រាជធានីភ្នំពេញ ៖ ក្រុមហ៊ុនស៊ុនស៊ីម៉ិចកូ គឺជាក្រុមហ៊ុនឈានមុខគេមួយខាងផ្នែកគ្រឿងអេឡិចត្រូនិច និងគ្រឿងសង្ហារិមប្រចាំនៅក្នុងព្រះរាជាណាចក្រកម្ពុជា នាថ្ងៃទី៨ សីហា ក្រុមហ៊ុនបានរៀបចំប្រកាសបើកសម្ពោធជាផ្លូវការសាខាលក់រាយ (សាខាទី១០) ដែលមានទីតាំងតាមបណ្តោយមហាវិថីម៉ៅសេទុង ក្នុងរាជធានីភ្នំពេញ ។ សាខាលក់រាយថ្មីមួយនេះមានទំហំ៣.២០០ម៉ែត្រការ៉េ ដែលវាមិនគ្រាន់តែជាហាងលក់រាយរបស់ក្រុមហ៊ុនស៊ុនស៊ីម៉ិចកូដែលធំបំផុតប៉ុណ្ណោះទេ ប្រហែលជាហាងលក់រាយខាងផ្នែកអេឡិចត្រូនិច និងគ្រឿងសង្ហារិមដែលធំជាងគេបង្អស់នៅក្នុងប្រទេសកម្ពុជាផងដែរ ។
នៅក្នុងពិធីសម្ពោធនេះ មានការអញ្ជើញចូលរួមជាអធិបតីពីលោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា និងលោកជំទាវ ។ ក្នុងឱកាសនោះក៏មានការចូលរួមជាភ្ញៀវកិត្តិយសជាច្រើនរូបដូចជា អ្នកឧកញ៉ា ដួង ឈីវ ព្រមទាំងអ្នកជំនួញដែលជោគជ័យជាច្រើននាក់ទៀតក្នុងប្រទេសកម្ពុជា ក៏មានវត្តមានក្នុងពិធីនោះផងដែរ ។
អគ្គនាយកក្រុមហ៊ុនលោកហោ ម៉េន បានមានប្រសាសន៍ថា «ជាច្រើនឆ្នាំមកហើយដែលស៊ុនស៊ីម៉ិចកូ ចាប់ផ្តើមវិវឌ្ឍពីហាងលក់រាយគ្រឿងអគ្គិសនី និងគ្រឿងអេឡិចត្រូនិចធម្មតាមួយរហូតពង្រីកខ្លួនក្លាយទៅជាក្រុមហ៊ុនធំដែលមានច្រើនសាខាសម្រាប់បម្រើសេវាកម្មជូនដល់អតិថិជន ។ ជាមួយនឹងការបើកបន្ថែមនូវសាខាលក់រាយដ៏ធំមួយនេះនឹងធ្វើឱ្យយើងក្លាយទៅជាក្រុមហ៊ុនដែលលក់រាយធំជាងគេបង្អស់នៅក្នុងព្រះរាជាណាចក្រកម្ពុជា ។ ក្នុងប្រទេសកម្ពុជាយើង រាជធានីភ្នំពេញ គឺជាទីក្រុងដ៏សំខាន់មួយរបស់យើង ហើយក៏ជាទីកន្លែងគោលដៅរបស់យើងសម្រាប់ក្លាយខ្លួនទៅជាហាងលក់រាយដែលជាទីចាប់អារម្មណ៍របស់អតិថិជនទាំងអស់ដែលរស់នៅក្នុងរាជធានីនេះផងដែរ» ។
លោកហោ ម៉េង បានមានប្រសាសន៍រំលឹកឡើងវិញពីគន្លឹះនៃភាពជោគជ័យកន្លងមករបស់ក្រុមហ៊ុនសុ៊ុនស៊ីម៉ិចកូ នៅក្នុងប្រទេសកម្ពុជាផងដែរថា «ភាពជោគជ័យកន្លងមករបស់ក្រុមហ៊ុនស៊ុនស៊ីម៉ិចកូ បានកសាងឡើងដោយសារការស្តាប់ និងយកចិត្តទុកដាក់ ព្រមទាំងឆ្លើយតបចំពោះសេចក្តីត្រូវការរបស់អតិថិជន ។ សាខាលក់រាយដ៏ធំរបស់ក្រុមហ៊ុនស៊ុនស៊ីម៉ិចកូ ដែលបានកើតឡើងមកនេះក៏ដោយសារតែយើងបានផ្តោតសំខាន់ទៅលើតម្រូវការរបស់អតិថិជនដែលមានក្នុងរាជធានីភ្នំពេញ ដែលជាតំបន់មួយយើងយកចិត្តទុកដាក់បំផុតក្នុងអំឡុងពេលពីរឆ្នាំមកនេះ ពីព្រោះយើងជឿជាក់ថា ភ្នំពេញពិតជាទីផ្សារដែលមានសក្តានុពលបំផុត» ។
ការចាប់ផ្តើមអនុវត្តនូវគំនិតក្នុងការបើកសាខាលក់រាយដ៏ធំមួយនេះនៅក្នុងរាជធានីភ្នំពេញ គឺបានឆ្លុះបញ្ចាំងឱ្យឃើញនូវការបន្តរីកចម្រើនជាលំដាប់របស់ទីផ្សារប្រទេសកម្ពុជា ដែលទន្ទឹមនឹងនេះអ្នកទិញកាន់តែមានចំនួនច្រើនឡើងៗហើយជាធម្មតាម្នាក់ៗមានភាពសាំុទៅនឹងការរកទិញសម្ភារប្រើប្រាស់នៅក្នុងបរិយាកាសរបស់ហាងមួយដែលមានអ្វីៗគ្រប់យ៉ាងតាមតម្រូវការរបស់ខ្លួន ។ជាមួយនឹងកំណើននៃតម្រូវការទាំងអស់នេះ យើងឃើញថា ក្រុមហ៊ុនស៊ុនស៊ីម៉ិចកូ បានចាប់ផ្តើមប្រតិបត្តិការនូវយុទ្ធសាស្ត្រពង្រីកសាខាបន្ថែមរបស់ខ្លួននៅក្នុងរាជធានីភ្នំពេញ ក៏ដូចជានាំចូលបន្ថែមទៀតនូវផលិតផលរបស់ខ្លួនឱ្យមានកាន់តែច្រើនមុខ ក្នុងនោះមិនត្រឹមតែមាននូវផលិតផលអេឡិចត្រូនិចដែលមានស្លាកសញ្ញាល្បីប៉ុណ្ណោះទេ ថែមទាំងមានបណ្តាគ្រឿងសង្ហារិមសម្រាប់តុបតែងលម្អគេហដ្ឋានដែលមានគុណភាពខ្ពស់នាំចូលមកពីប្រទេសអីុតាលីមានម៉ាកល្បីៗដូចជា Novena Furniture, Casttila Furniture, the White Furniture Company ។ ល ។ និង ។ ល ។
លោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម បានថ្លែងថា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសជាតិមានការរីកចម្រើនលើគ្រប់វិស័យទាំងអស់ ជីវភាពប្រជាពលរដ្ឋធូរធារមានលទ្ធភាពទិញសម្ភារទំនើបៗប្រើប្រាស់ ហើយក្រុមហ៊ុនថ្មីៗត្រូវបានបង្កើតឡើងជាបន្តបន្ទាប់ និងមានការរីកចម្រើនផងដែរ ដើម្បី បំពេញតម្រូវការរបស់អតិថិជន ។ លោកសូមឱ្យក្រុមហ៊ុនស៊ុនស៊ីម៉ិចកូ បន្តភាពរីកចម្រើនបន្ថែមទៀតដើម្បីចូលរួមអភិវឌ្ឍន៍ប្រទេសជាតិ ៕
ចែករំលែកព័តមាននេះ