ពួកអ្នកជួយសង្គ្រោះរាយការណ៍កាលពីថ្ងៃទី៨សីហាថា ភ្លៀងធ្លាក់យ៉ាងខ្លាំងញ៉ាំងឱ្យមានទឹកជំនន់ធ្ងន់ធ្ងរបំផុតនៅក្រុងម៉ានីលរដ្ឋធានីហ្វ៊ីលីពីន បណ្តាលឱ្យមនុស្សជិត២លាននាក់រងគ្រោះរួចត្រូវការជំនួយស្បៀងនិងសម្ភារជាបន្ទាន់ខណៈពេលទឹកនឹងឡើងជោរជន់ជាថ្មីទៀត ។
ភ្លៀងដែលធ្លាក់ដូចហែកមេឃលើក្រុងម៉ានីលរវាងថ្ងៃទី៦ទៅទី៨សីហា ធ្វើឱ្យប៉ះពាល់ដោយផ្ទាល់ដល់មនុស្ស១,៩៥លាននាក់ក្នុងនោះ៣០០.០០០នាក់ត្រូវចាកចេញពីផ្ទះសម្បែងដែលទឹកជន់លិចទៅកាន់មជ្ឈមណ្ឌលសង្គ្រោះ ។ ទឹកចាប់ផ្តើមស្រកចុះក្នុងផ្នែកមួយធំនៃរដ្ឋធានីដែលជន់លិច៨០% ។ ខាងផ្នែកឧតុនិយមប្រកាសពីលទ្ធភាពដែលភ្លៀងអាចធ្លាក់ខ្លាំងទៀតនាប៉ុន្មានថ្ងៃខាងមុខនេះ ។
អាទិភាពនៃការជួយសង្គ្រោះពេលនេះផ្តោតលើការផ្តល់ទឹកស្អាត ស្បៀងអាហារ និងថ្នាំពេទ្យដោយឆាប់រហ័សបំផុត ។ មនុស្ស២០នាក់ស្លាប់ដោយសារទឹកជំនន់នៅក្រុងម៉ានីលនិងក្នុងខេត្តជុំវិញក្រុងនេះ ។ តួលេខនេះធ្វើឱ្យចំនួនជនរងគ្រោះដោយទឹកជំនន់នៅហ្វ៊ីលីពីនចាប់ពីដំណាច់ខែកក្កដាមកឡើងដល់៧៣នាក់ហើយ ៕
ចែករំលែកព័តមាននេះ