ខេត្តកោះកុង ៖ បន្ទាប់ពីកោះសន្តិភាពបានចុះផ្សាយអំពីស្ថានភាពជំងឺដុនដាបរងាញាក់ញ័រ រាករូស និងរាងកាយស្លេកស្លាំងងើបមិនរួចរបស់ក្មេងស្រីឈ្មោះសួន សំណាង អាយុ១៦ឆ្នាំ ដោយសារឪពុកចិញ្ចឹមផ្ទុកមេរោគអេដស៍ចាប់រំលោភ រួចនាំនាងទៅបោះបង់ចោលនៅក្នុងមន្ទីរពេទ្យខេត្តកោះកុងរួចមក មានសប្បុរសជនជាច្រើនដែលមានក្តីអាណិតអាសូរបានបរិច្ចាគធនធានធ្វើទានដល់នាង។ ទីចាត់ការកោះសន្តិភាពបានទទួលពីបុគ្គលិកក្រុមហ៊ុន LCH Development Co, Ltd ជាទឹកប្រាក់២ម៉ឺនរៀល និងប្រាក់អាមេរិក១៥ដុល្លារ រួមទាំងចំណីបំប៉នមាន ទឹកដោះគោឆៅ១ឡូ, ចាហួយមានរសជាតិគូលែន ១ប្រអប់, ចាហួយមានរសជាតិត្រាវ ១ប្រអប់, ដំឡូងបារាំងមានរសជាតិសាច់អាំង ១ប្រអប់, នំធុងមានគ្រប់រសជាតិ ១ធុង, នំបង្គាកំប៉ុង ១កំប៉ុង, នំរសជាតិឈ្ងុយឆ្ងាញ់ ១ប្រអប់ និងស្ករគ្រាប់មានរសជាតិចំរុះ ១ថង់។
ដោយឡែកនៅខេត្តកោះកុងមន្ត្រីសុខាភិបាលខេត្តឧបត្ថម្ភមី១កេស, ទឹកដោះគោខាប់ ៦កំប៉ុង, ត្រីខកំប៉ុង ១ឡូ។ លោកទៅ ម៉ឹង នាយករងមន្ទីរសុខាភិបាល ឧបត្ថម្ភ១០ដុល្លារ, លោកឡេង វ៉េងសែ នាយករងមន្ទីរសុខាភិបាល ១០ដុល្លារ, លោកម៉ក់ គឹមលី នាយករងមន្ទីរសុខាភិបាល ១០ដុល្លារ, អ្នកស្រី ថាច់ វណ្ណា មន្ត្រីមន្ទីរសុខាភិបាល ៤ម៉ឺនរៀល, អ្នកស្រី មុំ ហួរ លក់កាហ្វេ នំបញ្ចុក ៥ម៉ឺនរៀល, លោកឈួង សម្បត្តិ នាយទាហានយោធភូមិភាគទី៣ ចំនួន៥ម៉ឺនរៀល, លោកវរសេនីយ៍ឯក ស៊ិន សេន ស្នងការរងខេត្តឧបត្ថម្ភសារុង២។
លោកឈួន ហួរ នាយកមន្ទីរសុខាភិបាលខេត្តអះអាងថា ពេលនេះកុមារីរងគ្រោះមានសភាពធូរស្បើយបន្តិចហើយ គឺអាចអង្គុយលើរទេះរុញបាន និងលែងមានសភាពក្តៅរងាញាក់ញ័រដូចពេលមុន ប៉ុន្តែនៅមានការរាករូសមិនទាន់ជាសះស្បើយទេ។ ពេលនេះគ្រូពេទ្យកំពុងតាមដានស្ថានភាពជំងឺរបស់នាងយ៉ាងយកចិត្តទុកដាក់។ សមត្ថកិច្ចព្រហ្មទណ្ឌខេត្តកំពុងតាមរកចាប់ខ្លួនឪពុកចិញ្ចឹមជាប់ចោទចាត់ការតាមច្បាប់៕
ចែករំលែកព័តមាននេះ