រាជធានីភ្នំពេញ ៖ ក្រុមបាល់ទាត់ឆ្លាមសមុទ្រ បានប្រកួតឈ្នះក្រុមអគ្គស្នងការដ្ឋាននគរបាលជាតិ ក្នុងលទ្ធផល 7-6 សម្រាប់ការប្រកួតបាល់ទាត់ពានរង្វាន់ Mefone Cambodian League 2012 នៅលើទីលានពហុកីឡដ្ឋានជាតិ កាលពីរសៀលថ្ងៃពុធទី៨ សីហា កន្លងមកនេះ ។
វាមិនមែនជារឿងធម្មតាឡើយដែលក្រុមបាតតារាងយកឈ្នះក្រុមកំពូលតារាងដូចជាក្រុមអគ្គស្នងការដ្ឋាននគរបាលជាតិ បែបនេះនោះ ។ នៅក្នុងតង់ទី១ ក្រុមទាំង២បានស៊ុតបាល់បញ្ចូលទីគ្នាបាន៣គ្រាប់ម្នាក់ ។ កីឡាកររ៉ុន រ៉ានី ពាក់អាវលេខ៣៨របស់ក្រុមឆ្លាមសមុទ្រ រកបាន១គ្រាប់នាំមុខមុននៅនាទីទី១៨ ខណៈក្រុមអគ្គស្នងការដ្ឋាននគរបាលជាតិ តាមសងបាន១គ្រាប់វិញ នៅនាទីទី២៩ ដែលរកបានដោយកីឡាករ OLADIJINELSON OLATUNDE ពាក់អាវលេខ២០ ។
បន្ទាប់មកខ្សែប្រយុទ្ធជនជាតិប្រេស៊ីល ពាក់អាវលេខ២៩ គឺកីឡាករ BISAN GEORGE របស់ក្រុមឆ្លាមសមុទ្រស៊ុតបាល់បញ្ចូលទីគូប្រកួតបាន២គ្រាប់ទៀតនៅនាទីទី៣៤ និងនាទីទី៤៣ ខណៈកីឡាករ OLADIJINELSON OLATUNDE របស់ក្រុមអគ្គស្នងការដ្ឋាននគរបាលជាតិ រកបាន២គ្រាប់ម្នាក់ឯងទៀតនៅនាទីទី៣១ និងនាទីទី៣៨ ។ ចូលដល់តង់ទី២ ក្រុមឆ្លាមសមុទ្រនៅតែព្យាយាមលេងវាយសម្រុកទៅលើក្រុមអគ្គស្នងការដ្ឋាននគរបាលជាតិ យ៉ាងខ្លាំងក្លារហូតបង្កើតបានប្រវត្តិសាស្ត្ររបស់ខ្លួនដែលពុំធ្លាប់មានពីមុនមក។ កីឡាកររ៉ុន រ៉ានី របស់ក្រុមឆ្លាមសមុទ្រ រកបានគ្រាប់បាល់ទី២របស់ខ្លួននៅពេលការប្រកួតឈានចូលដល់នាទីទី៥៩ និងកីឡាករសំ មីនា ពាក់អាវលេខ២៣ ដែលជាមិត្តរួមក្រុមរកបាន១គ្រាប់នៅនាទីទី៦៥ ។
ដោយមិនចង់បាក់មុខ ខណៈក្រុមឆ្លាមសមុទ្ររកបានគ្រាប់បាល់នាំមុខលើក្រុមខ្លួននោះ ក្រុមអគ្គស្នងការដ្ឋាននគរបាលជាតិ ចាប់ផ្តើមលេងវាយបកវិញរហូតរកបានគ្រាប់បាល់៣គ្រាប់ចុងក្រោយ ដោយកីឡាករ OLADIJINELSON OLATUNDE ពាក់អាវលេខ២០ នៅនាទីទី៧៩ កីឡាករលី អារីហ្វីន ពាក់អាវលេខ៣ នៅនាទីទី៧៧ និងកីឡាករនួន បូរី ពាក់អាវលេខ១០ នៅនាទីទី៩០+៤ ។
ទោះបីយ៉ាងណា ក្រុមឆ្លាមសមុទ្រ គឺកីឡាករ AYODELE SILVASUNDAY ពាក់អាវលេខ៩ រកបានគ្រាប់បាល់ឱ្យក្រុមរបស់ខ្លួនបានចំនួន២គ្រាប់ទៀតនៅនាទីទី៧១ និង៧៥ ។ ក្រុមឆ្លាមសមុទ្រទោះបីឈ្នះនៅពេលនេះទើបតែរកបាន១១ពិន្ទុប៉ុណ្ណោះ ចំណែកក្រុមអគ្គស្នងការដ្ឋាននគរបាលជាតិ រកបាន៣៣ពិន្ទុ ៕
ចែករំលែកព័តមាននេះ