ខេត្តសៀមរាប ៖ ក្រុមមន្ដ្រីសង្គមស៊ីវិលបានទទូចដល់អាជ្ញាធរខេត្ត ឱ្យចាត់វិធានការទៅលើក្រុមជនល្មើស ដែលឃុបឃិតគ្នារំលោភឈូសឆាយដីព្រៃលិចទឹក ។ ការស្នើឡើងនេះ គឺបន្ទាប់ពីមានការបង្ក្រាបមួយឈុតកាលពីខែមុខទៅលើក្រុមមន្ត្រី៦នាក់ ដែលឃុបឃិតគ្នាឈូសឆាយដីព្រៃលិចទឹកក្នុងបឹងទន្លេសាប ដោយអាជ្ញាធរជាតិដោះស្រាយជម្លោះដីធ្លីបានសហការជាមួយបញ្ជាការដ្ឋានកងរាជអាវុធហត្ថលើផ្ទៃប្រទេស ។
ក្រុមមន្ត្រីអង្គការសង្គមស៊ីវិលបានស្នើបែបនេះកាលពីរសៀលថ្ងៃទី០២ សីហា គឺក្រោយពេលលោកស៊ូ ភិរិន្ទ អភិបាលខេត្ដ ដឹកនាំមន្ដ្រីក្រោមឱវាទមួយក្រុមចុះទៅត្រួតពិនិត្យជាក់ស្ដែងពីស្ថានភាពរំលោភឈូសឆាយដីព្រៃលិចទឹកទំហំជាង៥០ហិកតា នៅតំបន់អក.ស ក្នុងភូមិត្រពាំងទឹម ឃុំកណ្ដែក ស្រុកប្រាសាទ បាគង ប៉ុន្ដែជាលទ្ធផលបានត្រឹមតែបញ្ជាផ្ទាល់មាត់ឱ្យមន្ដ្រីថ្នាក់ក្រោមរក្សាស្ថានភាពដីដែលត្រូវឈូសឆាយបាត់ទៅហើយនោះឱ្យនៅដដែលតែប៉ុណ្ណោះ ។
មន្ត្រីស៊ើបអង្កេតសមាគមការពារសិទ្ធិមនុស្សអាដហុកប្រចាំខេត្ដសៀមរាប ដែលបានចុះ ទៅធ្វើការស៊ើបអង្កេតដល់តំបន់ដីព្រៃលិចទឹកដែលត្រូវជនមួយក្រុមរំលោភឈូសឆាយនោះបានថ្លែងកាលពីរសៀលថ្ងៃទី២ សីហា ថា ករណីរំលោភឈូសឆាយដីព្រៃលិចទឹកថ្មីៗនេះនៅខេត្ដសៀមរាប វាប្រហាក់ប្រហែលទៅនឹងការរំលោភនៅខេត្ដកំពង់ធំដែរ ហើយករណីនៅខេត្ដកំពង់ធំមាន ការចាត់វិធានការតាមផ្លូវច្បាប់បានប្រសើរជាង រហូតដល់មានការចាប់អ្នកប្រព្រឹត្ត និងអ្នកពាក់ពន្ធ័ចំនួន៦នាក់យកមកផ្ដន្ទាទោសថែមទៀត ។
លោកបានបន្ថែមថា តាមការចុះអង្កេត និងសាកសួរប្រជាពលរដ្ឋរស់នៅក្បែរតំបន់អក.ស ជាកន្លែងកើតមានអំពើរំលោភដីព្រៃលិចទឹក គឺសកម្មភាពរំលោភមានស្ថានភាពធ្ងន់ធ្ងរណាស់ ដែលគួរតែសមត្ថកិច្ចពាក់ព័ន្ធ រួមមានក្រសួងធនធានទឹក និងរដ្ឋបាលជលផល ក៏ដូចជាអាជ្ញាធរខេត្ដ សហការចុះទៅពិនិត្យឱ្យបានជាក់ស្ដែង និងចាត់វិធានការតាមផ្លូវច្បាប់ទៅលើក្រុមអ្នកប្រព្រឹត្តកំហុសទាំងអស់ឱ្យបានឆាប់ចៀសវាងពួកគេបន្ដធ្វើសកម្មភាពបន្ថែមទៀត។ លោកបានបន្ដថា ព្រៃលិចទឹកជាជម្រកមច្ឆជាតិគ្រប់ប្រភេទពង-កូន ស្ថិតនៅក្រោមការគ្រប់គ្រងរបស់រដ្ឋមិនអាចឱ្យបុគ្គលណាម្នាក់ ឬក្រុមណាមួយទៅរំលោភទន្ទ្រានកាន់កាប់បានទេ ជាពិសេសកាលពីពេលកន្លងទៅសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីក៏បានចេញបទបញ្ជាយ៉ាងម៉ឺងមាត់បំផុតដែរ ហើយការរំលោភខាងលើគឺជាករណីថ្មី ។
ទាក់ទិនទៅនឹងបញ្ហាខាងលើ កាលពីថ្ងៃទី១ សីហា ឆ្នាំ២០១២ អភិបាលខេត្ដសៀមរាប លោកស៊ូ ភិរិន្ទ បានដឹកនាំមន្ដ្រីក្រោមឱវាទ រួមមានមន្ដ្រីមន្ទីរធនធានទឹក មន្ត្រីរដ្ឋបាលជលផល និងមន្ដ្រីអាជា្ញធរស្រុកប្រាសាទបាគង ព្រមទាំងមន្ដ្រីកងកម្លាំងពាក់ពន្ធ័ជាច្រើននាក់ទៀត ចុះទៅដល់តំបន់អក.ស ក្រោមទំនប់៧៨ ក្នុងឃុំកណ្ដែក ស្រុកប្រាសាទបាគង ដែលបានរងនូវការឈូសឆាយយ៉ាងរង្គាល ។ នៅក្នុងឱកាសនោះ លោកស៊ូ ភិរិន្ទ បានមានប្រសាសន៍ថា ការឈូសឆាយដីព្រៃលិចទឹកនោះធ្វើឡើងនៅអំឡុងដើមខែមិថុនា ឆ្នាំ២០១២ គឺថ្ងៃទី២ ទី៣ ខណៈអាជ្ញាធរនិងមន្ដ្រីជំនាញពាក់ព័ន្ធបានស្វះស្វែងរកវិធានការខ្លាំងបំផុតក្នុងការគោរពតាមបទបញ្ជាដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ដែលបានដាក់ចេញនូវបទបញ្ជាឱ្យមានការការពារដែនព្រៃលិចទឹកជាជម្រកត្រីពង-កូន។ កន្លងមក ប្រជាពលរដ្ឋបានផ្ដិតមេដៃក្នុងការបញ្ឈប់សកម្មភាពរុករានព្រៃលិចទឹកនេះ និងចូលរួមការពារផងដែរ ។
ថ្វីបើយ៉ាងនេះក្ដី លោកមិនបានឱ្យមានចំណាត់ការភ្លាមៗទៅលើក្រុមអ្នកប្រព្រឹត្តល្មើសច្បាប់ និងបទបញ្ជារបស់សម្តេចតេជោនាយករដ្ឋមន្ដ្រីនោះទេ គ្រាន់តែចេញបញ្ជាផ្ទាល់មាត់រក្សាតំបន់នោះឱ្យនៅស្ថានភាពដដែល ចំពោះការធ្វើយ៉ាងណាៗ នឹងមានការពិភាក្សាជាមួយស្ថាបន័ពាក់ព័ន្ធទៀត។យោងតាមពាក្យបណ្ដឹងរបស់តំណាងអ្នកភូមិទាំងបួនរួមមានភូមិត្រពាំងទឹម ភូមិល្អក់ ភូមិឃុនមោក និងភូមិធ្លក ក្នុងឃុំកណ្ដែក ស្រុកប្រាសាទបាគង គឺលោកគុំ សារ៉ន អាយុ៧០ឆ្នាំ បានភ្ជាប់មកជាមួយនូវស្នាមមេដៃប្រជាពលរដ្ឋចំនួន១៦៩នាក់ ដែលបានប្ដឹងមកសមាគមអាដហុកប្រចាំខេត្ដសៀមរាប ឱ្យជួយអន្ដរាគមន៍បង្ហាញថា មានមនុស្សចំនួន១៤នាក់ មានការពាក់ព័ន្ធនៅក្នុងសកម្មភាពរំលោភកាន់កាប់ដីព្រៃលិចទឹកដ៏មានទំហំធំធេងនោះ ប៉ុន្ដែគេបានបញ្ចេញឈ្មោះតែពីរនាក់ប៉ុណ្ណោះ គឺឈ្មោះពុយ ហើយ ជាជំនួយការមេឃុំកណ្ដែក និងឈ្មោះខាំ លួស មេភូមិត្រពាំងទឹម និងត្រូវជាប្អូនប្រុសបង្កើតលោកមេឃុំកណ្តែក។
បន្ថែមពីលើនោះ កាលពីថ្ងៃទី១៨ កក្កដា ឆ្នាំ២០១២ ប្រជាពលរដ្ឋចំនួន៧នាក់ ជាតំណាងឱ្យប្រជាពលរដ្ឋចំនួន៥ភូមិ ដោយមានស្នាមមេដៃប្រជាពលរដ្ឋរហូតដល់២៥៨នាក់ នៅភូមិទាំង៥ខាងលើដូចគ្នា ក៏បានដាក់ពាក្យបណ្ដឹងមកលោកស៊ូ ភិរិន្ទ អភិបាលខេត្ដសៀមរាប ឱ្យជួយអន្ដរាគមន៍ទាមទារដីព្រៃលិចទឹក ដែលត្រូវបានបក្សពួកខាងលើរំលោភឈូសឆាយ យកមកទុកធ្វើសម្បត្ដិរដ្ឋវិញដែរ។ ពួកគាត់បានអះអាងថា ដីទាំងនោះគឺជាដីព្រៃលិចទឹកជារៀងរហូតមក ពុំដែលឃើញមានការធ្វើស្រែប្រដេញទឹកទេ ពីមុនមក ។ រហូតមកដល់ថ្ងៃនេះមិនទាន់មានចំណាត់ការបែបណានៅឡើយទេ ៕
ចែករំលែកព័តមាននេះ