ខេត្តកំពត ៖ ឈ្មួញរកស៊ីឈើខុសច្បាប់នៅក្នុងទឹកដីស្រុកជុំគិរី កំពុងដំឡើងម៉ាស៊ីនអារឈើជាច្រើនកន្លែងដែលតាមប្រភពខ្លះថា មានដល់ទៅ៩កន្លែង ។ តាមសេចក្តីរាយការណ៍ពីស្រុកជុំគិរីឱ្យដឹងថា រោងម៉ាស៊ីនអារនិងច្រៀកឈើទាំង៩កន្លែងនោះ ត្រូវបានឈ្មួញរកស៊ីឈើខុសច្បាប់ដំឡើងក្នុងឃុំពីរ គឺឃុំត្រពាំងរាំង និងឃុំស្រែចែង ហើយក្នុងឃុំទាំងពីរនេះ រោងម៉ាស៊ីនច្រើនជាងគេ គឺនៅក្នុងឃុំត្រពាំងរាំង ។
ប្រភពព័ត៌មានបានរាយកាណ៍ឱ្យដឹងទៀតថា ឈើដែលដឹកចូលយកមកអារនៅក្នុងរោងម៉ាស៊ីនទាំង៩កន្លែងក្នុងស្រុកជុំគិរីនេះ គឺគេដឹកចេញពីតំបន់តាកែនកោះស្លា ហើយការដឹកជញ្ជូនឈើតាមរទេះគោ-ក្របីនេះ ក្នុងមួយថ្ងៃៗមានរាប់សិបរទេះ ។ ថៅកែដែលជាម្ចាស់រោងម៉ាស៊ីនហ៊ានទទួលទិញឈើច្រើនហើយមានទ្រង់ទ្រាយធំជាងគេមានតែម្នាក់ទេ នៅស្រុកជុំគិរីនេះ ។ ថៅកែរូបនេះគ្មានញញើតនឹងការរកស៊ីឈើខុសច្បាប់ឡើយ ពីព្រោះគេឃើញទីតាំងរោងម៉ាស៊ីនអារឈើរបស់ថៅកែរូបនេះ មានជីកស្រះមួយយ៉ាងធំនៅជិតរោងម៉ាស៊ីន ដោយដាក់ឈើរាប់សិបម៉ែត្រគូបដែលអាររួចហើយរថយន្តមកដឹកជញ្ជូនចេញមិនទាន់ ។
ថៅកែរូបនេះ បាននិយាយប្រាប់អ្នកកាសែតថា ស្រុកជុំគិរី បើអ្នកកាសែត ឬសមត្ថកិច្ចស្ថាប័នណាចង់ចូលទៅស៊ើបរឿងឈើខុសច្បាប់ត្រូវមានទំនាក់ទំនងជាមួយអាជ្ញាធរជាមុន ដើម្បីការពារសុវត្ថិភាព ឬបញ្ហាសន្តិសុខផ្សេងៗនៅក្នុងតំបន់នេះ ដែលពលរដ្ឋភាគច្រើនគឺរកស៊ីឡើងភ្នំកាប់ឈើធ្វើជាមុខរបររបស់គាត់ ។ ជុំវិញករណីកាប់ឈើខុសច្បាប់ចេញពីតំបន់ព្រៃតាកែនកោះស្លា ដឹកមកដាក់អារច្រៀកតាមរោងម៉ាស៊ីនក្នុងស្រុកជុំគិរីនេះ លោកស៊ុយ ធា ប្រធានមន្ទីរបរិស្ថានខេត្ត កាលពីថ្ងៃអាទិត្យទី៥ សីហា បានថ្លែងថា ការកាប់បំផ្លាញព្រៃឈើធ្វើអាជីវកម្មខុសច្បាប់នៅតំបន់ព្រៃភ្នំតាកែនកោះស្លា ស្រុកឈូក និងដឹកមកធ្វើសកម្មភាពអារច្រៀកក្នុងស្រុកជុំគិរីនេះ ពីមុនលោកដឹងថាមានមែន ប៉ុន្តែបច្ចុប្បន្នលោកពុំបានដឹងថា សកម្មភាពនេះនៅមានទេ ។ បើនៅមាន លោកនឹងធ្វើផែនការដើម្បីសុំគោលការណ៍ពីលោកអភិបាលខេត្ត ធ្វើការទប់ស្កាត់។ ម្យ៉ាងទៀត លោកទើបនឹងទទួលតួនាទីនេះផង ដូច្នេះលោកក្តាប់ពុំទាន់ជុំទេ តែលោកនឹងសុំគោលការណ៍ពីខេត្ត ចុះបង្ក្រាបករណីខាងលើឱ្យខាងតែបាន ។
យោងតាមប្រភពរាយការណ៍បានអះអាងថា ករណីនេះផ្អាកសកម្មភាពតែមួយរយៈខ្លីប៉ុណ្ណោះដូចគេវាយស្មៅបង្អើលពស់ ។ ផ្ទុយទៅវិញ បច្ចុប្បន្នក្រុមឈ្មួញដំឡើងរោងម៉ាស៊ីនអារ និងច្រៀកឈើនៅក្នុងស្រុកជុំគិរីនេះ មានសកម្មភាពផុលផុស ដោយគ្មានញញើតនឹងបទបញ្ជាលេខ០១ របស់សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលបន្តិចសោះ ។
ក្រុមឈ្មួញរកស៊ីឈើខុសច្បាប់ហ៊ានធ្វើសកម្មភាពយ៉ាងផុលផុសនេះ គឺពួកគេអាងអ្នកមានអំណាចម្នាក់នៅពីក្រោយ ។
មជ្ឈដ្ឋាននានា បានវាយតម្លៃថា បើគ្មានអំពើឃុបឃិតទទួលប្រាក់ពីអ្នកកាប់ឈើខុសច្បាប់ទេម៉្លេះអ្នករកស៊ីកាប់ឈើខុសច្បាប់ទាំងនោះមិនហ៊ានចូលកាប់ឈើឡើយ ។ មិនអាចស្វែងរកការបំភ្លឺពីអាជ្ញាធរនៅតំបន់នោះបានទេ ជុំវិញករណីខាងលើនេះ ៕
ចែករំលែកព័តមាននេះ