ខេត្តព្រះសីហនុ ៖ ឆ្លើយតបទៅនឹងសេចក្តីជូនដំណឹងរបស់ទីស្តីការគណៈរដ្ឋមន្ត្រីលេខ៨៥១ ចុះថ្ងៃទី៧ សីហា ២០១២ នៅវេលាម៉ោង៨ព្រឹកថ្ងៃទី៩ សីហា ២០១២ មន្ត្រីនគរបាលទូទាំងខេត្តព្រះសីហនុ មន្ត្រីសាលាខេត្តក៏ដូចជាស្ថាប័នមួយចំនួនបានចូលរួមតាមដានស្តាប់ការបកស្រាយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីស្តីពីការបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្ររវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមក្នុងកិច្ចប្រជុំពេញអង្គរដ្ឋសភានាថ្ងៃទី៩ សីហា ២០១២ ។
ឆ្លងតាមប្រសាសន៍ដ៏មានអត្ថន័យរយៈពេល៤ម៉ោងកងកម្លាំងសមត្ថកិច្ចប៉ូលិសទាំងអស់ រួមទាំងមន្ត្រីរាជការអ្នកលក់ដូរនៅតាមទីផ្សារនានាអ្នករត់ម៉ូតូឌុបបានយល់ច្បាស់អំពីទឹកចិត្តភក្តីភាពរបស់សម្តេច និងយល់កាន់តែច្បាស់នូវខ្សែបន្ទាត់ព្រំដែនទាំងដែនគោក និងដែនសមុទ្ររវាងប្រទេសវៀតណាម និងកម្ពុជា។
ទាក់ទិនទៅនឹងការបកស្រាយរបស់សម្តេច ហ៊ុន សែន នាពេលនេះលោកពូ និត្យ អាយុ៣៧ឆ្នាំ ជាអ្នកទិញ-លក់ម៉ូតូនៅផ្សារលើក្រុងព្រះសីហនុ បានបង្ហាញទស្សនៈផ្ទាល់ខ្លួនថា អ្វីដែលសម្តេចបានលើកឡើងនេះរូបលោកដែលជាប្រជាពលរដ្ឋខ្មែរម្នាក់ សូមធ្វើការគាំទ្រយ៉ាងពេញទំហឹង ព្រោះលោកយល់ថា សម្តេចហ៊ុន សែន គឺជាមនុស្សអច្ឆរិយក្នុងការដឹកនាំនាវាសន្តិភាពជូនជាតិ មាតុភូមិកម្ពុជា ក៏ដូចជាប្រជាពលរដ្ឋខ្មែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ