រាជធានីភ្នំពេញ ៖ ទីស្តីការគណៈរដ្ឋមន្ត្រីកាលពីថ្ងៃទី៧ សីហា បានផ្សព្វផ្សាយដល់ក្រសួង ស្ថាប័ន និងអភិបាលរាជធានី ខេត្តទូទាំងប្រទេសតាមដានព័ត៌មាននៅថ្ងៃទី៩ សីហា នេះចាប់ពីម៉ោង៨ព្រឹកនៅរដ្ឋសភា ដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងថ្លែងបកស្រាយអំពីការងារបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្ររវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ដែលជាបញ្ហាមានសារសំខាន់សម្រាប់អាយុជីវិតរបស់ជាតិទាំងមូល ។
រាជរដ្ឋាភិបាលបានសម្រេចអនុញ្ញាតជូនមន្ត្រីរាជការគ្រប់ក្រសួង ស្ថាប័ន អាជ្ញាធរដែនដីទាំងអស់ កងកម្លាំងប្រដាប់អាវុធគ្រប់ប្រភេទនៅទូទាំងប្រទេសបានជួបជុំគ្នាតាមក្រសួង ស្ថាប័ន ទីកន្លែងធ្វើការរៀងៗខ្លួន ដើម្បីតាមដានការផ្សាយបន្តផ្ទាល់តាមវិទ្យុ និងទូរទស្សន៍នូវការបកស្រាយខាងលើនេះ ។ ក្នុងលិខិតណែនាំនេះដែរ បានឱ្យកងកម្លាំងប្រដាប់អាវុធគ្រប់ប្រភេទ លើកលែងតែកងកម្លាំងដែលជាប់បំពេញកិច្ចប្រតិបត្តិការការពារទឹកដី សន្តិសុខ និងសណ្តាប់ធ្នាប់សង្គមនោះ ក៏ត្រូវបានអនុញ្ញាតឱ្យតាមដានព្រឹត្តិការណ៍នេះដូចគ្នាដែរ ។ ចំពោះយុវជនស្ម័គ្រចិត្តសម្តេចតេជោ ដែលកំពុងបំពេញការងារតាមខេត្តនានានោះក្រុមងារងារត្រូវសម្រួលឱ្យទៅប្រមូលផ្តុំនៅទីកន្លែងដែលអាចធ្វើការតាមដាននេះបាន ។ ចំណែកស្ថាប័នណា និងទីកន្លែងណា ដែលមានលទ្ធភាពនោះ ត្រូវថតចម្លងការបកស្រាយនេះទុកជាឯកសារទៅថ្ងៃក្រោយ ។
ថ្លែងនៅក្នុងពិធីបើកសម្ពោធផ្លូវជាតិលេខ៦២ សម្តេចតេជោ ហ៊ុន សែន មានប្រសាសន៍ថា ដើម្បីឱ្យនិស្សិតបានជ្រួតជ្រាបអំពីបញ្ហាព្រំដែនព្រះរាជាណាចក្រកម្ពុជាជាមួយប្រទេសជិតខាង សម្តេចតេជោនាយករដ្ឋមន្ត្រីអនុញ្ញាតឱ្យនិស្សិតយុវជនស្ម័គ្រចិត្តដែលត្រូវទៅមូលដ្ឋានវាស់ដីធ្លីជូនប្រជាពលរដ្ឋត្រូវផ្អាកការចេញដំណើរនៅថ្ងៃទី៩ ខែសីហា ចាំថ្ងៃទី១០ សីហា ទើបចេញដំណើរទៅ ។សម្តេចបានបញ្ជាក់ថា សម្រាប់និស្សិតដែលកំពុងវាស់ដីនៅតាមខេត្តទាំងអស់ នៅព្រឹកថ្ងៃទី៩ ខែសីហា មិនចាំបាច់ឱ្យចុះធ្វើការវាស់វែងទេ ប្រមូលក្មួយៗទាំងអស់ទៅកាន់តំបន់ដែលមានទូរទស្សន៍ ព្រោះថ្ងៃទី៩ សីហា នេះវិទ្យុ និងទូរទស្សន៍ធ្វើការផ្សាយទាំងអស់ កន្លែងណាគ្មានទូរទស្សន៍ ស្តាប់វិទ្យុ មន្ត្រីរាជការ កងកម្លាំងប្រដាប់អាវុធទាំងអស់ត្រូវទៅធ្វើការ ប៉ុន្តែធ្វើការនោះត្រូវអង្គុយស្តាប់ ។
សម្តេចមានប្រសាសន៍ថា នៅថ្ងៃទី៩ សីហា គឺត្រូវនិយាយឱ្យអស់អំពីបញ្ហាព្រំដែនដែលជាឯកសារប្រវត្តិសាស្ត្រ ។ ថ្ងៃនេះខ្ញុំនឹងនិយាយ ។គេវ៉ៃ ហ៊ុន សែន មិនសំខាន់ទេ ប៉ុន្តែ គេវ៉ៃដល់សម្តេចព្រះនរោត្តម សីហនុ ព្រោះអ្វីៗដែលហ៊ុន សែន ធ្វើគ្រាន់តែជាអ្វីដែលសម្តេចព្រះនរោត្តម សីហនុ បន្សល់ទុកប៉ុណ្ណោះ ទាំងបញ្ហាព្រំដែនសមុទ្រ ទាំងបញ្ហាព្រំដែនគោក ។ អុីចឹងគោលដៅដែលគេវាយហ៊ុន សែន តែទិសដៅគេវាយសម្តេចព្រះនរោត្តម សីហនុ ដើម្បីការពារភាពត្រឹមត្រូវរបស់គេនៃការធ្វើរដ្ឋប្រហារទម្លាក់សម្តេចព្រះនរោត្តម សីហនុ នៅឆ្នាំ១៩៧០ រហូតដល់គេចាក់បទចម្រៀងទៀត។ ចម្រៀងអាក្រក់ៗណាស់ ដូច្នេះព្រួញមួយបាញ់បានសត្វដល់ទៅ២ ព្រួញមួយបាញ់រាជរដ្ឋាភិបាល និងព្រួញមួយបាញ់រាជបល្ល័ង្ក ដូច្នេះយើងត្រូវជម្រះបញ្ជីនៅក្នុងរដ្ឋសភា។
នៅពេលដែលខ្ញុំបកស្រាយរឿងបញ្ហាព្រំដែនកម្ពុជា និងប្រទេសជិតខាង ឥឡូវលើកនេះបើអស់លោកដើរចេញ អស់លោកធ្វើតាមរបៀបពីរយ៉ាងដូចតទៅ ទី១-យកកន្សែងដៃបិទភ្នែកឱ្យជិតកុំឱ្យឃើញអ្វីទាំងអស់ ទី២-យកសំឡីញ៉ុកត្រចៀកឱ្យជិតដល់ផ្ទះចាំយកចេញ ព្រោះលោកក៏មិនចង់ស្តាប់ ហើយក៏មិនចង់ឃើញ ៕
ចែករំលែកព័តមាននេះ