រាជធានីភ្នំពេញ ៖ បន្ទាប់ពីបានប្រកាសចូលកាន់តំណែងជាចៅសង្កាត់អាណត្តិទី៣ កាលពីថ្ងៃទី៣ កក្កដា កន្លងមក លោក ពៅ ហួត ចៅសង្កាត់ច្បារអំពៅទី១ និងក្រុមប្រឹក្សាសង្កាត់ទាំងមូល បានបង្ហាញនូវសមិទ្ធផលសំខាន់ៗ ដែលសមាជិកក្រុមប្រឹក្សាសង្កាត់សម្រេចបាន កាលពីក្នុងអាណត្តិទី២ (ឆ្នាំ២០០៧-ឆ្នាំ២០១២) ។
សង្កាត់ច្បារអំពៅទី១ មានផ្ទៃក្រឡាសរុប ចំនួន ៣៨ហិកតា និង២០អា ចែកចេញជា៣ភូមិ និង៥៨ក្រុម មានប្រជាពលរដ្ឋ ស្នាក់នៅ១.៨៧៦គ្រួសារ ចំនួនមនុស្សសរុប ៩.៨៥០នាក់ (ស្រី៥.៣០៣នាក់) ប្រជាពលរដ្ឋដែលមានអាយុ១៨ឆ្នាំឡើងមានចំនួន ៧.៥៦៨នាក់ (ស្រី៤.០៩១នាក់) ។ កាលពីថ្ងៃទី១ មេសា ២០០៧ ដែលជាថ្ងៃបោះឆ្នោតក្រុមប្រឹក្សាសង្កាត់អាណត្តិទី២ ប្រជាពលរដ្ឋបានបោះឆ្នោតជូនគណបក្សប្រជាជនកម្ពុជា ជាប់ឆ្នោតជាចៅសង្កាត់ ហើយចំពោះការអនុវត្តផែនការការងាររយៈ៥ឆ្នាំ កន្លងមក គឺមានដូចជាសង្កាត់បានបង្កើតសហគមន៍ក្រីក្រចំនួន៤ ដើម្បីដោះស្រាយផលលំបាកផ្សេងៗជូនប្រជាពលរដ្ឋដែលជួបការលំបាក ។
លោក ពៅ ហួត ចៅសង្កាត់ច្បារអំពៅទី១ បានបង្កើតបទបញ្ជាផ្ទៃក្នុងសម្រាប់ក្រុមប្រឹក្សាសង្កាត់ ក្នុងការបំពេញភារកិច្ចរដ្ឋបាលជូនប្រជាពលរដ្ឋម្ចាស់ឆ្នោត និងដើម្បីកាត់បន្ថយភាពអសកម្មនានា ។ សង្កាត់បានបង្កើតអង្គប្រជុំគណៈបញ្ជាការឯកភាពសង្កាត់រៀងរាល់ខែ និងបានសហការគ្នាល្អរវាងនគរបាលប៉ុស្តិ៍រដ្ឋបាលជាមួយកម្លាំងប្រជាការពារ ធ្វើយ៉ាងណាយកចិត្តទុកដាក់ទប់ស្កាត់បទល្មើសនានាក្នុងមូលដ្ឋាន ។ចំពោះការអភិវឌ្ឍហេដ្ឋារចនាសម័្ពន្ធក្នុងមូលដ្ឋាន ជារៀងរាល់ឆ្នាំ រាជរដ្ឋាភិបាលក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់ថវិកាវិភាជន៍មកសង្កាត់ដើម្បីធ្វើការអភិវឌ្ឍក្នុងនោះថវិកាសម្រាប់ចំណាយលើរដ្ឋបាលទូទៅមានចំនួន១០១.៥៨៩.២០០រៀល ថវិកាមូលនិធិសម្រាប់ចំណាយលើការអភិវឌ្ឍមានចំនួន ២៨០.៧៤៨.៨០០រៀល ការចូលរួមថវិកាបដិភាគរបស់ប្រជាពលរដ្ឋ១០% ស្មើនឹង ២៣.៨០២.២១៦រៀល ស្ថាបនាផ្លូវបេតុងបានចំនួន១២ខ្សែប្រវែង ១.៥៦១ម៉ែត្រ ដាក់លូចំនួន១ខ្សែ ប្រវែង៩២ម៉ែត្រ ។
ការកសាងផ្លូវតាមរូបមន្ត ៥០+៥០ ក្រុមប្រឹក្សាស្ថាបនាបានចំនួន១៣ខ្សែ ។ ថវិការបស់សប្បុរសជននិងមូលនិធិ សង្កាត់ ស្ថាបនាផ្លូវបេតុងបាន៤ខ្សែ ។ ដាក់អំពូលភ្លើងបំភ្លឺផ្លូវបានចំនួន៦០អំពូល ដោយសាលារាជធានីភ្នំពេញ ជាអ្នកចំណាយថវិកា ៕
ចែករំលែកព័តមាននេះ