ខេត្តស្ទឹងត្រែង ៖ ស្របពេលរដូវទឹកកំពុងឡើងនេះ សកម្មភាពដឹកឈើប្រណីតតាមផ្លូវទឹកកំពុងតែមានភាពគគ្រឹកគគ្រេង ដោយឈ្មួញសម្រុកដឹកជញ្ជូនឈើទាំងនោះតាមគោយន្តកន្ត្រៃទាំងយប់ទាំងថ្ងៃ យកទៅទម្លាក់នៅមាត់ទឹកតាមដងទន្លេ រួចក្រុមរកសីុឈើដឹកតាមកាណូតបន្តទៅខេត្តក្រចេះ ។
តាមសេចក្តីរាយការណ៍របស់ប្រជាពលរដ្ឋនៅស្រុកថាឡាបរិវ៉ាត់ ឱ្យដឹងថា នាយប់ថ្ងៃទី៦ សីហា មានសកម្មភាពក្រុមឈ្មួញល្មើសច្បាប់ដឹកជញ្ជូនឈើប្រណីតប្រភេទធ្នង់ មានមុខកាត់៣០ ទៅ៥០សង្ទីម៉ែត្រ ប្រវែងជាង២ម៉ែត្រ ជាប្រភេទត្រូវបា៉ន់ ដោយដឹកតាមគោយន្តកន្ត្រៃទាំងយប់ទាំងថ្ងៃចេញពីព្រៃធម្មជាតិនានា ក្នុងភូមិសាស្ត្រស្រុកថាឡាបរិវ៉ាត់ យ៉ាងអនាធិបតេយ្យយកមកទម្លាក់នៅមាត់ច្រាំងទន្លេត្រង់ចំណុចភូមិកាំងតេជោ ស្រុកថាឡាបរិវ៉ាត់ និងមិនឃើញមានមន្ត្រីរដ្ឋបាលព្រៃឈើក្នុងដែនសមត្ថកិច្ចនៅទីនោះអើពើទប់ស្កាត់ឡើយ ។
ប្រភពពីអ្នកភូមិរស់នៅក្នុងស្រុកថាឡាបរិវ៉ាត់និយាយថា នៅយប់ថ្ងៃទី៦ សីហា នោះគេឃើញមានគោយន្តកន្ត្រៃ៥ទៅ៦គ្រឿងដឹកឈើធ្នង់ និងរថយន្តមួយគ្រឿង បើកកាត់មុខស្នាក់ការរដ្ឋបាលព្រៃឈើថាឡាបរិវ៉ាត់ យកទៅចាក់នៅមាត់ច្រាំងទន្លេត្រង់ចំណុចខាងលើ រួចទើបដឹកជញ្ជូនតាមកាណូតបន្តទៅកាន់ខេត្តក្រចេះ ។ មានការលើកឡើងថា ការដឹកជញ្ជូននេះ ប្រហែលជាមានការបើកភ្លើងខៀវឱ្យពីមន្ត្រីខិលខូចណាមួយហើយមើលទៅ ទើបបានជាគេហ៊ានបើករថយន្តដឹកឈើទាំងថ្ងៃបង្អួតមហាជនដោយមិនខ្លាចញញើតនឹងច្បាប់បន្តិចណាសោះ ។ ភាពអនាធិបតេយ្យក្នុងការកាប់និងដឹកជញ្ជូនឈើខុសច្បាប់នេះ គឺកំពុងតែកើតមានយ៉ាងពេញបន្ទុកនៅលើទឹកដីស្រុកថាឡាបរិវ៉ាត់ ដោយមេឈ្មួញជាច្រើននាក់ដែលរស់នៅក្នុងស្រុកនេះ ហើយបើមន្ត្រីជំនាញមិនមានការទប់ស្កាត់ទេ ព្រៃឈើនឹងបាត់បង់អស់ជាក់ជាមិនខាន ។
ពាក់ព័ន្ធនឹងករណីនេះ លោកវ៉ា សុខា នាយរងផ្នែករដ្ឋបាលព្រៃឈើថាឡាបរិវ៉ាត់បានបញ្ជាក់តាមទូរស័ព្ទកាលពីរសៀលថ្ងៃទី៧ សីហា ថា លោកមិនបានដឹងទេ ព្រោះលោកកំពុងស្ថិតនៅឯភ្នំពេញ និងប្រាប់ឱ្យទៅសួរលោក សុភិត ជាមេរបស់លោកវិញ ។ នាថ្ងៃដដែលនោះដែរ អ្នកយកព័ត៌មានបានសួរលោក សុភិត តាមទូរស័ព្ទ ហើយលោកឆ្លើយថា នាពេលនេះលោកស្ថិតនៅស្រុកសៀមបូក ហើយក៏បិទទូរស័ព្ទទៅ ធ្វើឱ្យការសុំបំភ្លឺពីព័ត៌មាននេះមិនអាចទទួលអ្វីបានក្រៅពីប្រភពពលរដ្ឋរាយការណ៍ឡើយ ។
តាមប្រជាពលរដ្ឋរស់នៅតាមដងទន្លេនានា ដូចជាទន្លេសេសាន សេកុង មេគង្គជាដើម និយាយថា មានករណីដឹកជញ្ជូនឈើតាមផ្លូវទឹកជាហូរហែ ប្រៀបដូចជាការដឹកទំនិញស្របច្បាប់ដូច្នោះ ដោយពុំមានខ្លាចសមត្ថកិច្ចជំនាញឡើយ ។
ចំណែកប្រជាពលរដ្ឋនៅភូមិស្រែសាមី ឃុំតាឡាត និយាយថា ឥឡូវនេះការដឹកជញ្ជូនឈើប្រណីតរបស់ក្រុមឈ្មួញកំពុងធ្វើសកម្មភាពយ៉ាងគគ្រឹកគគ្រេង ដែលភាគច្រើននាពេលនេះគេមិនសូវដឹកតាមផ្លូវគោកទេ គឺគេដឹកតាមផ្លូវទឹកវិញ ពីព្រោះក្រុមឈ្មួញអាចដឹកបានជាច្រើនម៉ែត្រគូប ៕
ចែករំលែកព័តមាននេះ