ខេត្តកំពង់ចាម ៖ គ្រូពេទ្យម្នាក់ឈ្មោះធី ភេទប្រុស អាយុ៥៥ឆ្នាំ ពិតជាសំណាងមួយក្នុងមួយម៉ឺនគ្រោះថ្នាក់ ដោយសារតែរថយន្តដឹកគ្រឿងទេសធុនធំមួយគ្រឿងមិនបានកិន ខណៈដែលគាត់ជិះម៉ូតូសេ១២៥ ស៊េរី២០០៧ដួលនៅលើផ្លូវជាតិលេខ៧ ពីមុខរថយន្តនៅចំណុចភូមិសេនសុនជើង ឃុំស្រងែ ស្រុកព្រៃឈរ កាលពីវេលាម៉ោង៧និង៤៥នាទីយប់ថ្ងៃទី៣១ កក្កដា កន្លងមកនេះ ដែលរថយន្តបើកពីលើ តែបែរជាមិនបានកិនស្លាប់ ។
អ្វីដែលគួរឱ្យកត់សម្គាល់ទៀតនោះ គឺខុសគ្នាតែរយៈពេល១០នាទីប៉ុណ្ណោះ ចម្ងាយពីគ្នាប្រហែលជា៥០ម៉ែត្រ យុវជន២នាក់ជិះម៉ូតូសេ១២៥ ពណ៌ខ្មៅ ស៊េរី២០១១ ដួលបោកក្បាលទៅនឹងថ្នល់ បណ្តាលឱ្យរងរបួសធ្ងន់សន្លប់ម្នាក់ ត្រូវបានដឹកទៅសង្គ្រោះនៅរាជធានីភ្នំពេញទាំងយប់ ។
លោកអនុសេនីយ៍ឯក សេង ណា ប្រធានការិយាល័យចរាចរណ៍នៃអធិការដ្ឋាននគរបាលស្រុកព្រៃឈរ ប្រាប់កោះសន្តិភាពឱ្យដឹងថា គ្រោះថ្នាក់ទី១ គឺលោកគ្រូពេទ្យម្នាក់រស់នៅស្រុកជើងព្រៃ បានជិះម៉ូតូម្នាក់ឯងពាក់មួកសុវត្ថិភាព ក្នុងទិសដៅពីកើតទៅលិច ស្របពេលដែលមេឃកំពុងភ្លៀងផង លុះជិះដល់ត្រង់ភូមិសេនសុនជើង ក៏រអិលល្បាក់ថ្នល់កៅស៊ូដែលអ៊ុតរួចមួយ
ចំហៀងទៀតនៅសល់មួយចំហៀងទៀតបណ្តាលឱ្យដួលផ្លោងចេញពីម៉ូតូ ។ ស្របពេលនោះក៏មានរថយន្តដឹកគ្រឿងទេសមួយគ្រឿងបើកស្របទិសគ្នាមកពីក្រោយដែលបើកបរដោយឈ្មោះយ៉ាន ហេង ភេទប្រុស អាយុ២៥ឆ្នាំ រស់់នៅភូមិតាឡាច ឃុំតាឡាច ស្រុកព្រៃកប្បាស ខេត្តតាកែវ ដែលមានស្មារតីរឹងមាំបានព្យាយាមបួងចង្កូតរថយន្តឱ្យអ្នកខ្ទាតពីម៉ូតូនៅចំពីក្រោមកណ្តាលរថយន្ត ដើម្បីបញ្ជៀសគ្រោះថ្នាក់ ។
ពេលបើកផុតបន្តិចក៏បានចាប់ហ្វ្រាំងធ្វើឱ្យរថយន្តរអិលកង់ម្ខាងធ្លាក់ទៅចិញ្ចើមថ្នល់ ហើយអ្នកបើកបររថយន្តបានពន្លត់ម៉ាស៊ីនរួចប្រញាប់បើកទ្វាររថយន្តរត់គេច តែបានមួយសន្ទុះក្រោយមកពេលសួរនាំអ្នកភូមិនៅក្បែរនោះថា រថយន្តរបស់ខ្លួនមិនបានកិនមនុស្សទេ ក៏ត្រឡប់មករករថយន្តវិញ ។លោកអនុសេនីយ៍ឯក សេង ណា បញ្ជាក់ថា ពេលគ្រូពេទ្យដែលរងគ្រោះមិនទាន់ត្រូវបានរថយន្តសាមុយដឹកចេញទៅកាន់មន្ទីរពេទ្យផង បែរជាមានយុវជនពីរនាក់ជិះម៉ូតូមួយគ្រឿងម៉ាកសេ១២៥ ស៊េរី២០១១ ពណ៌ខ្មៅ ជិះពីលិចទៅកើតផុតពីកន្លែងគ្រូពេទ្យជួបគ្រោះថ្នាក់ប្រហែល៥០ម៉ែត្រ ក៏រអិលនឹងថ្នល់កៅស៊ូដែលគេអ៊ុតបានមួយចំហៀងដួល បណ្តាលឱ្យយុវជនឈ្មោះសេង ប៊ុនហេង អាយុ២៤ឆ្នាំ រស់នៅភូមិតាកុច ឃុំស្រងែ ស្រុកព្រៃឈរ ជាអ្នកឌុប បោកក្បាលនៅនឹងថ្នល់របួសធ្ងន់សន្លប់ត្រូវបានដឹកទៅសង្គ្រោះនៅរាជធានីភ្នំពេញទាំងយប់ ។
ជារឿយៗគ្រោះថ្នាក់កើតឡើងជាញឹកញាប់ ភាគច្រើនអ្នកជិះម៉ូតូតែងតែដួលដោយសារតែរអិលនឹងគែមថ្នល់កៅស៊ូដែលគេអ៊ុតខ្ពស់ទាប បណ្តាលឱ្យមានគ្រោះថ្នាក់ដូចករណីខាងលើនេះ។ ជាមួយនោះដែរ ក្នុងនាមសមត្ថកិច្ចលោកសេង ណា បានសំណូមពរឱ្យក្រសួងសាធារណៈការ និងដឹកជញ្ជូន ដែលទទួលរ៉ាប់រងការអ៊ុតកៅស៊ូក្រាលថ្នល់មេត្តាជួយសម្រួល ធ្វើយ៉ាងណាបញ្ជៀសគ្រោះថ្នាក់កុំឱ្យអ្នកធ្វើដំណើរដោយម៉ូតូដួល ដោយសារគែមថ្នល់បែបនេះ ៕
ចែករំលែកព័តមាននេះ