យោងតាមស្រ្តីអ្នកនាំពាក្យគណៈកម្មាធិការរៀបចំការប្រកួតអូឡាំពិកទីក្រុង(LOCOG)បានឱ្យដឹងកាលពីថ្ងៃពុធទី៨សីហាថា ប៉ូលិសបានជូនដំណឹងថា មានអត្តពលិកជាតិកាមេរូន៧នាក់បានបាត់ខ្លួនខណៈការប្រកួតកំពុងដំណើរការ។ ទោះជាយ៉ាងណា ទិដ្ឋាការរបស់ពួកគេទាំងនោះនៅមិនទាន់ផុតកំណត់ទេ ។
ស្ត្រីអ្នកនាំពាក្យឈ្មោះ Jackie Brock-Doyleបានថ្លែងថា ក្រុមកាមេរូនបានជូនព័ត៌មានទៅ LOCOGថា អត្តពលិករបស់ខ្លួនបានចាកចេញពីភូមិគ្រឹះកីឡានៅ Olympic Park និងព្រមទាំងបានសុំជំនួយក្នុងការតាមរកពួកគេ ។នាង Brock-Doyleបានថ្លែងថា៖«ពួកគេមានភារកិច្ចត្រូវតែរាយការណ៍ក្នុងខណៈមានការបាត់ខ្លួនសមាជិកក្រុមរបស់ខ្លួន ប៉ុន្តែអ្នកបាត់ខ្លួនទាំងនោះមានទិដ្ឋាការអាចស្នាក់នៅក្នុងប្រទេសអង់គ្លេសរហូតដល់ខែវិច្ឆិកា ។ ដូច្នេះស្ថិតក្នុងពេលនេះ អត្តពលិកទាំង៧នាក់នោះគ្មានទោស កំហុសអ្វីឡើយ »។
យោងតាមសារព័ត៌មានរដ្ឋប្រចាំថ្ងៃ Cameroon Tribuneបានរាយការណ៍ថា ក្រុមអត្តពលិកដែលបាត់ខ្លួនទាំង៧នាក់នោះរួមមាន អត្តពលិកវិញ្ញាសាប្រដាល់៥នាក់ ហែលទឹកម្នាក់និងបាល់ទាត់ស្រ្តីម្នាក់ ។លោក David Ojong ប្រធានគណៈប្រតិភូអូឡាំពិកកាមេរូនត្រូវបានដកស្រង់សំដីដែលបាននិយាយថា អត្តពលិកទាំង៧នាក់ក្នុងចំណោមគណៈប្រតិភូដែលមានសមាជិក២៨នាក់សុទ្ធតែបានបរាជ័យក្នុងការប្រកួតទាំងអស់។
សមាជិកម្នាក់របស់សហព័ន្ធបាល់ទាត់កាមេរូនបានរិះគន់លើមិត្តរួមក្រុមថា បានព្យាយាមនិងកំពុងតែប្រើប្រាស់ក្លិបកីឡារបស់ខ្លួនជាច្រកផ្លូវរត់គេចទៅក្រៅប្រទេស ។ប៉ុន្តែលោក Junior Benyamប្រធានទីផ្សារសហព័ន្ធបាល់ទាត់កាមេរូនបានថ្លែងថា រាល់អត្តពលិកសុទ្ធតែមានសិទ្ធិស្វែងរកសុបិនរបស់ខ្លួន ។ ពួកគេមានសិទ្ធិធ្វើអ្វីគ្រប់យ៉ាងដើម្បីសម្រេចបានគោលដៅក្នុងសុបិនខ្លួន តែចំណុចមួួយពួកគេគួរតែយល់នោះគឺថា មិនត្រូវប្រើប្រាស់ថវិកា របស់រដ្ឋាភិបាលធ្វើរឿងដូចជារឿងនេះទេ ។ លោកបានហៅការបាត់ខ្លួនរបស់អត្តពលិកទាំង៧នាក់ថាជាការរំលោភជាក់ស្តែងមួយលើច្បាប់គ្រប់គ្រងកិច្ចដំណើរការរបស់ក្រុមជម្រើសជាតិ។
ចំណែកលោក Herve Emmanuel Nkomសអតីតអ្នកដឹកនាំក្រុមបាល់ទាត់កាមេរូន Dynamo de Douala បច្ចុប្បន្នជាអ្នកនយោបាយបានថ្លែងថា ឧប្បត្តិហេតុលើកនេះបានចង្អុលបង្ហាញឱ្យឃើញពីបញ្ហាដ៏ធំមួយក្នុងស្ថាប័នកីឡាកាមេរូន ។ លោកបន្តថា ៖«វិស័យកីឡារបស់កាមេរូនពេលនេះធ្លាក់ខ្លួនឈឺហើយ ។ ខ្ញុំមិនសប្បាយចិត្តទេ ប៉ុន្តែខ្ញុំយល់។ អត្តពលិកវ័យក្មេងទាំងនេះចង់ឃើញកីឡារបស់ខ្លួនរីកចម្រើនគ្រប់ទិសទី »។ដោយឡែករដ្ឋមន្ត្រីក្រសួងកីឡាកាមេរូនបដិសេធមិនធ្វើអត្ថាធិប្បាយ ៕
ចែករំលែកព័តមាននេះ