រាជធានីភ្នំពេញ ៖ មន្ត្រីយោធាថ្នាក់វរសេនីយ៍ឯកម្នាក់ត្រូវប៉ូលិសប៉ុស្តិ៍ច្រាំងចំរេះទី២សហការជាមួយប្រជាការពារសង្កាត់ចាប់ខ្លួន កាលពីវេលាម៉ោង៨និង៣០នាទីយប់ ថ្ងៃទី៦ សីហា បន្ទាប់ពីមន្ត្រីយោធារូបនោះផឹកស៊ីស្រវឹងមានទំនាស់ជាមួយអ្នកជិតខាងហើយដកកាំភ្លើងខ្លីម៉ាករ៉ូឡូបាញ់គំរាមគូទំនាស់១គ្រាប់បង្កឱ្យមានការភ្ញាក់ផ្អើលយ៉ាងខ្លាំង ។
មន្ត្រីយោធាដែលបង្កការផ្ទុះអាវុធហើយត្រូវប៉ូលិសមូលដ្ឋានចាប់ខ្លួននេះឈ្មោះ ពេជ្រ វុត្ថា ភេទប្រុស អាយុ៣៥ឆ្នាំ មានឋានន្តរស័ក្តិវរសេនីយ៍ឯក(ស័ក្តិ៥) ជានាយរងការិយាល័យបច្ចេកទេសនៃសាកលវិទ្យាល័យការពារជាតិមានទីលំនៅក្នុងសង្កាត់ច្រាំងចំរេះទី២ ខណ្ឌឫស្សីកែវ ។
តាមព័ត៌មានឱ្យដឹងថា នៅយប់ថ្ងៃកើតហេតុលោកវរសេនីយ៍ឯក ពេជ្រ វុត្ថា បាននាំគ្នាផឹកស៊ីក្នុងផ្ទះរបស់ខ្លួនជាមួយមិត្តភក្តិ៣ទៅ៤នាក់ ។ នៅពេលផឹកស្រវឹងក៏មានទំនាស់ពាក្យសម្តីជាមួយអ្នកជិតខាងឈ្មោះលឹម ប៊ុនលាង តែគេពុំដឹងថាទាស់គ្នារឿងអីទេតែខ្លះថា ដោយសារការផឹកស៊ីឡូឡារំខានដល់អ្នកជិតខាង ។ បន្ទាប់ពីមានទំនាស់គ្នាលោកវរសេនីយ៍ឯកដែលត្រូវគេអះអាងថា ស្រវឹងធ្លាក់ភ្នែកផងនោះ បានដកកាំភ្លើងខ្លីម៉ាករ៉ូឡូមានលេខ០០០៣៣១បាញ់១គ្រាប់គំរាមគូទំនាស់តែពុំបង្កឱ្យនរណាម្នាក់រងរបួសឡើយ ។
តាមព័ត៌មានបានឱ្យដឹងបន្តថា ក្រោយពេលឮស្នូរផ្ទុះអាវុធនៅយប់នោះប៉ូលិសប៉ុស្តិ៍រួមជាមួយប្រជាការពារបានចុះទៅអន្តរាគមន៍ឃាត់ខ្លួនជនបង្កនាំមកប៉ុស្តិ៍ដើម្បីសួរនាំតែដោយសារគាត់ជាមន្ត្រីយោធាក៏បានបញ្ជូនទៅកាន់បញ្ជាការដ្ឋានកងរាជអាវុធហត្ថខណ្ឌឫស្សីកែវ រួចបញ្ជូនបន្តទៅកាន់ទីបញ្ជាការកងរាជអាវុធហត្ថរាជធានីភ្នំពេញដើម្បីចាត់ការតាមច្បាប់ ។ តាមព័ត៌មានឱ្យដឹងទៀតថា មន្ត្រីយោធារូបនោះឱ្យតែស្រវឹងកាចខ្លាំងណាស់ចូលចិត្តយកកាំភ្លើងមកភ្ជង់គេឯងតែទីបំផុតត្រូវទឹកភ្នែកពេលសមត្ថកិច្ចបញ្ជូនទៅដាក់ទ្រុង ៕
ចែករំលែកព័តមាននេះ