ខេត្តសៀមរាប ៖ ក្នុងក្របខណ្ឌបម្រើសេវាជូនអថិតិជន ធនាគារពាណិជ្ជកម្មក្រៅប្រទេសនៃកម្ពុជា(FTB)សាខាទី៥ មានទីតាំងស្ថិតនៅតំបន់ប្រជុំជនផ្សារចាស់ ក្នុងភូមិមណ្ឌល១ សង្កាត់សា្វយដង្គំ ក្រុងសៀមរាប ត្រូវបានប្រារព្ធពិធីសម្ពោធដាក់ឱ្យដំណើរការជាផ្លូវការរបស់ខ្លួន កាលពីព្រឹកថ្ងៃទី៣ សីហា កន្លងទៅនេះ ។ ពិធីនេះប្រព្រឹត្តធ្វើឡើងក្រោមអធិបតីភាពលោកជំទាវ ច័ន្ទ ថាណា ទេសាភិបាលរងតំណាង លោកជា ចាន់តូ ទេសាភិបាលធនាគារជាតិនៃកម្ពុជា ដោយមានការចូលរួមផងដែរពីសំណាក់លោកប៊ុន ថារិទ្ធ អភិបាលរងខេត្តសៀមរាប អ្នកឧកញ៉ាសៀង ណំា តំណាងរាស្ត្រមណ្ឌលសៀមរាប ព្រមទាំងអស់លោក-លោកស្រីជាថា្នក់ដឹកនាំតំណាងអាជា្ញធរជាច្រើនរូបទៀត ។
លោកហ្គី អានវ៉ានិថ អគ្គនាយកធនាគារ FTB ថ្លែងឱ្យដឹងថា នេះជាព្រឹត្តិការណ៍ថ្មីមួយទៀតរបស់ធនាគារFTB ដែលបានប្រារព្ធពិធីសម្ពោធសាខាទី៥របស់ខ្លួននៅក្នុងខេត្តសៀមរាបនេះ បន្ទាប់ពីបានបើកសម្ពោធសាខានៅក្នុងបរិវេណកំពង់ផែស្វ័យតភ្នំពេញ ជានិមិត្តរូបមួយទៀតនៃការបោះជំហានដ៏សំខាន់ឆ្ពោះទៅការធ្វើឱ្យសម្រេចចក្ខុវិស័យរបស់ធនាគារFTB ។ លោកអគ្គនាយកធនាគារFTB សង្ឃឹមថា សាខាទី៥របស់ធនាគារFTBជាកត្តាមួយជួយជំរុញអាជីវកម្ម និងកម្រិតជីវភាពប្រជាពលរដ្ឋក្នុងខេត្តសៀមរាបឱ្យបានរីកចម្រើន និងមានវិបុលភាពកាន់តែទូលំទូលាយឡើងជាមួយនិងវត្តមានដំបូង និងមានទំនុកចិត្តជាងគេនៅក្នុងព្រះរាជាណាចក្រកម្ពុជា ។
លោកជំទាវ ច័ន្ទ ថាណា ទេសាភិបាលរងធនាគារជាតិនៃកម្ពុជាមានប្រសាសន៍ឱ្យដឹងថា វិស័យធនាគារមានការអភិវឌ្ឍ និងរីកចម្រើនគួរឱ្យកត់សម្គាល់ ទាំងវិសាលភាព និងទំហំប្រតិបត្តិការ និងបានដើរតួនាទីជាស្នូលក្នុងការអភិវឌ្ឍសេដ្ឋកិច្ចជាតិ ។ លោកជំទាវទេសាភិបាលរងធនាគារជាតិនៃកម្ពុជាថ្លែងបញ្ជាក់ឱ្យដឹងដែរថា ផ្នែកវិសាលភាពនាពេលបច្ចុប្បន្ននេះ ធនាគារពាណិជ្ជកម្មមានចំនួន៣២ ធនាគារឯកទេសចំនួន៧ គ្រឹះស្ថានមីក្រូហិរញ្ញវត្ថុចំនួន៣២ ក្នុងនោះគ្រឹះស្ថានចំនួន៧ ត្រូវបានអនុញ្ញាតឱ្យទទួលប្រាក់បញ្ញើពីសាធារណជន ។ ប្រតិបត្តិករឥណទានជនបទដែលបានចុះបញ្ជីមានចំនួន៣០ ក្រុមហ៊ុនភតិសន្យាហិរញ្ញវត្ថុមានចំនួន១ តតិភាគីចំនួន១ ការិយាល័យព័ត៌មានឥណទានមានចំនួន១ និងមានអាជីវកម្មប្តូរប្រាក់ចំនួន១.៥១២ ក្នុងនោះមានអាជ្ញាប័ណ្ណចំនួន៤៧ ។ ចំពោះទំហំប្រតិបត្តិការវិញ ប្រាក់បញ្ញើក្នុងប្រព័ន្ធធនាគារបានកើនឡើង២២% និងឥណទានដល់វិស័យឯកជនបានកើនឡើង៣៤%ធៀបនឹងរយៈពេលដូចគ្នានាឆ្នាំ២០១១ ។
ចំនួនអ្នកផ្ញើប្រាក់កើនដល់ជាង១លាននាក់ និងអ្នកខ្ចីឥណទានកើនដល់៤៤៣ពាន់នាក់ ធៀបនឹង២៨៦ពាន់នាក់ក្នុងគ្រាដូចគ្នានៅឆ្នាំ២០១១ ។ ការវិវត្តរីកចម្រើននេះ គឺគួបផ្សំនឹងការអនុវត្តវិធានការប្រុងប្រយ័ត្នផងនោះ បានធ្វើឱ្យឥណទានមិនដំណើរការ (NPL) ថយជាលំដាប់មកនៅត្រឹម២,៤%នៃកញ្ចប់ឥណទានសរុប ។
លោកជំទាវទេសាភិបាលរងធនាគារជាតិនៃកម្ពុជាថ្លែងបញ្ជាក់បន្តថា ប្រការដែលគួរកត់សម្គាល់នៅដើមឆ្នាំ២០១២នេះ គ្រឹះស្ថានធនាគារបានពង្រីកបណ្តាញសាខារបស់ខ្លួន១១កន្លែងក្នុងប្រទេស និងបានបើកការិយាល័យតំណាងរបស់ខ្លួននៅបរទេស គឺប្រទេសឡាវ និងប្រទេសភូមា ផងដែរ ។ ចំពោះផលិតផលហិរញ្ញវត្ថុក្នុងវិស័យធនាគារបានបន្តរីកចម្រើនជាលំដាប់ ដូចជាម៉ាស៊ីន ATM បច្ចុប្បន្នមានចំនួន៦១៣កន្លែង រួមទាំងសេវាប័ណ្ណឥណពន្ធ ប័ណ្ណឥណទាន សេវាសន្សំជាមាស សេវាធនាគារ E-Banking និងប្រតិបត្តិការធនាគារចល័តជាដើម ក៏មានការរីកចម្រើនឥតឈប់ឈរផងដែរ ។ លទ្ធផលសម្រេចបានទាំងនេះ គឺជាការឆ្លើយតបទៅនឹងការអនុវត្តយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ក៏ដូចជាយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ៕
ចែករំលែកព័តមាននេះ