ខេត្តកណ្តាល៖ ក្មេងទំនើង២ក្រុមម្ខាងមានគ្នា៤នាក់ ម្ខាងទៀតមានគ្នា២នាក់ធ្លាប់មានគំនុំវាយតប់គ្នាពីពេលមុននោះពេលនេះជួបមុខគ្នា ហើយវាយតប់គ្នាម្តងទៀត ដើម្បីជម្រះបញ្ជីចាស់បង្កឱ្យមានការភ្ញាក់ផ្អើលតាមដងផ្លូវត្រូវប៉ូលិសស្រុកអង្គស្នួល និងប៉ូលិសប៉ុស្តិ៍បែកចានចុះទៅព័ទ្ធចាប់បានញាត់ចូលទ្រុងទាំងសងខាង ។
ហេតុការណ៍នោះបានកើតឡើងកាលពី វេលាម៉ោង៦និង២៥នាទីល្ងាចថ្ងៃទី៨ សីហា ២០១២ នៅតាមផ្លូវលំស្ថិតក្នុងភូមិបែកចាន ឃុំបែកចាន ស្រុកអង្គស្នួល ខេត្តកណ្តាល ។ ក្មេងទំនើងទាំងនោះត្រូវបានគេដឹងថា ក្រុមទី ១ មានគ្នា៤នាក់ដែលគេស្គាល់ថា ១-ឈ្មោះវង្ស ឆកា ភេទប្រុស អាយុ១៧ឆ្នាំ ២-ឈ្មោះគីម វាសនា ភេទប្រុស អាយុ១៧ឆ្នាំ អ្នកទាំង២ ជាកម្មកររោងចក្រ ស្នាក់នៅក្នុងភូមិអង្គស្នួលទី១ ឃុំពើក ស្រុកអង្គស្នួល ៣-ឈ្មោះផាត សុភ័ណ្ឌ ភេទប្រុស អាយុ១៧ឆ្នាំ ជាកម្មកររោងចក្រ និង៤-ឈ្មោះផល សុខា ភេទប្រុស អាយុ១៦ឆ្នាំ ជាអ្នកលក់ដូរ ពួកគេទាំង២នាក់មានទីលំនៅភូមិអង្គស្នួលទី២ ឃុំពើក។ ដោយឡែកក្មេងទំនើងក្រុមទី២ មានគ្នា២នាក់ដែលគេស្គាល់ថា ១-ឈ្មោះសាន់ វាសនា ភេទប្រុស អាយុ២១ឆ្នាំ និង២-ឈ្មោះចេង ហឿន ភេទប្រុស អាយុ១៨ឆ្នាំ អ្នកទាំង២នាក់នេះ ជាកម្មកររោងចក្រមានទីលំនៅភូមិព្រែកអំបិល ឃុំជម្ពូព្រឹក្ស ស្រុកឧដុង្គ ខេត្តកំពង់ស្ពឺ ។ ក្រោយពេលកើតហេតុប៉ូលិសបានចុះទៅធ្វើការឃាត់ខ្លួនបានទាំងសងខាង និងដកហូតបានដាវមួយដើមទៀតផង ។
ប៉ូលិសស្រុកអង្គស្នួល បានឱ្យដឹងថា ក្រុមក្មេងទំនើងទាំង២ក្រុមនេះធ្លាប់មានទំនាស់វាយតប់គ្នា កាលពីប៉ុន្មានថ្ងៃមុនដោយក្រុមក្មេងទំនើងដែលមានគ្នា៤នាក់ បានព្រួតគ្នាវាយទៅលើក្រុមក្មេងទំនើងដែលមានគ្នា២នាក់ ប៉ុន្តែមិនបណ្តាលឱ្យមាននរណាម្នាក់រងរបួសនោះទេ ព្រោះវាយដោយដៃទទេប៉ុណ្ណោះ បន្ទាប់មកពួកគេក៏បានបែកគ្នាអស់ទៅលើកនេះជាប់អន្ទាក់ប៉ូលិស ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ