រាជធានីភ្នំពេញ ៖ សម្តេចអគ្គមហាសេនាបតីតេជោនាយករដ្ឋមន្ត្រី ហ៊ុន សែន បានបង្ហាញវត្តមានឆ្លើយបំភ្លឺដោយផ្ទាល់មាត់ជូនរដ្ឋសភា ជាពិសេសតំណាងរាស្ត្រគណប្រឆាំងលើការងារបោះបង្គោលព្រំដែនរវាងកម្ពុជា និងវៀតណាមនៅព្រឹកថ្ងៃព្រហស្បតិ៍ទី៩ សីហា ២០១២ ដើម្បីឱ្យមជ្ឈដ្ឋានជាតិ-អន្តរជាតិ ជាពិសេសជនរួមជាតិបានជ្រួតជ្រាបចៀសវាងការយល់ច្រឡំ ។
យោងតាមសេចក្តីជូនដំណឹងរបស់ខុទ្ទកាល័យសម្តេចនាយករដ្ឋមន្ត្រីបានបញ្ជាក់ថា មន្ត្រីរាជការស៊ីវិលនៅតាមក្រសួងមន្ទីរស្ថាប័ននានា កងកម្លាំងប្រដាប់អាវុធ ប្រជាពលរដ្ឋជនរួមជាតិគ្រប់ស្រទាប់ជាន់ថ្នាក់ សូមចូលរួមស្តាប់ការបកស្រាយរបស់សម្តេចតេជោនាយករដ្ឋមន្ត្រី ហ៊ុន សែន ក្នុងឆន្ទៈយកចិត្តទុកដាក់ដោយទុកការងារប្រចាំថ្ងៃមួយអន្លើសិន ព្រោះការបកស្រាយនេះ គឺជាឧត្តមប្រយោជន៍ជាតិធំធេងណាស់ ។
សូមបញ្ជាក់ថា សម័យប្រជុំរដ្ឋសភាលើកទី៨ នីតិកាលទី៤ ដែលធ្វើឡើងក្រោមអធិបតីភាពសម្តេចប្រធានរដ្ឋសភា ហេង សំរិន នៅថ្ងៃទី៩ សីហា ២០១២ នេះដែរ រដ្ឋសភាក៏នឹងពិភាក្សានិងអនុម័តលើរបៀបវារៈដូចតទៅ ៖
១-ការបោះឆ្នោតជ្រើសតាំងលោកពេជ្រ គឹមស្រ៊ាង ជាសមាជិកគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារី។
២-ការពិភាក្សា និងអនុម័តសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រ
កម្ពុជា និងរដ្ឋាភិបាលនៃរដ្ឋកាតា ស្តីពីការគ្រប់គ្រងការប្រើប្រាស់ហត្ថពលកម្មនៅរដ្ឋកាតា ។
៣-ការពិភាក្សា និងអនុម័ត សេចក្តីព្រាងច្បាប់ស្តីពីការអនុម័តយល់ព្រមឲ្យព្រះរាជាណា
ចក្រកម្ពុជា ចូលរួមក្នុងអនុសញ្ញារ៉ូថឺដាម ស្តីពីនីតិវិធីនៃការយល់ព្រមផ្តល់ព័ត៌មានជាមុន ចំពោះសារធាតុគីមី និងថ្នាំកសិកម្មគ្រោះថ្នាក់ ក្នុងពាណិជ្ជកម្មអន្តរជាតិ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ