រាជធានីភ្នំពេញ ៖ នៅវេលាម៉ោង៦ល្ងាចថ្ងៃទី៨ សីហា អង្គភាពប្រឆាំងអំពើពុករលួយបាននាំខ្លួនមន្ត្រីក្រសួងរៀបចំដែនដី នគរូបនីយកម្ម និងសំណង់៤នាក់ទៅកាន់សាលាដំបូង ។ ការចាប់ខ្លួនមន្ត្រី៤នាក់នេះបានធ្វើឱ្យមានការចាប់អារម្មណ៍ជាសាធារណៈមួយថ្មីទៀតដែលអង្គភាពនេះបានអនុវត្តប្រឆាំងនឹងក្រុមមន្ត្រីដែលជាប់ចោទពីបទប្រព្រឹត្តអំពើពុករលួយ ។
ការនាំខ្លួនមន្ត្រីមកកាន់សាលាដំបូងនេះ មិនមានមន្ត្រីអង្គភាព ឬក៏តុលាការណាម្នាក់ហា៊នទម្លាយព័ត៌មានឱ្យដឹងនោះទេ ។ ទោះបីជាបែបណា តាមប្រភពមួយចំនួនបានឱ្យដឹងថា មន្ត្រីទាំង៤នាក់នេះ ម្នាក់ជាអគ្គនាយករង ពីរនាក់ជាអនុប្រធាននាយកដ្ឋាន និងម្នាក់ជាមន្ត្រីសាមញ្ញជាអ្នករត់ការ ។
តាមប្រភពផ្លូវការនិយាយថា ការចាប់ខ្លួនមន្ត្រីទាំង៤នាក់នេះ គឺបន្ទាប់ពីមានពាក្យបណ្តឹងជុំវិញការសាងសង់លំនៅឋានក្នុងគម្រោងអភិវឌ្ឍន៍លំនៅឋានសម្តេចតេជោ ដល់អតីតយុទ្ធជននៅស្រុកបាកាន ខេត្តពោធិ៍សាត់ដោយមានការកិបកេងប្រាក់រាប់សិបលានរៀល ។
ប្រភពបានឱ្យដឹងទៀតថា មន្ត្រីធំម្នាក់ក្នុងចំណោមអ្នកត្រូវបានចាប់ខ្លួន គឺលោកផូ វុទ្ធី និង៣នាក់ទៀតមានឈ្មោះទុយ ឡាយឫទ្ធី, សារ៉េត បូរា៉មី និងមាស ឥស្សរ៉ា ។ រហូតមកដល់ម៉ោង៨យប់ថ្ងៃដដែលព្រះរាជអាជ្ញារង៣រូបបានសាកសួររួចបញ្ជូនទៅឱ្យចៅក្រមសាកសួរបន្តទាំងយប់ ឯការសម្រេចបែបណានោះ ត្រូវបានអ្នកតាមដាននិយាយថា មន្ត្រីទាំង៤នាក់នេះចៀសមិនផុតពីការឃុំខ្លួននោះទេ ។ សេចក្តីរាយការណ៍ខាងលើនេះ គ្រាន់តែជាព័ត៌មានជំហានដំបូងប៉ុណ្ណោះ មិនទាន់ចាត់ទុកជាផ្លូវការនោះទេ ៕
ចែករំលែកព័តមាននេះ