រាជធានីភ្នំពេញ ៖ បុរសវ័យចំណាស់ម្នាក់ស្រវឹងជោកបើកម៉ូតូសង់កូរ៉េ ពណ៌ក្រហម មួយគ្រឿង យ៉ាងលឿននិងរេចង្កូតពេញផ្លូវហើយព្យាយាមបើកវ៉ាម៉ូតូមួយគ្រឿង នៅពីមុខក៏ជ្រុលទៅប៉ះដៃចង្កូតម៉ូតូឌ្រីមសេ១២៥ ពណ៌ខ្មៅ ស៊េរី២០១០ មួយគ្រឿងជិះគ្នា២នាក់ ប្តីប្រពន្ធក្នុងទិសដៅបញ្រ្ចាសគ្នាបណ្តាលឱ្យម៉ូតូសង់កូរ៉េដួល និងសន្លប់តែម្នាក់ឯងត្រូវរថយន្តសាមុយដឹកយកទៅសង្គ្រោះនៅគ្លីនិកឯកជនមួយ កាលពីវេវលាម៉ោង៨និង៤០នាទីយប់ ថ្ងៃទី៧ សីហា តាមបណ្តោយផ្លូវលេខ២៧១ សង្កាត់ទឹកថ្លា ខណ្ឌសែនសុខ ទល់មុខផ្ទះសំណាក់អង្គរមាស ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុ គេឃើញម៉ូតូសង់កូរ៉េ ពណ៌ក្រហម មួយគ្រឿង បើកបរដោយបុរសវ័យចំណាស់ម្នាក់ស្រវឹង បើកម៉ូតូយ៉ាងលឿនតាមផ្លូវលេខ២៧១ ពីជើងទៅត្បូង ស្រាប់តែមកដល់ចំណុចកើតហេតុបានព្យាយាមបើកវ៉ាម៉ូតូមួយគ្រឿងនៅពីមុខក៏ជ្រុលទៅប៉ះដៃចង្កូតម៉ូតូឌ្រីម១២៥ ពណ៌ខ្មៅ ស៊េរី២០១០ មួយគ្រឿងទៀត ជិះ២នាក់ប្តីប្រពន្ធ តែសំណាងល្អ ម៉ូតូ២នាក់ប្តីប្រពន្ធនោះមិនដួលទេ បែរជាសំណាងអាក្រក់ទៅលើបុរសស្រវឹងនោះវិញ ដោយដួលម៉ូតូបោកក្បាលទៅនឹងថ្នល់សន្លប់ស្តូកស្តឹងតែម្នាក់ឯង ។
ប្រភពបន្តថា ក្រោយពេលកើតហេតុ ពីរនាក់ប្តីប្រពន្ធនោះបានធ្វើដំណើរទៅមុខបាត់ អ្នកសន្លប់ត្រូវរថយន្តសាមុយដឹកយកទៅសង្គ្រោះ ឯម៉ូតូបុរសស្រវឹងនោះនៅដួលច្រងាងកណ្តាលថ្នល់ត្រូវបានក្រុមគ្រួសារយកទៅរក្សាទុក ៕
ចែករំលែកព័តមាននេះ