រាជធានីភ្នំពេញ ៖ ស្ត្រីម្នាក់ដែលអត់មានលុយបង់ថ្លៃផ្ទះជួលចំនួន៥ម៉ឺនរៀលបានដាច់ចិត្តធ្វើអត្តឃាតដោយហូបធូបមូសអស់មួយបន្ទះលាយជាមួយស្រា បណ្តាលឱ្យពុលបែកពពុះមាត់ប្រកាច់ប្រកិន ។ ហេតុការណ៍នេះកើតឡើងកាលពីវេលាម៉ោង៣រសៀល ថ្ងៃទី៧ សីហា នៅផ្ទះជួលក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ ។
ស្ត្រីដែលហូបធូបមូសប៉ុនប៉ងសម្លាប់ខ្លួននេះឈ្មោះ ប៉ូ សុខារី អាយុ៤៥ឆ្នាំ មុខរបរដើររើសអេតចាយ ស្នាក់នៅផ្ទះជួលកន្លែងកើតហេតុខាងលើ។ បើតាមកូនស្រីឈ្មោះ រ៉ា រីណា អាយុ១៧ឆ្នាំ បានឱ្យដឹងថា នាងកំព្រាឪពុកតាំងពីទើបនឹងកើតមកម៉្លេះ ដោយរស់នៅជាមួយម្តាយប្រកបរបររើសអេតចាយ ដើរដេកតាមសំយាបផ្ទះគេមិនពិតប្រាកដថាកន្លែងណាមួយទេ រហូតដល់នាងធំពេញវ័យបានគ្នាជាប្តីប្រពន្ធជាមួយបុរសឈ្មោះ អន សំអឿន អាយុ២៥ឆ្នាំ មុខរបរកម្មករលីដែក ហើយមានកូនម្នាក់ទើបនឹងកើតបានមួយខែ ។
នាងរីណារៀបរាប់ទៀតថា ដោយសារតែជីវភាពក្រីក្ររកព្រឹកខ្វះល្ងាចនោះរូបនាងមិនដែលមានកន្លែងស្នាក់នៅពិតប្រាកដទេ ទើបតែនាងធំពេញវ័យមានប្តីក៏បានទៅជួលផ្ទះគេស្នាក់នៅក្នុងមួយខែ៥ម៉ឺនរៀល ហើយកន្លងមកថ្មីៗនេះប្តីរបស់នាងមិនសូវមកផ្ទះទេគឺស្នាក់នៅកន្លែងធ្វើការតែម្តង ។ លុះនៅថ្ងៃកើតហេតុដែលដល់ថ្ងៃបង់លុយថ្លៃផ្ទះ តែអត់មានលុយបង់ ម្តាយរបស់នាងបានប្រើនាងឱ្យទៅខ្ចីលុយម្តាយធំ តែនាងមិនហ៊ានទៅខ្ចីទេ ធ្វើឱ្យមានការឈ្លោះប្រកែកគ្នាបន្តិចបន្តួចជាមួយម្តាយ ។ បន្ទាប់មក នាងបានដើរចេញមកក្រៅផ្ទះបាត់ក្នុងគោលបំណងទៅរកខ្ចីលុយគេ រហូតដល់ម៉ោង៤រសៀលទើបនាងចូលមកផ្ទះវិញ ស្រាប់តែឃើញម្តាយសម្រាកនៅក្នុងអង្រឹង ហើយអ្នកជិតខាងប្រាប់ថា ម្តាយរបស់នាងហូបធូបមូសអស់មួយបន្ទះលាយជាមួយស្រា តែអ្នកជិតខាងនាំគ្នាជួយខ្វេះធូបមូសចេញបានតិចតួច និងលេបចូលពោះអស់ច្រើន ។
ប្រភពដដេលបន្តទៀតថា រហូតដល់វេលាព្រលប់ស្រាប់តែម្តាយរបស់នាងក្អួតចង្អោរម្តង ហើយមកដល់ម៉ោង៨យប់ ទើបថ្នាំមូសចាប់ផ្តើមធ្វើទុក្ខក្អួតចង្អោរបែកពពុះមាត់រហូតសន្លប់ តែដោយសារអត់មានប្រាក់ មិនបានបញ្ជូនទៅមន្ទីរពេទ្យភ្លាមទេ រហូតដល់ប្រជាការពារភូមិដឹងហើយរាយការណ៍ទៅលោក សេង សាញ់ ចៅសង្កាត់ស្ទឹងមានជ័យ ទើបលោកប្រាប់ឱ្យដឹកយកទៅព្យាបាលនៅមន្ទីរពេទ្យមិត្តភាពខ្មែរ-សូវៀតដោយលោកជាអ្នកចេញថ្លៃព្យាបាល ។ ស្ត្រីរងគ្រោះត្រូវបានដឹកតាមរ៉ឺម៉កម៉ូតូយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ដោយកូនស្រីឈ្មោះ រ៉ា រីណា បីកូនទើបនឹងកើតបានមួយខែយកទៅមន្ទីរពេទ្យជាមួយដែរ ដោយសារមិនមានអ្នកជួយមើលថែ ។ ប៉ុន្តែអ្វីដែលគួរឱ្យសង្វេគនោះគឺស្ត្រីរងគ្រោះមានម្តាយចាស់ពិការអាយុ៨០ឆ្នាំរស់នៅជាមួយទៀតផង ។ លុះពេលដឹកស្ត្រីរងគ្រោះទៅព្យាបាលនៅមន្ទីរពេទ្យ ម្តាយចាស់ពិការគ្មានអ្នកជួយមើលថែទាំឡើយ ៕
ចែករំលែកព័តមាននេះ