ខេត្តកណ្តាល ៖ ការប្រឡងសញ្ញាបត្រមធ្យមសិក្សាទុតិយភូមិ បានប្រព្រឹត្តទៅចាប់តាំងពីថ្ងៃទី៦ សីហា មក និងត្រូវបញ្ចប់ត្រឹមថ្ងៃទី៨សីហា ។ តាមសេចក្តីរាយការណ៍ពីមណ្ឌលប្រឡងមួយចំនួននៅក្នុងខេត្តបានឱ្យដឹងថា មានភាពស្ងប់ស្ងាត់ល្អណាស់នៅខាងក្រៅមណ្ឌល មិនមានអ្នកបោះសំណៅរញ៉េរញ៉ៃបង្កភាពអនាធិបតេយ្យឡើយ ប៉ុន្តែបើតាមប្រភពពីខាងក្នុងបន្ទប់ប្រឡងវិញនិយាយថា មានភាពអនាធិបតេយ្យដូចជាសិស្សលួចបើកសំណៅមើល និងលួចបើកសៀវភៅកំណែមើលឬចម្លងតាមគ្នាជាដើម។ ភាពអនាធិបតេយ្យបែបនេះត្រូវបានគេអះអាងថា ដោយសារតែមានការបើកដៃពីអនុរក្សប្រចាំបន្ទប់ជាថ្នូរនឹងការរៃលុយគ្នាម្នាក់ៗចាប់ពី១ម៉ឺនរៀលទៅ៣មឺុនរៀលឱ្យទៅអនុរក្សតាមមុខវិជ្ជា ។
ជាមួយគ្នានេះ គេមានការកត់សម្គាល់ទៀតថា ចំពោះសិស្សនារីងាយស្រួលលាក់សំណៅចូលបានច្រើនជាងសិស្សប្រុសដោយសារតែគ្រូមិនធ្វើការឆែកឆេរម៉ត់ចត់ដូចសិស្សប្រុសឡើយ។សិស្សប្រុសម្នាក់ដែលប្រឡងនៅវិទ្យាល័យហ៊ុនសែនសេរីភាព ក្រុងតាខ្មៅ ពេលចេញមកវិញនិយាយថា វិញ្ញាសាប្រឡងឆ្នាំនេះពិបាកបន្តិចមែន ប៉ុន្តែអនុរក្សមានការយោគយល់ច្រើនមិនតឹងតែងខ្លាំងទេ គឺអនុញ្ញាតឱ្យសិស្សបើកសៀវភៅកំណែនិងក្រដាសសំណៅមើលដោយលួចលាក់បាន ។ ពេលណាប្រធានមណ្ឌលមកមើលគឺអនុរក្សស៊ីញ៉ូប្រាប់ព្រោះក្នុងមួយមុខវិជ្ជាអនុរក្សប្រចាំបន្ទប់ប្រមូលលុយបានមិនតិចជាង៤០ម៉ឺនរៀលឡើយ ។
ជាមួយគ្នានេះ បើតាមសេចក្តីរាយការណ៍ពីមណ្ឌលប្រឡងមួយចំនួនផ្សេងទៀត នៅក្រុងតាខ្មៅ ក៏ដូចជា នៅតាមបណ្តាស្រុក គឺសុទ្ធតែមានការប្រមូលលុយឱ្យអនុរក្សប្រចាំបន្ទប់ប្រឡង ដើម្បីបានបើកមើលក្រដាសសំណៅនិងកំណែផ្សេងៗគ្រប់មុខវិជ្ជា ។
សិស្សម្នាក់សុំមិនបញ្ចេញឈ្មោះ ដែលមានឈ្មោះប្រឡងនៅមណ្ឌលវិទ្យាល័យហ៊ុនសែនស្អាងនិយាយថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ បេក្ខជនអាចលាក់ក្រដាសសំណៅ និងកំណែចូលក្នុងបន្ទប់បានមួយចំនួន និងមានឱកាសបើកមើលបានយ៉ាងងាយស្រួលស្ទើរគ្រប់មុខវិជ្ជា ។ ការបើកមើលងាយស្រួលបានបែបនេះ ដោយសារតែសិស្សនាំគ្នាប្រមូលលុយឱ្យទៅគ្រូអនុរក្ស ។ ដោយឡែកចំពោះរូបគេមិនបានចូលរួមប្រមូលលុយឱ្យអនុរក្សទេ ព្រោះមានជំនឿ និងទុកចិត្តលើខ្លួនឯងថា អាចធ្វើបានគ្រប់មុខវិជ្ជា ដោយសារតែការព្យាយាមរៀនសូត្រនាពេលកន្លងមកបាននិទេ្ទសល្អជាសិស្សពូកែ ។
ទាក់ទិនទៅនឹងបញ្ហាលេចឮថា មានការប្រមូលលុយឱ្យអនុរក្សនេះ អ្នកយកព័ត៌មានមិនអាចសុំការពន្យល់បំភ្លឺពីមន្ត្រីមន្ទីរអប់រំយុវជន និងកីឡា ខេត្តបានទេ ក្នុងថ្ងៃកំពុងជាប់ប្រឡងនេះ ។ បើតាមមន្ត្រីសមត្ថកិច្ចដែលមានតួនាទីការពារសន្តិសុខ និងសណ្តាប់ធ្នាប់នៅតាមមណ្ឌលប្រឡងនានានិយាយថា សន្តិសុខ និងសណ្តាប់ធ្នាប់នៅតាមមណ្ឌលប្រឡងមានសភាពស្ងប់ស្ងាត់ល្អប្រសើរណាស់ មិនមានអ្នកបោះក្រដាសសំណៅបង្កភាពអនាធិបតេយ្យឡើយក្នុងរយៈពេល៣ថ្ងៃកន្លងមកនេះ ៕
ចែករំលែកព័តមាននេះ