ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើងកាលពីវេលាម៉ោង១២ថ្ងៃត្រង់ថ្ងៃទី៧ សីហា ខណៈនាងក្រមុំម្នាក់រត់មកប្តឹងសមត្ថកិច្ចប៉ូលិសក្រុងកំពង់ឆ្នាំងឱ្យជួយ ដោយអះអាងថា នាងត្រូវគេដាក់ថ្នាំសណ្តំ ឱ្យសន្លប់ហើយនាំទៅកាន់ខេត្តបន្ទាយមានជ័យ ។ នាងបាននិយាយប្រាប់ប៉ូលិសថា នាងឈ្មោះកែវ នីតា អាយុ២៣ឆ្នាំ មានទីលំនៅភូមិឡកំបោរ សង្កាត់ស្វាយប៉ាក ខណ្ឌឫស្សីកែវ ជានិស្សិតនៅសាកលវិទ្យាល័យមួយក្នុងរាជធានីភ្នំពេញ ។
នាងបានអះអាងនៅចំពោះមុខសមត្ថកិច្ចប៉ូលិសក្រុងកំពង់ឆ្នាំងថា នៅថ្ងៃទី៥ សីហា ត្រូវនឹងថ្ងៃអាទិត្យ ពេលរូបនាងធ្វើដំណើរតាមផ្លូវបានជួបគ្រោះថ្នាក់ចរាចរណ៍មួយ ដោយឃើញនារីម្នាក់ដួលម៉ូតូ ហើយពេលនោះនាងមានបំណងទៅជួយលើក ប៉ុន្តែគ្រាន់តែដាក់ចន្ទល់ម៉ូតូក៏ស្រាប់តែមានរថយន្តទួរីសមួយគ្រឿងបើកមកជិត ហើយនាងក៏សន្លប់បាត់ទៅ ។ ក្រោយមកនាងបានដឹងខ្លួនម្តងឃើញមនុស្សប្រុសម្នាក់យកបាយនិងទឹកមកឱ្យនាងហូប លុះនាងសួរគេប្រាប់ថា នៅទីនេះគឺស្វាយស៊ីសុផុន ខេត្តបន្ទាយមានជ័យ ហើយនាងត្រូវគេដាក់បង្ខាំងក្នុងបន្ទប់មួយក្នុងផ្ទះថ្ម ។
នាងនិយាយទៀតថា ក្រោយមកនាងក៏សន្លប់ទៀតហើយពេលដឹងខ្លួនឡើងគឺនៅលើទូកមួយក្នុងទន្លេផ្សារក្រោមដោយមានចាក់សោជាប់ ប៉ុន្តែនាងបានលួចរត់ចេញរួចហើយមកប្តឹងប៉ូលិសតែម្តង ។ ទោះយ៉ាងណា នេះគ្រាន់តែជាការអះអាងរបស់នារីរូបនេះនៅចំពោះមុខសមត្ថកិច្ច ហើយក៏មានបញ្ហាជាច្រើនដែលស្ទើរតែមិនគួរឱ្យជឿថែមទៀត ដោយសារថាតើគេចាប់នាងទៅធ្វើអ្វី?
លោកស្រីវរសេនីយ៍ឯកប្រាក់ សៅនី ស្នងការរងនគរបាលខេត្តមានប្រសាសន៍តាមទូរស័ព្ទថា រឿងនេះនៅមិនទាន់ដឹងច្បាស់យ៉ាងម៉េចទេ សុំរង់ចាំសិន ។ ប៉ុន្តែនៅវេលាម៉ោង៥ល្ងាចថ្ងៃដដែលលោកស្រីបានទូរស័ព្ទប្រាប់ថា នេះជារឿងចាញ់បោកគេទេ ដោយលោកស្រីបានស្រង់សម្តីនារីរូបនេះពេលសួរនាងនៅស្នងការដ្ឋានថា នារីរូបនេះគឺជាប៉ូលិសទើបចូលថ្មី ហើយនាងបានឆ្លៀតពេលថ្ងៃសៅរ៍-អាទិត្យទៅរៀននៅមហាវិទ្យាល័យបន្ថែម ដើម្បីយកបរិញ្ញាបត្រ។ នាងបាននិយាយថា រូបនាងបានស្គាល់បុរសម្នាក់តាមរយៈទូរស័ព្ទរយៈពេល៦ខែមកហើយ ដោយបុរសនោះជានិស្សិតរៀននៅសាកលវិទ្យាល័យផ្សេង ហើយនៅព្រឹកថ្ងៃអាទិត្យនាងបានទៅរៀននៅសាលាជាធម្មតា ប៉ុន្តែសាលាមិនរៀន នាងក៏បានទទួលទូរស័ព្ទពីមិត្តប្រុសរបស់នាងឱ្យនាងទៅជួប ។ ពេលនាងទៅជួបនៅផ្ទះជួលរបស់មិត្តប្រុសក៏នាំគ្នាជិះម៉ូតូមកផ្សារសូរិយាជាន់ទី៣ ពេលនោះនាំគ្នាហូបបង្អែម១ចាន ម្នាក់ហើយបុរសរូបនោះប្រាប់ថាឱ្យនាងចាំមួយភ្លែតគេមានការចុះក្រោមបន្តិច។ នាងប្រាប់ទៀតថា ពេលនាងទៅជួបបុរសរូបនោះហើយក៏ជិះម៉ូតូមកផ្សារសូរិយាដោយបុរសរូបនោះជាអ្នកបើកម៉ូតូ និងកាន់សោ ម៉ូតូរបស់នាងជាប់ ។
នៅពេលចាំបុរសរូបនោះយូរពេករហូតដល់ម៉ោងជាង១រសៀលក៏ទូរស័ព្ទសួរហើយគេប្រាប់ថា ចាំបន្តិចព្រោះជាប់រវល់ ។ ប៉ុន្តែចាំរហូតដល់ម៉ោង៤រសៀលនៅតែមិនឃើញក៏ទូរស័ព្ទម្តងទៀត តែហៅលែងចូល រូបនាងក៏ចុះមកជាន់ក្រោមស្រាប់តែបាត់ម៉ូតូទើបដឹងថាចាញ់បោក ។ ដោយភ័យពេកនាងបានសម្រេចចិត្តជិះរថយន្តក្រុងទៅដេកនៅផ្ទះសំណាក់នៅខេត្តកំពង់ធំ២យប់ និងព្រឹកថ្ងៃទី៧ សីហា ជិះរថយន្តក្រុងមកផ្ទះនៅម្តុំវិមានឯករាជ្យ ក្រុងកំពង់ឆ្នាំង ហើយក៏បានប្រឌិតរឿងនេះឡើងដើម្បីលុបលាងកំហុសព្រោះខ្លាចឪពុកម្តាយរករឿង ។
លោកស្រីស្នងការរងនិយាយថា នេះជាការប្រឌិតរឿងដើម្បីឱ្យភាន់ច្រឡំផ្អើលពេញផ្ទៃប្រទេស បើកុំតែលោកស្រីលួងលោមសួរផង ប្រើវិធីសាស្ត្រផង ដើម្បីយកព័ត៌មានពិត ម៉្លេះព័ត៌មានប្រឌិតនេះក្លាយទៅជារឿងអសន្តិសុខមួយពុំខាន ៕
ចែករំលែកព័តមាននេះ