រាជធានីភ្នំពេញ ៖ នៅក្នុងការបកស្រាយក្នុងកិច្ចប្រជុំរដ្ឋសភាព្រឹកថ្ងៃទី៩ សីហា ២០១២ សម្តេចតេជោ ហ៊ុន សែន បានបញ្ជាក់បន្ថែមថា បន្ទាប់ពីបញ្ចប់ការគ្រប់គ្រងប្រទេសកម្ពុជារបស់រដ្ឋបាលអាណាព្យាបាលបារាំង នៅឆ្នាំ១៩៥៣នោះ បារាំងបានបន្សល់ទុកខ្សែព្រំដែន មិនច្បាស់លាស់ ហើយការបោះបង្គោលព្រំដែន មិនតាមលក្ខណៈច្បាប់ និងលក្ខណៈបច្ចេកទេស ក្រៅពីបង្គោលចំនួន១២៤រវាងកម្ពុជា និងកូសាំងស៊ីននាចុងសតវត្សរ៍ទី១៩ និងដើមសតវត្សរ៍ទី២០ ។
សម្តេចបានបញ្ជាក់ទៀតថា បារាំងបានផ្លាស់ប្តូរបង្គោលព្រំដែន និងកែប្រែខ្សែព្រំដែនដោយគ្មានការពិគ្រោះជាមួយប្រទេស ដែលខ្លួនគ្រប់គ្រង ធ្វើឲ្យមានបញ្ហាជម្លោះព្រំដែនរវាងអាជ្ញាធរនៃប្រទេសទាំងពីរ ជាពិសេសប្រជាជនកម្ពុជា-វៀតណាម ដែលពួកគេពុំមានព្រំដែនច្បាស់លាស់ ។ មានប្រសាសន៍នៅចំពោះមុខម្ចាស់សំណួរ គឺអ្នកតំណាងរាស្រ្តគណបក្សប្រឆាំង ជា ពិសេសលោកសុន ឆ័យ នោះ សម្តេចនាយករដ្ឋមន្ត្រី ហ៊ុន សែន បានសង្កត់ធ្ងន់ថា កិច្ចការការពារអធិបតេយ្យ និងបូរណភាពទឹកដី គឺជាភារកិច្ច និងកាតព្វកិច្ចសំខាន់ជាងគេបង្អស់របស់រាជរដ្ឋាភិបាល ហើយជាសិទ្ធិ និងករណីយកិច្ចរបស់ប្រជាពលរដ្ឋកម្ពុជាគ្រប់រូបផងដែរ ។ ការស្នេហាជាតិ និងទឹកដីនេះ គឺពុំមែនជាសិទ្ធិផ្តាច់មុខរបស់គណបក្សនយោបាយ ឬបុគ្គលណាមួយនោះទេ ។
សម្តេចបានបន្ថែមថា ការលើកយកបញ្ហាព្រំដែនមកធ្វើអាជីវកម្មកេងចំណេញខាងនយោបាយដោយគ្មានការទទួលខុសត្រូវ ដើម្បីបំរើផលប្រយោជន៍បុគ្គល ក្រុម ឬគណបក្សរបស់ខ្លួន តាមមធ្យោបាយប្រជាភិថុត ការញុះញង់ ការបំផ្លើស និងការបង្កើតឲ្យមានការភ័ន្តច្រលំលើបញ្ហាព្រំដែន នៅក្នុងចំណោមសាធារណជន មតិជាតិ និងអន្តរជាតិនេះ អាចនឹងនាំមកនូវគ្រោះថ្នាក់ដ៏ធំធេងសម្រាប់ប្រទេសជាតិ និងប្រជាជនទៅវិញទេ ។
ចែករំលែកព័តមាននេះ