ខេត្តក្រចេះ ៖ រថយន្តដឹកប្រេងម៉ាស៊ូត មួយគ្រឿងដែលផ្ទុកប្រេងចំណុះ៣២.០០០លីត្របានជួបហេតុការណ៍ក្រឡាប់នៅលើផ្លូវជាតិលេខ៧ ត្រង់ចំណុចថ្មកាំង ក្នុងសង្កាត់អូរឫស្សី ក្រុងក្រចេះ បណ្តាលឱ្យហូរប្រេងម៉ាស៊ូតចេញពីស៊ីទែនអស់ប្រហែល៥០០លីត្រ ហើយអ្នកបើកបររថយន្តរបួសស្រាល ។
មន្ត្រីប៉ូលិសចរាចរបាននិយាយថា ហេតុការណ៍ក្រឡាប់រថយន្តនេះបានកើតឡើងកាលពីវេលាម៉ោង៩យប់ថ្ងៃទី៧ សីហា ដែលបង្កឡើងដោយរថយន្តម៉ាកហ៊ីយ៉ាន់ដាយធុនធំ ដឹកប្រេងម៉ាស៊ូតរបស់ក្រុមហ៊ុនមួយផ្ទុកស៊ីទែនប្រេងដែលមានប្រេងម៉ាស៊ូតពេញបើកបរចេញពីភ្នំពេញទៅខេត្តស្ទឹងត្រែង ។ ទោះជាយ៉ាងណាក្នុងហេតុការណ៍នេះ មិនបង្កឱ្យមនុស្សណាម្នាក់គ្រោះថ្នាក់ដល់អាយុជីវិតនោះទេដោយគេដឹងថា អ្នកបើកបររថយន្តត្រូវរងរបួសស្រាលតែរថយន្តខូចខាតយ៉ាងដំណំ ហើយប្រេងម៉ាស៊ូតដែលផ្ទុកក្នុងស៊ីទែនបានហូរចេញមកក្រៅអស់ប្រហែល៥០០លីត្រ និងបានរថយន្តក្រុមហ៊ុនចេញទៅផ្ទេរប្រេងចេញទាន់ កុំអីត្រូវរងការខូចខាតធ្ងន់ធ្ងរជាងនេះ ។
អ្នកឃើញហេតុការណ៍និយាយថា គេបានឃើញរថយន្តដឹកប្រេងមួយគ្រឿងនេះ បានបើកឡើងលើគំនរថ្មដែលនៅខាងស្តាំដៃក៏បណ្តាលឱ្យរអិលកង់ក្រឡាប់ផ្ងារជើងតែម្តង ដោយគេសង្ស័យថា ប្រហែលជាអ្នកបើកបរមើលមិនឃើញគំនរថ្ម ទើបបើកឡើងពីលើបែបនេះ ៕
ចែករំលែកព័តមាននេះ