ខេត្តកណ្តាល ៖ បុរសម្នាក់ត្រូវសមត្ថកិច្ចនគរបាលប៉ុស្តិ៍សំរោងធំ សហការជាមួយនគរបាលស្រុកកៀនស្វាយ ចាប់ឃាត់ខ្លួនកាលពីល្ងាចថ្ងៃទី៧ សីហា ២០១២ នៅចំណុចភូមិ ព្រែកតាកែវ ឃុំសំរោងធំ ស្រុកកៀនស្វាយ ដោយយោងទៅលើពាក្យបណ្តឹងរបស់ម្តាយកុមារីម្នាក់ដែលប្តឹងចោទប្រកាន់ថា បានធ្វើសកម្មភាពប្រទូស្តកេរ្តិ៍ខ្មាស់លើកូនស្រីរបស់ខ្លួន។
បុរសត្រូវចាប់ខ្លួនខាងលើនេះឈ្មោះហួយ ឧត្តម អាយុ៥៣ឆ្នាំ មានទីលំនៅក្នុងភូមិ-ឃុំខាងលើ ជាជាងប៉ះកង់ ។ ចំណែកកុមារីដែលម្តាយប្តឹងចោទប្រកាន់ថា ឈ្មោះហួយ ឧត្តម បានធ្វើសកម្មភាពប្រទូស្តកេរ្តិ៍ខ្មាស់នោះឈ្មោះ ស.ស.ភ មានទីលំនៅក្នុងភូមិជាមួយគ្នា។ នៅចំពោះមុខសមត្ថកិច្ចឈ្មោះហួយ ឧត្តម បានសារភាពថា ខ្លួនមិនមានចេតនាធ្វើសកម្មភាពប្រទូស្តកេរ្តិ៍ខ្មាស់លើកុមារីខាងលើទេ ។ សូមឱ្យលោកប៉ូលិសមេត្តាជួយរកយុត្តិធម៌ជូនខ្លួនផង ។ ទោះបី ជាយ៉ាងណាក្តីសមត្ថកិច្ចនៅតែបន្តបញ្ជូនឈ្មោះហួយ ឧត្តម ទៅស្នងការនគរបាលខេត្តកណ្តាល ដើម្បីចាត់ការតាមច្បាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ