៖«គោលដៅសំខាន់គឺគ្រាន់តែធ្វើយ៉ាងណាឱ្យឆ្លងផុតវគ្គនេះ »។ គេបានបញ្ជាក់ថា ប្រសិនជាឈ្នះមេដាយមាសរត់ចម្ងាយ២០០ម៉ែត្រ នោះរូបគេនឹងក្លាយជាជនល្បីឈ្មោះ ហើយពេលនោះខ្លួនគេពិតជាសប្បាយចិត្តខ្លាំងមិនខាន ។
គេថាវគ្គផ្តាច់ព្រ័ត្រអាចនឹងមើលឃើញនូវឯតទគ្គកម្មពិភពលោករបស់ខ្លួនធ្លាក់ចុះ ១៩.១៩វិនាទី ។ «វាពិតប្រាកដជាអាចទៅរួច ។ ខ្ញុំមិនអាចនិយាយបានថាយ៉ាងម៉េចទៀតទេ តែទីលាននៅទីនេះរអិលខ្លាំងណាស់។ វានឹងក្លាយជាការប្រកួតមួយយ៉ាងល្អ ។ មានកីឡាករខ្លាំងៗជាច្រើន ដូច្នេះយើងនឹងចាំមើល »។
គ្រោះថ្នាក់របស់យូសេន បូលអាចនៅក្នុងវិញ្ញាសារត់ចម្ងាយ២០០ម៉ែត្រវគ្គផ្តាច់ព្រ័ត្រខាងមុខនេះដែលនឹងកើតចេញពីកីឡាករមិត្តរួមជាតិរបស់គេ Yohan Blake ដែលដណ្តើមបានមេដាយប្រាក់រត់ចម្ងាយ១០០ម៉ែត្រ ។ Blakeបាននិយាយថា ៖«ការប្រកួតនេះ វាហាក់ដូចជាការដើរក្នុងសួន។ ខ្ញុំបានហ្វឹកហាត់យ៉ាងម៉ត់ចត់បំផុត។ អ្វីដែលខ្ញុំចាំបាច់ត្រូវតែធ្វើឱ្យបានល្អគឺធាក់ជើងចេញដំណើរ »៕
ចែករំលែកព័តមាននេះ