ខេត្តបន្ទាយមានជ័យ ៖ ស្ត្រីមេម៉ាយលក់គ្រឿងទេសម្នាក់បានប្រឈមមុខជាមួយនឹងក្រុមចោរប្លន់៣នាក់ដែលប្រដាប់ដោយពូថៅ និងកាំបិតខ្វែវ ទោះបីបានរងរបួស តែសំរែករបស់គាត់ជាមួយនឹងការប្រតាយប្រតប់ជាមួយពួកចោរបានធ្វើឱ្យអ្នកភូមិភ្ញាក់ផ្អើល ហើយបាននាំគ្នាស្រែកឆោឡោធ្វើឱ្យពួកចោរភ័យស្លន់ស្លោរត់បាតជើងសព្រាតដោយមិនអាចប្លន់យកអ្វីបានឡើយ។ ជុំវិញអំពើប្លន់នោះតាមព័ត៌មានបានឱ្យដឹងថា ពួកចោរប្លន់បានលួចចូលតាមរបងទៅធ្វើសកម្មភាពសំឡុតគំរាមប្លន់យកលុយ និងគ្រឿងអលង្ការពីស្ត្រីមេម៉ាយនោះនៅវេលាម៉ោង៩ និង៤៥នាទីយប់ថ្ងៃទី៣០ តុលា ឆ្នាំ២០១០ នៅចំណុចភូមិ២ (ខ្លាកូនចាស់) សង្កាត់កំពង់ស្វាយ ក្រុងសិរីសោភ័ណ។
លោកវរសេនីយ៍ត្រីរ៉ែម វីរៈ អធិការនគរបាលស្រុកសិរីសោភ័ណបានឱ្យដឹងថា ស្ត្រីរងគ្រោះឈ្មោះពន់ គឹមហេង អាយុ៣៥ឆ្នាំ ជាស្ត្រីមេម៉ាយ មានកូនស្រីម្នាក់ឈ្មោះផឹង ស្រីល័ក្ខ អាយុ១៣ឆ្នាំ មានមុខរបរលក់គ្រឿងទេសបន្តិចបន្តួចនៅនឹងផ្ទះក្នុងភូមិ។ លោកអធិការបានបន្តឱ្យដឹងទៀតថា តាមការរៀបរាប់បំភ្លឺពីស្ត្រីរងគ្រោះបានប្រាប់សមត្ថកិច្ចថា មុនពេលកើតហេតុរូបគាត់ និងកូនស្រីមិនទាន់ដេកទេ គឺកំពុងបត់ ខោអាវ និងមើលទូរទស្សន៍ ស្រាប់តែមានចោរចំនួន៣នាក់ ស្លៀកពាក់ស៊ីវិលក្នុងនោះមាន២នាក់ប្រដាប់ដោយពូថៅ និងកាំបិតខ្វែវបានចូលមកក្នុងផ្ទះគាត់តាមទ្វារក្រោយ។ ពេលនោះក្រុមចោរបានចាប់គាត់ខ្ទប់មាត់មិនឱ្យស្រែក ព្រមទាំងសំឡុតគំរាមឱ្យយកលុយ និងគ្រឿងអលង្ការមកឱុ្យពួកវា រីឯបក្សពួកចោរម្នាក់ទៀតឈរនៅខាងក្រៅផ្ទះមើលផ្លូវ។
ស្ថិតក្នុងស្ថានការណ៍បែបនេះគាត់បានប្រវាយប្រតប់ជាមួយពួកចោរ ហើយពួកចោរបានវាយគាត់នឹងខ្នងពូថៅ និងកាប់នឹងកាំបិតខ្វែវក្នុងបំណងសម្លាប់ ប៉ុន្តែគាត់បានចាប់ពូថៅ និងកាំបិតជាប់ ហើយបានប្រទាញប្រទង់ជាមួយក្រុមចោរដែលមានគ្នា២នាក់។ ពេលនោះចោរម្នាក់បានវាយគាត់មួយខ្នងពូថៅចំគុម្ពត្រចៀកខាងឆ្វេងបណ្តាលឱ្យបែក ព្រមទាំងដាល់មកលើផ្ទៃមុខ និងក្បាលរបស់គាត់ជាច្រើនដៃបណ្តាលឱ្យជាំ។ ឃើញដូច្នេះកូនស្រីគាត់បានស្រែកខ្លាំងៗឱ្យគេជួយ ក៏ត្រូវចោរគប់នឹងពូថៅត្រូវចំគន្លាក់ជើងខាងស្តាំបណ្តាលឱ្យដាច់រយះប្រហែល២សង្ទីម៉ែត្ររួចហើយគប់មួយដបទឹកម្ទេសទៀតតែខុស។ ដោយឮសំឡេងកូនស្រីស្រែក អ្នកជិតខាងបានរត់មកសួរពេលនោះពួកចោរបាននាំគ្នារត់គេចខ្លួនអស់ ចំពោះទ្រព្យសម្បតិ្តមិនមានបាត់បង់អ្វីឡើយ។
លោកវរសេនីយ៍ត្រីរ៉ែម វីរៈ បានបញ្ជាក់បន្ថែមថា ក្រោយពីទទួលបានព័ត៌មាននេះភ្លាមលោកបានចាត់កំលាំងចុះទៅផ្ទះកើតហេតុទាំងយប់ ក្រោយពេលពួកចោរចេញផុតបន្តិចប៉ុណ្ណោះ។ សមត្ថកិច្ចបានស្រាវជ្រាវរកឃើញវត្ថុតាងដែលក្រុមចោរបន្សល់ទុកមានស្បែកជើងផ្ទាត់ចំនួន៣គូនិងពូថៅ១នៅផ្ទះកើតហេតុ។ ទាក់ទិននឹងករណីប្លន់ខាងលើនេះ សមត្ថកិច្ចក្តាប់បានមុខសញ្ញាខ្លះហើយនិងសង្ឃឹមថា នឹងអាចបកស្បែកពួកចោរនេះនាពេលខាងមុខ ៕
ចែករំលែកព័តមាននេះ