រាជធានីភ្នំពេញ ៖ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា លោកស៊ុន សុទ្ធារិទ្ធ បានឱ្យដឹងថា នៅខែតុលា ខាងមុខនេះ សហព័ន្ធរបស់លោកនឹងបញ្ជូនកីឡាករ៤រូបទៅចូលរួមប្រកួតកីឡាវាយកូនឃ្លីលើតុជ្រើសរើសជើងឯកអាស៊ីអាគ្នេយ៍លើកទី៨នៅប្រទេសឡាវ។ ការប្រកួតដែលនឹងចាប់ផ្តើមធ្វើពីថ្ងៃទី១០ ដល់១៤ តុលា ឆ្នាំ២០១២ នោះ មានប្រទេសចំនួន១១ក្នុងតំបន់បានទទួលលិខិតអញ្ជើញចូលរួមប្រកួតជាផ្លូវការពីប្រទេសជាម្ចាស់ផ្ទះរួចហើយ ។
ជាមួយនឹងការទទួលបានលិខិតអញ្ជើញនេះ លោកក៏បានឆ្លើយតបភ្លាមៗបញ្ជាក់ពីការចូលរួមផងដែរ ខណៈប្រទេសខ្លះនៅក្នុងតំបន់មិនបានចូលរួមទេ ដោយគេគ្មានសង្ឃឹមថានឹងបានមេដាយ តែខាងកម្ពុជា ទោះជាសង្ឃឹម ឬមិនសង្ឃឹមក្តីតែងតែចូលរួមជានិច្ច ។
លោកអគ្គលេខាធិការសហព័ន្ធកីឡាវាយកូនឃ្លីលើតុ បានបញ្ជាក់ថា នៅថ្ងៃទី១០ កញ្ញា ខាងមុខនេះ សហព័ន្ធនឹងបញ្ជូនកីឡាករ កីឡាការិនីចំនួន៦រូបទៅហ្វឹកហាត់នៅប្រទេសវៀតណាមសម្រាប់ត្រៀមចូលរួមព្រឹត្តិការណ៍នេះ ។ ការទៅហ្វឹកហាត់នៅប្រទេសវៀតណាមនេះ ទាល់តែដល់ថ្ងៃទី៥ តុលា ទើបត្រឡប់មកវិញ រួចចេញដំណើរទៅកាន់ប្រទេសឡាវ ដែលជាកន្លែងប្រកួតមុនថ្ងៃទី១០ តុលា តែម្តង ។
សូមបញ្ជាក់ថា ចំនួនកីឡាករ ដែលគ្រោងបញ្ជូនទៅចូលរួមប្រកួតជ្រើសរើសជើងឯកអាស៊ីអាគ្នេយ៍លើកទី៨នៅប្រទេសឡាវនោះ មាន៤រូប ១-កីឡាករណៃ សារ៉ាវៃ ជាកីឡាករជម្រើសជាតិមកពីក្លិបសមាគមចិននៅកម្ពុជា និងជាជើងឯកក្របខ័ណ្ឌក-១, ២-កីឡាករតាំង ហាវ ជាកីឡាករជម្រើសជាតិមកពីក្លិបសមាគមចិននៅកម្ពុជា និងជាជើងឯករង, ៣-កីឡាករគឹម សុវណ្ណា និង៤-កីឡាករអឹុង ស្រូយហួរ មកពីក្លិបរ័ត្នសុខន ជាជើងឯក និងជើងឯករងក្របខ័ណ្ឌក-២ ៕
ចែករំលែកព័តមាននេះ