រាជធានីភ្នំពេញ ៖ជនសង្ស័យម្នាក់ដែលប៉ូលិសអះអាងថាជាមន្ត្រីយោធា បានត្រូវឃាត់ខ្លួន កាលពីវេលាម៉ោង១០និង៤៥នាទីយប់ថ្ងៃទី៦ សីហា ខណៈមន្ត្រីយោធារូបនេះកំពុងធ្វើសកម្មភាពចែកចាយគ្រឿងញៀននៅមុខភោជនីយដ្ឋានយីហោសួនរីករាយ ដែលមានទីតាំងនៅតាមបណ្តោយផ្លូវលេខ១៩៨៦ ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
អធិការប៉ូលិសខណ្ឌសែនសុខលោកម៉ក់ ហុងដែលចុះប្រតិបត្តិការដោយផ្ទាល់ និងឃាត់ខ្លួនជនសង្ស័យខាងលើបានឱ្យដឹងថា ជនសង្ស័យរូបនេះឈ្មោះសុវណ្ណារិទ្ធ អាយុ២៦ឆ្នាំ ទើបតែចូលរៀននៅសាលានាយទាហាននៅត្មាតពង ខេត្តកំពង់ស្ពឺ និងមានទីលំនៅក្នុងឃុំគោកឃ្លៀង សង្កាត់ភ្នំពេញថ្មី ខណ្ឌសែនសុខ។ ជននេះត្រូវបានតាមប្រមាញ់ជាច្រើនថ្ងៃមកហើយទើបមានភស្តុតាងជាក់ស្តែងខណៈធ្វើសកម្មភាពចែកចាយគ្រឿងញៀននៅតាមភោជនីយដ្ឋានផ្តល់ទៅឱ្យភ្ញៀវ ។ លោកបន្តថា ថ្នាំញៀនដែលសមត្ថកិច្ចដកហូតបានមានចំនួន២ថង់តូចជាប្រភេទម៉ាទឹកកក ។
ក្រោយពីឃាត់ខ្លួន ជនសង្ស័យជាមន្ត្រីយោធារូបនេះ ត្រូវបានបញ្ជូនទៅអធិការដ្ឋានខណ្ឌសែនសុខទាំងយប់ និងកំពុងស្រាវជ្រាវរកមេខ្លោងបន្តទៀត ប៉ុន្តែក្រុមអ្នកសេពគ្រឿងញៀនបានគេចខ្លួនអស់ ៕
ចែករំលែកព័តមាននេះ