ខេត្តកំពង់ចាម ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី តែងតែផ្តល់ព្រហ្មវិហារធម៌ដល់កូនភ្លោះ៣នៅគ្រប់ទិសទីក្នុងប្រទេសកម្ពុជា ។ ជាថ្មីទៀតស្ត្រីឈ្មោះសាំង សុដានី អាយុ២៩ឆ្នាំ រស់នៅភូមិត្រពាំងរាំង ឃុំសូសែន ស្រុកព្រៃឈរ ដែលមានផ្ទៃពោះទើបតែបាន៧ខែកន្លះប៉ុណ្ណោះ ក៏ឈឺពោះសម្រាលបានកូនស្រីដល់ទៅ៣នាក់ ដែលជាកូនដំបូង កាលពីវេលាម៉ោង១១ និង៣០នាទីយប់ថ្ងៃទី៦ សីហា នៅក្នុងមន្ទីរពេទ្យបង្អែកខេត្ត ។
ក្រោយពីសម្រាលកូនហើយសុខភាពរបស់ម្តាយមានសភាពទ្រុឌទ្រោម រួមទាំងកូនទី២ ត្រូវក្រុមគ្រូពេទ្យកំពុងតែយកចិត្តទុកដាក់ធ្វើការសង្គ្រោះ ។បុរសឈ្មោះទុន ចាន់ថូ អាយុ៣៣ឆ្នាំ ជាឪពុកកូនភ្លោះស្រីទាំង៣នាក់ បានប្រាប់កោះសន្តិភាពថា រូបគាត់បានរៀបការជាមួយភរិយាតាមប្រពៃណី ហើយបានប្រកបរបរជាកសិករនិងពេលទំនេរធ្វើជាកម្មករសំណង់ដើម្បីយកប្រាក់មកដោះស្រាយជីវភាពទាំងត្រដាបត្រដួសនៅក្រោមដំបូលផ្ទះតៀមតូចមួយរហូតដល់រយៈពេល៣ឆ្នាំ ទើបប្រពន្ធគាត់មានផ្ទៃពោះ ។
បុរសជាឪពុកកូនភ្លោះបានប្រាប់បន្តថា ពេលប្រពន្ធមានផ្ទៃពោះ៤ខែគាត់ក៏នាំទៅមើលអេកូក្នុងគ្លីនិកមួយនៅស្គន់ ស្រុកជើងព្រៃ គ្រាន់តែដឹងថាមានកូនភ្លោះ២ប៉ុណ្ណោះ តែមិនដឹងថា ប្រុស ឬស្រីនោះទេ ។ លុះបាន៥ខែទៅពិនិត្យមើលម្តងទៀតនៅកន្លែងដដែលទើបដឹងថាជាកូនស្រី និងមួយទៀតមើលមិនដឹងនោះទេ ដោយសារតែបាំងគ្នា។ ពេលប្រពន្ធមានផ្ទៃពោះកូនភ្លោះនេះក៏បានសុបិនឃើញគេឱ្យត្បូងពេជ្រមួយក្បង់ដៃ ធ្វើឱ្យប្រពន្ធគាត់ត្រេកអរណាស់ និងបានយកពេជ្រ១គ្រាប់ទៅឱ្យស្ត្រីម្នាក់ឈ្មោះអូន រស់នៅភូមិ-ឃុំជាមួយគ្នាដែលមានផ្ទៃពោះដែរ ។
នៅព្រឹកថ្ងៃទី៥ សីហា ប្រពន្ធគាត់បានឈឺពោះក៏ប្រញាប់រករថយន្តដឹកមកកាន់មន្ទីរពេទ្យបង្អែកខេត្តរហូតមកដល់វេលាម៉ោង១១ និង៣០នាទីយប់ថ្ងៃទី៦ សីហា ប្រពន្ធគាត់ក៏សម្រាលបានកូនភ្លោះស្រីដល់ទៅ៣នាក់ និងបានដាក់ឈ្មោះទី១-ឈ្មោះរ៉ាវី មានទម្ងន់១,៧គីឡូក្រាម ទី២-ឈ្មោះរស្មី មានទម្ងន់១,៨គីឡូក្រាម និងទី៣-ឈ្មោះរ៉ាឌី មានទម្ងន់១,៣គីឡូក្រាម ។
តាមគ្រូពេទ្យខេត្តបានប្រាប់ថា ស្ត្រីជាម្តាយត្រូវគ្រូពេទ្យវះកាត់ទើបអាចបង្កើតកូនភ្លោះទាំង៣នោះបាន ។ ក្រោយពីសម្រាលកូនហើយសុខភាពគាត់មានសភាពទ្រុឌទ្រោម តែត្រូវបានគ្រូពេទ្យយកចិត្តទុកដាក់សង្គ្រោះហើយ ។ ឯកូនភ្លោះទាំង៣ត្រូវបានយកទៅដាក់ចិញ្ចឹមនៅក្នុងកែវវិទ្យាសាស្ត្រក្នុងនោះកូនទី២ មានបញ្ហាសុខភាពក៏ត្រូវបានធ្វើការសង្គ្រោះដែរ ៕
ចែករំលែកព័តមាននេះ