ខេត្តកំពង់ឆ្នាំង ៖ កាលពីព្រឹកថ្ងៃទី២ សីហា កន្លងមក លោក អ៊ូ ជួបកុសល ប្រធានមន្ទីរសេដ្ឋកិច្ច និងហិរញ្ញវត្ថុខេត្ត រួមជាមួយនឹងលោក វ៉ាន់ សុធី អនុប្រធានមន្ទីរធម្មការ និងសាសនាខេត្ត បានដឹកនាំមន្ត្រីក្រោមឱវាទទៅសួរសុខទុក្ខ និងនាំយកអំណោយជាគ្រឿងឧបភោគបរិភោគ ថវិកាទៅចែកជូនដល់ក្រុមយុវជនស្ម័គ្រចិត្តសហការជាមួយមន្ត្រីជំនាញចំនួន២ក្រុមដែលកំពុងចុះធ្វើការវាស់វែងដីធ្លីជូនប្រជាពលរដ្ឋក្នុងឃុំក្រាំងលាវ ស្រុករលាប្អៀរ ដែលការជួបជុំប្រគល់អំណោយនេះធ្វើឡើងនៅក្នុងវត្តអណ្តូងព្រេង ក្នុងឃុំក្រាំងលាវ ។
លោក អ៊ូ ជួបកុសល បានមានប្រសាសន៍ទៅកាន់ក្រុមយុវជនស្ម័គ្រចិត្ត និងមន្ត្រីជំនាញថា ថ្ងៃនេះរូបលោក និងលោក វ៉ាន់ សុធី អនុប្រធានមន្ទីរធម្មការ និងសាសនាខេត្ត បានសហការគ្នានាំយកអំណោយជាស្បៀង និងថវិកាផ្ទាល់មកចែកជូនដល់ក្រុមយុវជនស្ម័គ្រចិត្តដែលកំពុងឈរជើងសហការជាមួយមន្ត្រីជំនាញ វាស់វែងដីធ្លីជូនប្រជាពលរដ្ឋនៅទីនេះ ។ អំណោយទាំងនេះគឺជាការជួយផ្លាស់វេនគ្នាជាមួយអង្គភាពមន្ទីរជុំវិញខេត្តក្នុងការយកមកផ្តល់ជូនដល់ក្រុមយុវជនស្ម័គ្រចិត្ត និងមន្ត្រីជំនាញដែលកំពុងឈរជើងនៅទីនេះ ដើម្បីកុំឱ្យខ្វះខាត ។ ទាំងអស់នេះគឺជាការណែនាំ និងចង្អុលបង្ហាញពីលោក ទូច ម៉ារីម អភិបាលខេត្តដែលលោកតែងតែគិតគូរពីសុខទុក្ខរបស់បងប្អូនយុវជនស្ម័គ្រចិត្ត និងមន្ត្រីជំនាញរបស់យើង ។ លោកសូមផ្តាំផ្ញើដល់ប្អូនៗជាក្រុមយុវជនស្ម័គ្រចិត្តទាំងអស់ ត្រូវថែរក្សាសុខភាពឱ្យបានល្អ ដើម្បីសហការជាមួយមន្ត្រីជំនាញក្នុងការវាស់វែងដីធ្លីជូនប្រជាពលរដ្ឋទៅតាមគោលនយោបាយចាស់សកម្មភាពថ្មីឱ្យបានល្អប្រសើរ។
លោក វ៉ាន់ សុធី បានមានប្រសាសន៍សាកសួរសុខទុក្ខក្រុមយុវជនស្ម័គ្រចិត្ត និងមន្ត្រីជំនាញទាំងអស់ដែលកំពុងបំពេញភារកិច្ចជាមួយគ្នាក្នុងការវាស់វែងដីធ្លីជូនប្រជាពលរដ្ឋក្នុងឃុំក្រាំងលាវ ក្នុងស្រុករលាប្អៀរនេះ និងសូមឱ្យបងប្អូនយើងទាំងអស់ថែរក្សាអនាម័យឱ្យបានខ្ពស់ជៀសវាងជំងឺតម្កាត់ផ្សេងៗព្រោះថារដូវនេះជារដូវភ្លៀងធ្លាក់ ។ ជាមួយនេះសូមឱ្យបងប្អូនរួមសហការជាមួយមន្ត្រីជំនាញក្នុងការបំពេញភារកិច្ចវាស់វែងដីធ្លីជូនប្រជាពលរដ្ឋឱ្យទទួលបានជោគជ័យ សម្រាប់ជាប្រយោជន៍ដល់ពួកគាត់ និងងាយស្រួលដល់រាជរដ្ឋាភិបាលទៅថ្ងៃក្រោយ ។
អំណោយដែលនាំយកទៅប្រគល់ជូនក្នុងថ្ងៃនោះមាន សាច់គោ៣គីឡូក្រាម ត្រីឆ្តោ៥គីឡូក្រាម បន្លែ ទឹកបរិសុទ្ធ និងថវិកាមួយចំនួន ។ ជាមួយគ្នានេះមន្ត្រីរាជការទាំង២មន្ទីរក៏បានប្រគេនបច្ច័យដល់ព្រះសង្ឃដែលគង់ក្នុងវត្តអណ្តូងព្រេងចំនួន៨មឺុនរៀលផងដែរ ៕
ចែករំលែកព័តមាននេះ