រាជធានីភ្នំពេញ ៖ លោកឆោម ឆារី អតីតកីឡាករប្រដាល់សាកលជម្រើសជាតិដ៏ល្បីឈ្មោះនាទសវត្សទី៧០ មិនត្រឹមតែជាកីឡាករដែលធ្លាប់ដណ្តើមបានមេដាយប្រាក់ និងសំរឹទ្ធិនៅលើឆាកអន្តរជាតិនាពេលកន្លងមកនោះទេ ប៉ុន្តែនៅពេលក្លាយជាគ្រូបង្ហាត់ទៅហើយនោះ លោកត្រូវបានគេទទួលស្គាល់ថាជាគ្រូបង្ហាត់កីឡាករប្រដាល់សាកលជម្រើសជាតិដ៏ឆ្នើមដែលជួយឱ្យកីឡាករជម្រើសជាតិនាសម័យនេះដណ្តើមបានមេដាយប្រាក់ និងសំរឹទ្ធិយ៉ាងច្រើនពីព្រឹត្តិការណ៍កីឡាស៊ីហ្គេមនាពេលកន្លងមក ។ រហូតមកទល់ពេលនេះ លោកមានវ័យ៦១ឆ្នាំទៅហើយ ប៉ុន្តែកាយសម្បទារបស់លោកនៅរឹងប៉ឹងមិនចាញ់មនុស្សវ័យកណ្តាលប៉ុន្មានឡើយ ។
ពេលជួបសម្ភាសជាមួយអ្នកយកព័ត៌មានកោះសន្តិភាព លោកគ្រូឆោម ឆារី បានប្រាប់ពីប្រវត្តិរបស់ខ្លួនជូនប្រិយមិត្តអ្នកអានកាសែតកោះសន្តិភាព ឱ្យដឹងថា លោកបានចូលហ្វឹកហាត់កីឡាប្រដាល់សាលកនៅឆ្នាំ១៩៦៩ ប៉ុន្តែដោយសារតែភាពវៃឆ្លាត និងភាពអំណត់អត់ធន់ប្រឹងប្រែងហ្វឹកហាត់មិនយូរប៉ុន្មានបានតែ១ឆ្នាំប៉ុណ្ណោះ គឺនៅឆ្នាំ១៩៧០ លោកត្រូវបានគេជ្រើសរើសចូលក្រុមកីឡាករប្រដាល់ជម្រើសជាតិតែម្តង ដែលកាលនោះលោករស់នៅក្នុងសង្កាត់លេខ២ ក្រុងភ្នំពេញ ។ ក្រោយពីលោកបានក្លាយជាកីឡាករជម្រើសជាតិភ្លាម គឺនៅឆ្នាំ១៩៧០ លោកត្រូវបានគេបញ្ជូនឱ្យទៅប្រកួតកីឡាស៊ីហ្គេមនៅទីក្រុងបាងកកប្រទេសថៃដោយទទួលបានចំណាត់ថ្នាក់លេខ៣ មេដាយសំរឹទ្ធិ ។ ក្រោយមកទៀតនៅឆ្នាំ១៩៧២ លោកបានទៅចូលរួមប្រកួតកីឡាស៊ីហ្គេមនៅប្រទេសម៉ាឡេស៊ី ដោយទទួលបានមេដាយសំរឹទ្ធិទៀត ។
ប៉ុន្តែអ្វីដែលអស្ចារ្យសម្រាប់ជីវិតរបស់លោកនៅក្នុងវិស័យកីឡាប្រដាល់នោះ គឺនៅក្នុងឆ្នាំ១៩៧៤ លោកត្រូវបានបញ្ជូនឱ្យទៅចូលរួមប្រកួតនៅក្នុងព្រឹត្តិការណ៍កីឡា ASIAN GAME កម្រិតអាស៊ីនៅប្រទេសសិង្ហបុរី ដែលពេលនោះលោកទទួលបានជ័យជម្នះយ៉ាងត្រចះត្រចង់ដោយឈ្នះមេដាយប្រាក់។ បានជាលោកថា អស្ចារ្យ ដោយសារពីមុនរាល់ព្រឹត្តិការណ៍នៃការប្រកួតគឺមិនងាយទទួលបានមេដាយឡើយ ទម្រាំបានមេដាយត្រូវឆ្លងកាត់ការប្រកួតជម្រុះជាច្រើនវគ្គ ទោះមេដាយសំរឹទ្ធិ ក៏ពិបាកដណ្តើមបានដែរ កុំថាឡើយដល់មេដាយប្រាក់ និងមាសនោះ ។
ពាក់ព័ន្ធនឹងជីវិតគូស្រករវិញ លោកគ្រូឆោម ឆារី បានប្រាប់ថា នៅពេលលោកវិលត្រឡប់ពីការប្រកួតកីឡា ASIAN GAME វិញ គឺនៅក្នុងឆ្នាំ១៩៧៤ លោកមិនបានចាំថ្ងៃខែនោះទេ លោកបានរៀបអាពាហ៍ពិពាហ៍ជាមួយភរិយារបស់លោកឈ្មោះមាស សូដាណែត ដែលជាអតីតកីឡាការិនីបាល់ទះជម្រើសជាតិម្នាក់ ។ ប៉ុន្តែការរួមរស់ជាមួយគ្នាប្រកបដោយសុភមង្គលរវាងរូបលោក និងភរិយាជាទីស្រឡាញ់ គឺបានតែមួយឆ្នាំប៉ុណ្ណោះ ក៏ត្រូវពួកខ្មែរក្រហមជំលៀសឱ្យទៅរស់នៅក្នុងស្រុកកំពង់ថ្ម ខេត្តកំពង់ធំ ។ នៅទីនោះទោះបីពួកខ្មែរក្រហមបង្ខំឱ្យលោកធ្វើការស្ទើររកពេលសម្រាកគ្មាន តែលោកនៅតែឆ្លៀតពេលលួចហ្វឹកហាត់ខ្លះៗដែរ ព្រោះលោកគិតថា គ្មានប្រទេសណាមួយនៅលើពិភពលោកដែលមិនមានកីឡានោះទេ ប៉ុន្តែទីបំផុតការលួចហ្វឹកហាត់របស់លោកត្រូវបានហាមឃាត់ ។
ទោះបីបែបណា ចាត់ទុកថាសំណាងល្អដែរសម្រាប់ក្រុមគ្រួសារលោកដែលរស់នៅក្នុងរបប៣ឆ្នាំ៨ខែ ២០ថ្ងៃ ដែលមិនត្រូវបានពួកប៉ុល ពត សម្លាប់ គ្រាន់តែរស់នៅក្នុងក្តីភិតភ័យរហូតមិនដឹងថ្ងៃណាត្រូវគេយកទៅសម្លាប់ ។ នៅពេលប្រទេសកម្ពុជាត្រូវបានរំដោះពីរបបយង់ឃ្នងនៅក្នុងឆ្នាំ១៩៧៩ ភរិយារបស់លោកប្រសូតបានកូនស្រីច្បងម្នាក់ ប៉ុន្តែជាអកុសលកូនស្រីច្បងនោះបានស្លាប់ដោយជំងឺនៅពេលដែលនាងមានអាយុ១៧ឆ្នាំ ។ បច្ចុប្បន្នលោកមានកូនចំនួន៧នាក់ក្នុងនោះ ស្រី៣នាក់ ហើយកូនលោក៣នាក់ពេលនេះកំពុងរស់នៅក្នុងប្រទេសអូស្ត្រាលី ខណៈរូបលោក និងក្រុមគ្រួសាររស់នៅក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
លោកគ្រូឆោម ឆារី បានបញ្ជាក់ជាចុងក្រោយថា អ្វីដែលជាមោទនភាពសម្រាប់រូបលោកនោះគឺលោកបានជួយបង្វឹកកីឡាករប្រដាល់សាកលជម្រើសជាតិកម្ពុជាឱ្យដណ្តើមបានមេដាយប្រាក់ និងសំរឹទ្ធិយ៉ាងច្រើនពីការប្រកួតកីឡាស៊ីហ្គេមនៅប្រទេសហ្វ៊ីលីពីន ឡាវ និងឥណ្ឌូណេស៊ីជាដើម ដែលជាការលើកស្ទួយដល់វិស័យកីឡាប្រដាល់នៅក្នុងក្របខ័ណ្ឌជាតិ និងអន្តរជាតិផងដែរ ៕
ចែករំលែកព័តមាននេះ