ខណៈដែលបណ្តាទីផ្សារនានានៅតែផ្តោតលើធនាគារកណ្តាលអឺរ៉ុបនិងធនាគារកណ្តាលអាមេរិកនៅសប្តាហ៍នេះ ធនាគារកណ្តាលធំៗផ្សេងទៀតដែលគេមិនបានចាប់អារម្មណ៍នោះគឺប្រហែលជាធនាគារកណ្តាលរបស់ជប៉ុន។ ក្រុមមន្ត្រីរបស់ជប៉ុនបាននាំគ្នាបង្កើនការជជែកវែកញែកលើការឡើងថ្លៃរបស់ប្រាក់យ៉េនក្នុងពេលប៉ុន្មានសប្តាហ៍នេះ ។
លោកយូស៊ី ហ៊ីសាម៉ូរីម៉ូតុ ដែលជាសមាជិកក្រុមប្រឹក្សាធនាគារបាននិយាយថា លោកកំពុងពិនិត្យមើលផលប៉ះពាល់នៃវិបត្តិសេដ្ឋកិច្ចសាកលយ៉ាងប្រុងប្រយ័ត្ន និងរូបិយវត្ថុឡើងថ្លៃនៅក្នុងសេដ្ឋកិច្ចរបស់ជប៉ុន ។ គំនិតយោបល់នេះធ្វើឡើង បន្ទាប់ពីរដ្ឋមន្រ្តីហិរញ្ញវត្ថុជប៉ុនលោកជុន អាស៊ូមី បានចេញការព្រមានដដែលៗថា ជប៉ុនអាចអន្តរាគមន៍ដើម្បីទម្លាក់ថ្លៃប្រាក់យ៉េនបន្ទាប់ពីរូបិយវត្ថុនេះឡើងថ្លៃខ្ពស់រយៈពេល២ខែធៀបនឹងប្រាក់ដុល្លារដល់ទៅ៧៧,៩០យ៉េនក្នុង១ដុល្លារ ។
លោក Mitul Kotecha ប្រធានយុទ្ធសាស្ត្ររូបិយវត្ថុសាកលប្រចាំស្ថាប័នCredit Agricole និយាយថា យើងបានទទួលគំនិតយោបល់ជាច្រើនពីសំណាក់ក្រុមមន្រ្តីជប៉ុន ប្រសិនបើ យើងឃើញថា ការផ្លាស់ប្តូររវាងប្រាក់ដុល្លារនិងប្រាក់យ៉េន ស្ថិតក្រោម៧៨បាននិងកំពុងអូសបន្លាយរយៈពេលយូរនោះ ហានិភ័យនៃការអន្តរាគមន៍កាន់តែខ្ពស់។ ក្តីបារម្ភជាច្រើនចំពោះ អនាគតនៃសេដ្ឋកិច្ចសាកលនិងវិបត្តិនៅអឺរ៉ុបបានជំរុញឲ្យក្រុមវិនិយោគិនបែរមករកសញ្ញាប័ណ្ណរបស់ជប៉ុននិងប្រាក់យ៉េនជំនួសវិញ ម៉្លោះហើយបានជាធ្វើឲ្យរូបិយវត្ថុនេះឡើងថ្លៃ ថែមទាំងធ្វើឱ្យប៉ះពាល់ដល់ការនាំចេញរបស់ជប៉ុនទៀតផង។
គួរបញ្ជាក់ថា កាលពីខែវិច្ឆិកាឆ្នាំមុន ជប៉ុនបានធ្វើអន្តរាគមន៍នៅក្នុងទីផ្សាររូបិយវត្ថុម្តងរួចហើយ ដោយចំណាយទឹកប្រាក់អស់១លានលានយ៉េន ស្មើនឹង១៣ពាន់លានដុល្លារអាមេរិក ៕
ចែករំលែកព័តមាននេះ