ក្រុងប៉ោយប៉ែត ៖ តាមការផ្តល់ព័ត៌មានពីលោកអ៊ុំ សុផល អធិការនគរបាលក្រុងប៉ោយប៉ែត នាព្រឹកថ្ងៃទី៧ សីហា ឆ្នាំ២០១២ ឱ្យដឹងថា ដោយមានការចង្អុលណែនាំពីលោកឧត្តមសេនីយ៍ត្រី ខេង ស៊ុម ស្នងការនគរបាលខេត្តបន្ទាយមានជ័យ ឱ្យកម្លាំងនគរបាលធ្វើយ៉ាងណាត្រូវការពារសន្តិសុខ សណ្តាប់ជូនប្រជាពលរដ្ឋ ដែលជាអាជីករលក់ដូរនៅក្នុងផ្សារ ឬតំបន់ស្មុគស្មាញដែលជនល្មើសតែងធ្វើសកម្មភាពបង្កអសន្តិសុខដល់សង្គម និងទប់ស្កាត់នូវអំពើចោរ លួច ឆក់ ប្លន់ តាមទូលក់មាស ដូរលុយ ផងដែរ ។
យោងតាមការណែនាំខាងលើ លោកបានបំផុសចលនាមហាជន និងអាជីវករជួយកសាងប៉ុស្តិ៍ប្រជាការពារជាជំហានដំបូងបានចំនួន២ប៉ុស្តិ៍ ដែលមានទំហំ៣ម៉ែត្រ ៤ជ្រុង ធ្វើអំពីដែកប្រក់ស័ង្កសីដែលក្នុងប៉ុស្តិ៍នីមួយៗចំណាយអស់ទឹកប្រាក់ចំនួន១.២០០ដុល្លាររួមទាំងថ្លៃដឹកដីមកចាក់ផងដែរ ។
លោកបន្តថា ប៉ុស្តិ៍ទាំង២នេះ គឺដាក់នៅមុខសាលានិមិត្ត១កន្លែង ព្រោះនៅពេលយប់សម្បូរក្រុមជនខិលខូចមកផ្តុំគ្នាធ្វើសកម្មភាពប្រព្រឹត្តបទល្មើសផ្សេងៗ និងនៅមុខផ្សារអគ្គជិតកន្លែងលក់មាស ដូរលុយ ។ តាមប៉ុស្តិ៍នីមួយៗក៏មានដាក់កាមេរ៉ាសុវត្ថិភាពចាំឃ្លាំមើលទៀតផង ដោយបានកម្លាំងនគរបាល និងកម្លាំងប្រជាការពារយាមកាម២៤ម៉ោងលើ២៤ម៉ោង ។ ជាមួយគ្នានោះដែរ លោកអធិការក្រុងក៏បានបញ្ជាក់ថា លោកនឹងបន្តបំផុសចលនាមហាជន និងអាជីវករឱ្យចូលរួមបន្តទៀតដើម្បីរួចគ្នាថែរក្សាសន្តិសុខ សុវត្ថិភាពក្នុងក្រុងប៉ោយប៉ែត ពិសេសគឺការអនុវត្តគោលនយោបាយភូមិឃុំមានសុវត្ថិភាពរបស់រាជរដ្ឋាភិបាលកម្ពុជា ៕
ចែករំលែកព័តមាននេះ