ខេត្តប៉ៃលិន ៖ នៅសុខៗនាងមកសុំបែក ដោយរត់ទៅមានសង្សារថ្មី ហើយនាងបានប្រាប់ថា សុំចប់គ្នា ទើបធ្វើឲ្យយុវជនម្នាក់ដែលស្រឡាញ់នាងអស់ពេលជាយូរថ្ងៃខែកើតទុក្ខមិនសុខចិត្តក៏ទាញថ្នាំពុលទឹកខៀវយកទៅផឹកអស់ជិតកន្លះលីត្រប៉ងធ្វើអត្តឃាត។ ជនរងគ្រោះឈ្មោះឡូក វៃ ភេទប្រុស អាយុ១៧ឆ្នាំ ម្តាយឈ្មោះវ៉ូន ទី អាយុ៣៤ឆ្នាំ មានស្រុកកំណើតរស់នៅភូមិបុស្បូវ ឃុំស្រឡៅទង ស្រុកឧត្តុង្គ ខេត្តកំពង់ស្ពឺ សព្វថ្ងៃជាកម្មករធ្វើការដកដំឡូងមី ស្ថិតនៅភូមិព្រះឥណ្ឌលក់ឡូត ឃុំសាលាក្រៅ ស្រុកសាលាក្រៅ។
ហេតុការណ៍នេះបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី៥ សីហា ២០១២ នៅក្នុងចម្ការក្រោយផ្ទះស្ថិតក្នុងភូមិឃុំខាងលើ។ តែពេលដែលជនរងគ្រោះផឹកថ្នាំពុលទឹកខៀវរួចស្រាប់តែមានអាការក្អួតចង្អោរ ឃា្លនបាយ ហេវហត់ ទើបដើរមកផ្ទះបានបងប្អូនជួយដឹកយកទៅសង្គ្រោះនៅមន្ទីរពេទ្យបង្អែកខេត្តនៅវេលាម៉ោង១១និង៣០នាទីយប់ លោកគ្រូពេទ្យបានធ្វើការលាងក្រពះ ជម្រះជាតិពុល។
ប្រភពព័ត៌មានបានឱ្យដឹងថា នៅមុនថ្ងៃកើតហេតុ នារីដែលជាសង្សាររបស់ជនរងគ្រោះ បានទៅស្រឡាញ់មិត្តភក្តិរបស់ខ្លួនដែលធ្វើការដកដំឡូងមីជាមួយគ្នា។ ដោយឃើញពីសកម្មភាពរបស់នារីដែលជាសង្សាររបស់ខ្លួនមានភាពស្និទ្ធស្នាលទៅលើមិត្តភក្តិរបស់គេជាច្រើនដង ទើបសួរត្រង់ៗទៅនាង តែនាងប្រាប់ថា ឈប់ស្រឡាញ់ខ្លួនទៀតហើយ គឺស្រឡាញ់មិត្តភក្តិរបស់ខ្លួនវិញ ព្រោះគេចេះយល់ចិត្តជាង ហើយគេមានទ្រព្យសម្បត្តិច្រើនជាងអាចជួយទំនុកបម្រុងពេលអនាគតបាន។ ដោយឮដូច្នេះជនរងគ្រោះខូចចិត្តយ៉ាងខ្លាំងដេកមិនលក់នឹកឃើញតែសង្សារនៅនឹងមុខនិងហួសចិត្តយ៉ាងខ្លាំងមិនគួរនាងក្បត់ចិត្តនឹងខ្លួនទៅមានសង្សារថ្មី ដែលជាមិត្តភក្តិរបស់ខ្លួនសោះ ទើបធ្វើឱ្យគេកាត់សេចក្តីដោយយកថ្នាំពុលទឹកខៀវទៅសម្ងំផឹកក្នុងចម្ការតែម្តង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ