ខេត្តបន្ទាយមានជ័យ ៖ យុវសិស្សម្នាក់ជិះម៉ូតូចេញពីផ្ទះទៅប្រលងសញ្ញាបត្របាក់ឌុបថ្ងៃចុងក្រោយនៅមណ្ឌលវិទ្យាល័យអូរអំបិល ស្ថិតក្នុងសង្កាត់អូរអំបិល ក្រុងសិរីសោភ័ណ បានជួបគ្រោះថ្នាក់ចរាចរណ៍បើកម៉ូតូទៅបុកគោ១ក្បាលកំពុងដើរលើថ្នល់ពីក្រោយពេញទំហឹងបណ្តាលឱ្យស្លាប់មួយរំពេចនៅនឹងកន្លែងកើតហេតុ ។ ហេតុការណ៍នេះកើតឡើងកាលពីវេលាម៉ោង៥និង៣០នាទីទៀបភ្លឺ ថ្ងៃទី៨ សីហា នៅលើកំណាត់ផ្លូវជាតិលេខ៦ ខាងលិចភូមិសាលាក្រៅ ប្រមាណ៧០០ម៉ែត្រ ក្នុងសង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ត្រី ឈឿម សុផុន នាយការិយាល័យនគរបាលចរាចរខេត្តបានឱ្យដឹងថា យុវសិស្សរងគ្រោះឈ្មោះ រុំ ថាណា អាយុ២១ឆ្នាំ ជាសិស្សរៀននៅវិទ្យាល័យជប់ វ៉ារី រស់នៅភូមិបុសស្បូវ ឃុំបុសស្បូវ ស្រុកព្រះនេត្រព្រះ ខេត្តបន្ទាយមានជ័យ ជិះម៉ូតូម៉ាកហុងដាសេ១២៥ សេ៊រីឆ្នាំ២០១០ ពណ៌ខ្មៅ ពាក់ស្លាកលេខបន្ទាយមានជ័យ1A-0285 ដោយគ្មានពាក់មួកការពារសុវត្ថិភាព ។
លោកនាយការិយាល័យបានបន្តឱ្យដឹងថា បើតាមសាក្សីឃើញហេតុការណ៍ប្រាប់សមត្ថកិច្ចថា មុនពេលកើតហេតុគេឃើញយុវសិស្សរងគ្រោះជិះម៉ូតូតែម្នាក់ឯងក្នុងសម្លៀកបំពាក់សិស្សដើម្បីទៅប្រលងយកសញ្ញាបត្របាក់ឌុបនាថ្ងៃបញ្ចប់ក្នុងទិសដៅពីកើតទៅលិច ។ លុះមកដល់ចំណុចកើតហេតុខាងលើបានជិះម៉ូតូជ្រុលទៅបុកសត្វគោពីក្រោយពេញទំហឹង ខណៈម្ចាស់ដើរដឹកពីមុខបណ្តាលឱ្យយុវសិស្សរងគ្រោះដួលបោកក្បាលទៅនឹងថ្នល់ជាតិស្លាប់មួយរំពេចនៅនឹងកន្លែងកើតហេតុ ចំណែកសត្វគោវិញរងរបួសបាក់ជើងឆ្វេងខាងក្រោយ និងម៉ូតូខូចខាតធ្ងន់ ។
លោកវរសេនីយ៍ត្រី ឈឿម សុផុន បានបន្តទៀតថា មូលហេតុបណ្តាលឱ្យកើតឡើងគ្រោះថ្នាក់ចរាចរណ៍នេះដោយសារយុវសិស្សរងគ្រោះបើកម៉ូតូក្នុងល្បឿនលឿនមើលឧបសគ្គនៅខាងមុខមិនឃើញ ។ បន្ទាប់ពីសមត្ថកិច្ចវាស់វែងរួចក៏បានប្រគល់សពឱ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។ សមត្ថកិច្ចបានអញ្ជើញម្ចាស់គោមកការិយាល័យចរាចរណ៍ខេត្ត ដើម្បីធ្វើកំណត់ហេតុ និងម៉ូតូយកទៅរក្សាទុកនៅស្នងការដ្ឋាននគរបាលខេត្តដើម្បីទុកដោះស្រាយតាមផ្លូវច្បាប់ រីឯសត្វគោត្រូវបានរក្សាទុកឱ្យម្ចាស់ចូលខ្លួនមកទទួលខុសត្រូវ ៕
ចែករំលែកព័តមាននេះ