រាជធានីភ្នំពេញ ៖ ក្រោយពីឆ្លងកាត់នូវវគ្គជម្រុះប្រកួតប្រជែងបង្ហាញសមត្ថភាពលើគ្រប់វិញ្ញាសានៃប្រភេទបទចម្រៀងចំនួន៩សប្ដាហ៍ នៅរាត្រីថ្ងៃទី២៧ ខែកក្កដា កន្លងទៅនេះ កម្មវិធីប្រកួតតារាចម្រៀងឯក THE IDOL បេះដូងខ្មែរ រកឃើញអ្នកទទួលជ័យលាភីហើយ គឺបាន ទៅលើ THE IDOL I៤ កែវ សុបញ្ញា ដែលជាបេក្ខនារី THE IDOL នៅរាជធានីភ្នំពេញ។
ក្នុងចំណោមអ្នកប្រមាញ់ក្ដីស្រមៃចំនួន៥រូប នៃកម្មវិធីប្រកួត THE IDOLទាំងអស់ត្រូវបង្ហាញសមត្ថភាពក្នុងទម្រង់ជាកម្មវិធីប្រគំតន្ដ្រីខ្នាតតូចជាមួយនឹងបទចម្រៀងចំនួន២បទ ច្រៀងនិងសម្ដែងយ៉ាងណាដែលអាចផ្ដល់នូវការកម្សាន្ត និងភាពសប្បាយរីករាយចំពោះទស្សនិកជនឱ្យបានក្នុងនាមជាតារាចម្រៀងថ្មីមួយរូប តាមលក្ខខណ្ឌរបស់គណៈកម្មការរៀបចំកម្មវិធីប្រកួតទាំងមូលតម្រូវ ។
ភាពកម្សាន្តសប្បាយរីករាយនារាត្រីនោះត្រូវបានបង្កើតឡើងដោយពន្លកយុវតារាចម្រៀង អ្នកប្រមាញ់ក្ដីស្រមៃ THE IDOL ទាំង៥រូប ក្នុងនោះមាន THE IDOL I៤ កែវ សុបញ្ញា ដែលជាបេក្ខនារី THE IDOL មកពីរាជធានីភ្នំពេញ THE IDOL I៥ ឃុន ច័ន្ទ្រតារាវត្ដី ដែលជាបេក្ខនារី THE IDOL មកពីខេត្ដសៀមរាប THE IDOL I៩ សាយ ច័ន្ទ្រកន្និកា ដែលជាបេក្ខនារីTHE IDOLមកពីខេត្ដសៀមរាប THE IDOL I១០ លុយ ភត្ដ្រា ដែលជាបេក្ខជន THE IDOL មកពីខេត្ដតាកែវ និង THE IDOL I១២ ឈុំ រ៉ូបឺត ដែលជាបេក្ខជន THE IDOL មកពីខេត្ដកំពត ។ ក្រៅពីនេះមានការចូលរួមពីតារាបង្ហាញម៉ូដKhmer Super Model តារាចម្រៀងយុវកុមារ Kodomo ព្រមទាំងតារាចំរៀងTHE IDOL ជំនាន់ទី២ផងដែរ ។ អ្វីដែលពិសេសនោះ គឺ ទឹកចិត្ដអ្នកកីឡានៃ THE IDOL ទាំង៦រូបដទៃទៀត ដែលពុំមានឱកាសចូលដល់វគ្គផ្ដាច់ព្រ័ត្រ បានត្រឡប់មកជួបទស្សនិកជនរបស់ខ្លួនជាថ្មី
ផងដែរ ។
ក្នុងកម្មវិធីនេះដោយសំឡេងមហាជនច្រើនលើសលប់បានគាំទ្រ ដោយការផ្ញើសារចំពោះ THE IDOL I៤ កែវ សុបញ្ញា ទទួលបាននូវជ័យលាភីក្នុងវគ្គផ្ដាច់ព្រ័ត្រនារាត្រីនោះ ដោយមានអ្នកស្រីប៊ួយ ចាន់សុធា នាយិកាការិយាល័យក្រុមហ៊ុន Cambrew នៃស្រាបៀរអង្គរអញ្ជើញជាកិត្ដិយសផ្ដល់នូវពានរង្វាន់ជ័យលាភីតារាចម្រៀងឯកនេះ ។
កម្មវិធីត្រូវបានបង្កើតឡើងចំនួន៣ឆ្នាំរួចមកហើយ ដោយក្រុមហ៊ុន BKA Entertainment ក្រោមការឧបត្ថម្ភធំពីក្រុមហ៊ុនស្រាបៀរអង្គរ ឧបត្ថម្ភពីស្ករគ្រាប់ Extra Parrot, ស្ករកៅស៊ូKidKid, ភេសជ្ជៈPepsi, ភេសជ្ជៈString ព្រមទាំងមានការសហការឧបត្ថម្ភពី I-Friend Entertainment, Plus Max, PARAGON Cambodia, Power Sound ជាដើម ដើម្បីផ្ដល់ឱកាសដល់អ្នកមានទេពកោសល្យសិល្បៈចម្រៀងអាចបំពេញនូវក្ដីស្រមៃរបស់គេក្លាយជាតារាចម្រៀងដ៏មានគុណភាពមួយរូប បញ្ចៀសពួកគេឱ្យឆ្ងាយពីអំពើអបាយមុខ ពាលាអាវាសែគ្រប់ប្រភេទ ។
គួររំឭកផងដែរថា ក្នុងកម្មវិធីប្រកួតនេះមានការចូលរួមផ្ដល់កិត្ដិយសពីគណៈកម្មការផ្ដល់មូលវិចារណ៍ចំនួន៣រូប គឺលោកហួរ ឡាវី លោកប៉េង រដ្ឋា អគ្គនាយក Ifriend Entertainment អ្នកដឹកនាំថត និងជាអ្នកជំនាញផ្នែកបច្ចេកទេសសំឡេង ព្រមទាំងលោក ALEX សហសេវិក Plus Max និងជាអ្នកជំនាញបុគ្គលិកលក្ខណៈជាដើម ដែលបានចូលរួមផ្ដល់នូវការរិះគន់ កែលម្អ ផ្ដល់នូវគន្លឹះចែករំលែកបទពិសោធន៍ល្អ ដើម្បីកែប្រែបណ្ដុះបណ្ដាល THE IDOL គ្រប់ៗរូបឱ្យក្លាយខ្លួនជាតារាចម្រៀងមួយរូបដ៏មានគុណភាព ។
កម្មវិធីផ្ដាច់ព្រ័ត្រនារាត្រីនោះត្រូវបានផ្សាយផ្ទាល់តាមរយៈស្ថានីយទូរទស្សន៍ប៉ុស្ដិ៍លេខ៣ ព្រមទាំងមានការផ្សាយឡើងវិញនូវកម្មវិធីផ្ដាច់ព្រ័ត្រនេះនៅរាត្រីថ្ងៃសុក្រ ទី៣ ខែសីហា វេលាម៉ោង៧និង៣០នាទីយប់ ។ ទស្សនិកជនបានតាមដានទស្សនានូវទិដ្ឋភាពដ៏អស្ចារ្យជាថ្មីម្ដងទៀត កម្មវិធីប្រកួតតារាចំរៀងឯក THE IDOL បេះដូងខ្មែរ ជំនាន់ទី៣ ៕
ចែករំលែកព័តមាននេះ