ធនាគារកណ្តាលកូរ៉េខាងត្បូង បានទិញមាសចំនួន១៦តោននៅក្នុងខែកក្កដា ដែលជាការទិញមាសលើកទី២របស់ខ្លួនមិនដល់
មួយឆ្នាំផង ។ ធនាគារធ្វើដូច្នេះ ក្នុងគោលបំណងកាន់កាប់មាសឱ្យបាន៧០,៤តោន និងដើម្បីធ្វើពិពិធកម្មធនបម្រុងបរទេសរបស់ខ្លួន ។
ក្នុងរបាយការណ៍របស់ធនាគារបានឱ្យដឹងថា តម្លៃមាសដែលធនាគារទិញសរុបលើកនេះមានចំនួន៨១០លានដុល្លារ តិចជាងកាលពីទិញលើកមុនដែលកាលពីខែវិច្ឆកាឆ្នាំមុន ធនាគារទិញមាសចំនួន១៥តោន ចំណាយអស់៨៥០លានដុល្លារ ។ មន្ត្រីធនាគារមួយរូបរៀបរាប់ថា មាសដែលបានទិញមកនេះ ភាគច្រើនទិញពីទីក្រុងឡុង ប៉ុន្តែមិនបានបញ្ជាក់លម្អិតថា តើក្នុង១អោនត្រូវចំណាយប៉ុន្មាននោះទេ សម្រាប់មាសមួយដុំៗនោះ ។ មកទល់នឹងដំណាច់ខែកក្កដា មានមាសចំនួន០,៩%នៃធនបម្រុងបរទេសរបស់កូរ៉េខាងត្បូង ពោលគឺកើនលើសពីដើមខែដែលមានតែ០,៧% ប៉ុណ្ណោះ ។
ធនាគារកណ្តាលកូរ៉េខាងត្បូងនិយាយថា ឥឡូវនេះកូរ៉េជាប់ចំណាត់ថ្នាក់ទី៤០ជាប្រទេសដែលស្តុកមាសច្រើននៅលើពិភពលោក ដែលកាលពីខែមិថុនា ប្រទេសនេះជាប់ចំណាត់ថ្នាក់ទី៤៣ ។ កូរ៉េខាងត្បូង ជាប្រទេសដែលមានសេដ្ឋកិច្ចធំលំដាប់ទី៤នៅអាសីុ មានធនបម្រុងអត្រាប្តូរប្រាក់បរទេសធំបំផុតលំដាប់ទី៧នៅលើពិភពលោក បន្ទាប់ពីចិន ជប៉ុន ស្វ៊ីស តៃវ៉ាន់ រុស្ស៊ី និងប្រេស៊ីល និងគិតត្រឹមដំណាច់ខែមិថុនា ៕
ចែករំលែកព័តមាននេះ