រាជធានីភ្នំពេញ ៖ លោកម៊ី ប៊ុនរិន ប្រធាននគរបាលប៉ុស្តិ៍ទំនប់ទឹកបានមានប្រសាសន៍ថា សមត្ថកិច្ចបានចាប់ខ្លួនឈ្មោះប៊ី សឿន អាយុ៤៩ឆ្នាំ មានទីលំនៅមិនពិតប្រាកដក្រោយពេលដែលបានធ្វើសកម្មភាពជះទឹកអាស៊ីតដាក់ប្រពន្ធរបស់ខ្លួននោះ ។ ការចាប់ខ្លួននេះ គឺដោយសារសមត្ថកិច្ចបានឱ្យប្រពន្ធដែលជាស្រ្តីរងគ្រោះអន្ទងហៅឈ្មោះប៊ី សឿន ឱ្យមកជួយព្យាបាលរបួស ហើយសន្យាថា អត់ប្តឹងប្តល់អ្វីទេ។ ពេលឮប្រពន្ធនិយាយដូច្នោះឈ្មោះប៊ី សឿន ក៏មកកាន់មន្ទីរពេទ្យព្រះកុសុមៈ ហើយត្រូវប៉ូលិសប៉ុស្តិ៍ទំនប់ទឹកដែលដឹកនាំនដោយលោកម៉ី ប៊ុនរិន ធ្វើការឃាត់ខ្លួនបញ្ជូនទៅអធិការដ្ឋាននគរបាលខណ្ឌចំការមន ដើម្បីចាត់ការតាមច្បាប់។
គួររំលឹកថា ស្ត្រីរងគ្រោះឈ្មោះរឿង ម៉ាប់ អាយុ៣២ឆ្នាំ ត្រូវប្តីវ័យចំណាស់ខាងលើលបជះទឹកអាស៊ីតដាក់លើផ្ទៃមុខ ដោយសារតែកើតរោគប្រចណ្ឌនឹងប្រពន្ធវ័យក្មេងកាលពីវេលាម៉ោង៩និង៣០នាទីយប់ ថ្ងៃទី៥ សីហា ក្នុងសង្កាត់ទំនប់ទឹក ខណ្ឌចំការមន។
បើតាមស្ត្រីឈ្មោះចាន់ ស្រីលក្ខណ៍ អាយុ៣០ឆ្នាំ ត្រូវជាកូនប្រសារបស់ជនបង្ក និងជាអ្នកមើលថែស្ត្រីរងគ្រោះនៅមន្ទីរពេទ្យបានបង្ហើបឱ្យដឹងថា ឈ្មោះប៊ី សឿន ត្រូវជាឪពុកក្មេករបស់នាងបានលែងលះជាមួយម្តាយក្មេករបស់នាងមកយកប្រពន្ធក្រោយទៀត គឺស្ត្រីឈ្មោះរឿង ម៉ាប់ នេះ។ ប៉ុន្តែពីរនាក់ប្តីប្រពន្ធនេះ រស់នៅមិនចុះសម្រុងនឹងគ្នាចេះតែឈ្លោះប្រកែកគ្នាជាញឹកញាប់ ពីព្រោះប្តីពូកែប្រចណ្ឌប្រពន្ធក្មេងពេក រហូតឈានដល់លែងលះគ្នារយៈពេល២ខែមកហើយ តែឈ្មោះប៊ី សឿន នៅតែតាមរករឿងឈ្លោះប្រកែកជាមួយប្រពន្ធឈ្មោះរឿង ម៉ាប់ នេះទៀត។ ប្រភពបន្តទៀតថា នៅយប់កើតហេតុឈ្មោះរឿង ម៉ាប់ បានដើរទៅលេងផ្ទះមិត្តភក្តិនៅទល់មុខផ្សារទំនើបសុវណ្ណា ស្រាប់តែឈ្មោះប៊ី សឿន បានទៅតាមឈ្លោះប្រកែកគ្នានៅទីនោះ ។ ម្ចាស់ផ្ទះក៏ជួយឃាត់ទើបបុរសជាប្តីដើរចេញទៅបាត់ ហើយក្រោយមកប្តីរូបនេះក៏លបជះទឹកអាស៊ីតដាក់ប្រពន្ធតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ